కశ్మీర్‌లో క్లౌడ్ బరస్ట్‌తో ,,,ఆకస్మిక వరదలతో పలుచోట్ల జనజీవనం అస్తవ్యస్తం

జమ్మూ కశ్మీర్‌‌లో క్లౌడ్ బరస్ట్‌తో ఆకస్మకి వరదలు సంభవించాయి. ఎక్కడికక్కడ కొండచరియలు విరిగిపడి జనజీవనం అస్తవ్యస్తమైంది. రాంబన్‌లో ఆకస్మిక వరదలకు ముగ్గురు ప్రాణాలు కోల్పోయారు. కొండచరియలు విరిగిపడటంతో శ్రీనగర్-జమ్మూ జాతీయ రహదారిని మూసివేశారు. దీంతో వాహనాలు ఎక్కడవక్కడ నిలిచిపోయాయి. వరద నీటిలో పలు వాహనాలు మునిగిపోయిన దృశ్యాలు సోషల్ మీడియాలో వైరల్ అవుతున్నాయి. ఈ ప్రకృతి విపత్తుకు అత్యంత తీవ్రంగా ప్రభావితమైన ప్రాంతాల్లో రాంబన్ ఒకటి. అనేక చెట్లు నేలకూలిపోయి... రవాణా వ్యవస్థ స్తంభించింది. విద్యుత్ సరఫరా కూడా అంతరాయం ఏర్పడింది.

గురువారం హఠాత్తుగా వచ్చిన గాలులు.. కురిసిన భారీవర్షానికి ఆకస్మిక వరదలు వచ్చినట్టు తెలుస్తోంది. ఉధంపూర్‌లోని సతేని పంచాయతీకి చెందిన మాజీ సర్పంచ్ పురుషోత్తమ్ గుప్తా మాట్లాడుతూ.. ‘మా పంచాయతీ పరిధిలో అనేక చెట్లు కూలిపోయాయి. రవాణా, విద్యుత్ వ్యవస్థలు తీవ్రంగా ప్రభావితమయ్యాయి. 4-5 సంవత్సరాల తర్వాత ఇలాంటి గాలులు వీయడం ఇదే తొలిసారి’ అని ANIకి చెప్పారు.

క్యుములోనింబస్ మేఘాలకు తోడు ద్రోణి ప్రభావంతో కుండపోత వర్షాలు, ఆకస్మిక వరదలు సంభవించినట్టు భారత వాతావరణ విభాగం పేర్కొంది. రాంబన్ జిల్లా ధరం కుంద్ గ్రామంలో సుమారు 40 ఇళ్లు దెబ్బతిన్నాయి. అక్కడ 100 మందికి పైగా ప్రజలను పోలీసులు రక్షించి, సురక్షిత ప్రాంతానికి తరలించారు.

శ్రీనగర్-జమ్మూ జాతీయ రహదారిలోని నష్రీ- బానీహాల్ మధ్య దాదాపు పదికిపైగా ప్రాంతాల్లో కొండచరియలు, మట్టిపెల్లలు విరిగిపడి రవాణా పూర్తిగా నిలిచిపోయింది. కొండచరియలు, మట్టిపెల్లలు విరిగిపడిన కారణంగా జాతీయ రహదారిపై వాహనాల రాకపోకలను నిలిపివేసినట్టు అధికారులు తెలిపారు. వాతావరణం మెరుగయి.. రహదారి పూర్తిగా క్లియర్ అయ్యే వరకు ప్రయాణికులు ఈ మార్గంలో ప్రయాణించవద్దని సూచించారు.

కాగా, పర్వత ప్రాంతాలు మిగతా ప్రాంతాల కంటే ఎత్తులో ఉంటాయి. ఇలాంటి ప్రదేశాలకు నీటిని మోసుకుపోయిన మేఘాలు.. సంతృప్త స్థాయికి చేరడం వల్ల వర్షించడానికి సిద్ధంగా ఉంటాయి. కానీ అక్కడి వేడి వాతావరణ పరిస్థితుల వల్ల వర్షించడం వాటికి సాధ్యం కాదు. దీంతో అక్కడ వర్షం కురవడానికి బదులు ముందు కదులుతాయి. ఈ క్రమంలో అక్కడ ఉన్న నీటి బిందువులు కూడా మేఘాల్లోకి చేరి.. మోయేలేని స్థితికి మేఘాలు చేరుకున్నప్పుడే క్లౌడ్ బరస్ట్ వంటివి సంభవిస్తాయి.