గంటకు 600 కిలోమీటర్ల వేగంతో..విమానం కంటే స్పీడుగా వెళ్లే చక్రాలు లేని రైలు

మనం ఎక్కడికైనా వెళ్లాలి అనుకున్నప్పుడు మన బడ్జెట్, సమయాన్ని బట్టి బస్సు, రైలు, విమానం.. ఇలా ఏదో ఒకటి ఎంచుకుంటాం. కానీ అతి తక్కువ ఖర్చు, అందులోనూ విమానం కంటే స్పీడుగా వెళ్లే ఓ మార్గం ఉందని తెలిస్తే అంతా దాన్నే ఎంచుకుంటారు. కాస్త ఎక్కువ డబ్బులు ఖర్చైనా ఫర్వాలేదనుకుంటూ మరీ పరుగులు పెడతారు. కానీ ఈ మార్గం అందుబాటులో లేదు. కేవలం చైనీయులకు మాత్రమే. అయితే సర్లేండీ.. అసలా మార్గం ఏంటి అనిపిస్తోందా.. అంత కొత్తదేం కాదులెండి.. రైలు ప్రయాణమే. కాకపోతే అన్ని రైళ్లు గంటకు 70 నుంచి 200 కిలో మీటర్ల మాత్రమే వెళ్తే... ఈ రైలు మాత్రం గంటకు 600 కిలో మీటర్ల వేగంతో దూసుకుపోతుంది. తాజాగా ఈ మ్యాగ్‌లెవ్ (మాగ్నెటిక్ లెవిటేషన్) రైలును చైనా తయారు చేసింది. ఇప్పటికే దీన్ని టెస్ట్ ట్రయల్ చేయగా.. విమానాల కంటే వేగంగా పట్టాలపై పరుగులు పెట్టి ప్రపంచం దృష్టిని ఆకర్షిస్తోంది.

చైనా రైల్వే రోలింగ్ స్టాక్ కార్పొరేషన్ (CRRC) అభివృద్ధి చేసిన ఈ మ్యాగ్‌లెవ్ రైలు, విమానాల వేగాన్ని కూడా మించిపోయింది. సాధారణ ప్రయాణీకుల జెట్‌లు గంటకు 547 నుంచి 575 మైళ్ల వేగంతో ప్రయాణిస్తే.. ఈ సూపర్ ఫాస్ట్ రైలు మాత్రం గంటకు 600 కిలో మీటర్ల (సుమారు 373 మైళ్లు) గరిష్ట వేగాన్ని అందుకోగలదు. అత్యంత ఆశ్చర్యకరమైన విషయం ఏమిటంటే.. ఈ రైలు కేవలం 7 సెకన్లలోనే తన గరిష్ట వేగాన్ని చేరుకోగలదు. ముఖ్యంగా ఇది 1,200 కిలో మీటర్ల దూరాన్ని కేవలం 150 నిమిషాల్లో (అంటే 2.5 గంటల్లో) కవర్ చేస్తుంది. ఉదాహరణకు ప్రస్తుతం బీజింగ్, షాంఘై మధ్య 5.5 గంటలు పెట్టే ప్రయాణ సమయాన్ని ఇది 2.5 గంటలకు తగ్గించనుంది.

మ్యాగ్‌లెవ్ సాంకేతికత అనేది అయస్కాంత ఆకర్షణ మరియు వికర్షణ శక్తులను ఉపయోగించి రైలును పట్టాలపై నుంచి పైకి లేపుతుంది. దీని వల్ల రైలు పట్టాలను తాకకుండా గాలిలో ప్రయాణిస్తుంది. దీని ద్వారా ఘర్షణ (ఫ్రిక్షన్) పూర్తిగా తగ్గిపోతుంది. ఫలితంగా రైలు చాలా మృదువుగా.. నిశ్శబ్దంగా, అత్యంత వేగంగా కదులుతుంది. ఇది సాంప్రదాయ రైల్వే వ్యవస్థల కంటే చాలా సమర్థవంతమైనది.

ఈ మ్యాగ్‌లెవ్ రైలు 17వ మోడరన్ రైల్వేస్ ఎగ్జిబిషన్‌లో ఆవిష్కరించారు. దీన్ని sleek, ఏరోడైనమిక్ డిజైన్‌తో రూపొందించగా.. గాలి నిరోధకతను తగ్గించడానికి దీనికి ప్రత్యేకమైన, పొడవాటి పాయింటెడ్ నోస్ ఉంటుంది. లోపలి భాగం అత్యాధునికంగా, విశాలంగా ఉంటుంది. విశాలమైన క్యాబిన్, పెద్ద డిజిటల్ స్క్రీన్‌లు ప్రయాణికులకు సౌకర్యవంతమైన, అత్యాధునిక అనుభవాన్ని అందిస్తాయి. భవిష్యత్తులో ఈ రైలు ప్రయాణం రవాణా రంగంలో సరికొత్త అధ్యాయాన్ని లిఖించనుంది.