గంటా శ్రీనివాసరావు వర్సెస్ విష్ణుకుమార్ రాజు.. రోడ్డుపైనే వాదనలు

విశాఖపట్నంలో ఎన్డీఏ కూటమి నేతల మధ్య విభేదాలు బయటపడ్డాయి. టీడీపీ ఎమ్మెల్యే గంటా శ్రీనివాసరావు, బీజేపీ ఎమ్మెల్యే విష్ణుకుమార్ రాజు మధ్య ఓ విషయంలో.. నడిరోడ్డుపైనే వాదనలు నడిచాయి. ఈ వీడియోలు ప్రస్తుతం సోషల్ మీడియాలో వైరల్ అవుతున్నాయి. అయితే తన నియోజకవర్గంలో తనకు తెలియకుండానే జోక్యం చేసుకుంటున్నారని భీమిలి ఎమ్మెల్యే గంటా శ్రీనివాసరావు ఆగ్రహంతో ఉన్నట్లు తెలిసింది. తన నియోజకవర్గ పరిధిలోని అంశంలో బీజేపీ ఎమ్మెల్యే విష్ణుకుమార్ రాజు జోక్యం చేసుకుంటున్నారని ఆయన మండిపడినట్లు సమాచారం. భీమిలి నియోజకవర్గం పరిధిలోని ఫిలిం నగర్ క్లబ్ లీజు వ్యవహారమే ఈ వాదనలకు కారణమైంది.

తన నియోజకవర్గం పరిధిలోని ఫిలిం నగర్ లీజు వ్యవహారాన్ని తనకు తెలియకుండా కలెక్టర్ దృష్టికి ఎలా తీసుకెళ్తారని విష్ణుకుమార్ రాజును గంటా శ్రీనివాసరావు ప్రశ్నించారు. ఇష్టానుసారం వ్యవహరించేది లేదని విష్ణుకుమార్ రాజుపై అసంతృప్తి వ్యక్తం చేశారు. అయితే ఫిలిం నగర్ లీజు వ్యవహారాన్ని కలెక్టర్ దృష్టికి తీసుకెళ్లే సమయంలో మీరు అందుబాటులో లేరంటూ గంటా శ్రీనివాసరావుకు విష్ణుకుమార్ రాజు సర్దిచెప్పే ప్రయత్నం చేశారు. రోడ్డుపై కారు వద్ద ఈ వ్యవహారం నడిచింది. అయితే ఈ వీడియోలు ఇప్పుడు నెట్టింట వైరల్ అవుతున్నాయి. గంటా శ్రీనివాసరావు, విష్ణుకుమార్ రాజు వ్యవహారం ఇప్పుడు కూటమి నేతల్లో హాట్ టాపిక్‌గా మారింది.

మరోవైపు ఫిలిం నగర్ కల్చరల్ సెంటర్‌ను ఇటీవల గంటా శ్రీనివాసరావు, విష్ణుకుమార్ రాజు కలిసి సందర్శించారు. ఏపీలో సినిమా ఇండస్ట్రీ అభివృద్ధి కోసం 2015లో విశాఖలో ఫిలిం నగర్ కల్చరల్ సెంటర్‌ నిర్మాణానికి శ్రీకారం చుట్టారు. భీమిలి బీచ్ రోడ్‌లోని తిమ్మాపురం వద్ద వైజాగ్ ఫిలిం నగర్ కల్చరల్ సెంటర్‌ ఏర్పాటు చేశారు. అయితే ఫిలిం నగర్ కల్చరల్ సెంటర్ కోసం కేటాయించిన ప్రభుత్వ భూమిపై అభ్యంతరాలు వచ్చాయి.

ఈ నేపథ్యంలో ఇటీవల ఫిలిం నగర్ కల్చరల్ సెంటర్‌ను సందర్శించిన గంటా శ్రీనివాసరావు, విష్ణకుమార్ రాజు.. అభ్యంతరాల నేపథ్యంలో ఫిలిం నగర్ కల్చరల్ సెంటర్‌కు కొత్తగా భూ కేటాయింపులు చేస్తామన్నారు. అలాగే ఎలాంటి వివాదాలు లేకుండా వైజాగ్ ఫిలిం నగర్ కల్చరల్ సెంటర్‌ను మోడల్ క్లబ్‌గా నిలబెడతామని తెలిపారు. అయితే ఫిలిం నగర్ లీజు వ్యవహారం నేపథ్యంలోనే విష్ణుకుమార్ రాజు కలెక్టర్‍ను కలిసినట్లు సమాచారం.