ఒబామాను అరెస్ట్ చేసిన ఎఫ్బీఐ అధికారులు.. వీడియో షేర్ చేసిన ట్రంప్

అగ్రరాజ్యం అమెరికా రాజకీయాల్లో కృత్రిమ మేధస్సు (AI) సాంకేతికత ఇప్పుడు కొత్త వివాదాలకు దారితీస్తోంది. ముఖ్యంగా అమెరికా అధ్యక్షుడు డొనాల్డ్ ట్రంప్ తన సోషల్ మీడియా ప్లాట్‌ఫామ్ ట్రూత్ సోషల్‌లో ఏఐ సాంకేతిక సాయంతో రూపొందించిన ఓ వీడియోను పోస్ట్ చేశారు. అందులో యూఎస్ మాజీ అధ్యక్షుడు బరాక్ ఒబామాను FBI ఏజెంట్లు ఓవల్ ఆఫీసులో అరెస్ట్ చేస్తున్నట్లు కనిపిస్తోంది. అలాగే ఆపై ఆయన జైలు కటకటాల వెనుక ఉన్నట్లు చూపిస్తోంది. ఈ వీడియోను షేర్ చేసిన ట్రంప్.. చట్టానికి ఎవరు అతీతులు కారంటూ లైన్ కూడా రాసుకు రాగా.. ఈ పోస్ట్ తీవ్ర చర్చకు దారి తీసింది.

టిక్‌టాక్ నుంచి పుట్టుకొచ్చిన ఈ 'డీప్‌ఫేక్' వీడియో.. వాస్తవానికి చాలా భిన్నమైన చిత్రాన్ని చూపించింది. వీడియోలో ఒబామా, ట్రంప్ మాట్లాడుకుంటూ ఉండగా.. ఎఫ్‌బీఐ అధికారులు అక్కడకు వచ్చారు. మాజీ అధ్యక్షుడి చేతికి సంకెళ్లు వేసినట్లుగా చూపించారు. ఆ సమయంలో డొనాల్డ్ ట్రంప్ నవ్వుతూ కనిపించడం గమనార్హం. అనంతరం ఒబామా ఖైదీ దుస్తుల్లో జైల్లో కూర్చొని ఉన్నట్లు చూపించడంతో వీడియో ముగిసింది. అయితే ఈ క్లిప్‌కు "చట్టానికి ఎవరూ అతీతులు కారు" అనే క్యాప్షన్ కూడా రాసుకొచ్చారు ట్రంప్. అంతేకాకుండా మాజీ అధ్యక్షుడు జో బైడెన్‌తో సహా పలువురు డెమోక్రాటిక్ నాయకులు ఇదే వాక్యాన్ని పదేపదే చెబుతున్నట్లుగా కూడా ఈ వీడియోలో చూపించారు. చివరగా వ్యంగ్యంగా.. 'పెపే ది ఫ్రాగ్' అనే ప్రముఖ ఇంటర్నెట్ మీమ్‌ను కూడా ఈ వీడియోలో చేర్చారు.

ఈ వీడియో పట్ల సోషల్ మీడియాలో భిన్నమైన, తీవ్రమైన ప్రతిస్పందనలు వ్యక్తం అయ్యాయి. ట్రంప్ మద్దతుదారులు ఈ వీడియోను స్వాగతించి.. సంతోషం వ్యక్తం చేయగా, విమర్శకులు మాత్రం దీనిని పూర్తిగా తప్పుదోవ పట్టించేలా, రెచ్చగొట్టేలా ఉందని ఖండించారు. ఎన్నికల సమయంలో ఇలాంటి ఏఐ జనరేటెడ్ డీప్‌ఫేక్ వీడియోలు ప్రజలను ప్రభావితం చేయవచ్చని, తప్పుడు సమాచారాన్ని వ్యాప్తి చేయవచ్చని నిపుణులు ఆందోళన వ్యక్తం చేస్తున్నారు.

ఆధునిక సాంకేతిక పరిజ్ఞానంతో సృష్టించబడుతున్న ఇలాంటి వీడియోలు.. వాస్తవాలను వక్రీకరించే ప్రమాదం ఉందని, తద్వారా సమాజంలో అశాంతిని, అపనమ్మకాన్ని పెంచే అవకాశం ఉందని నిపుణులు హెచ్చరిస్తున్నారు. ఒక రాజకీయ నాయకుడు ముఖ్యంగా దేశ అధ్యక్షుడు.. ఇలాంటి తప్పుడు వీడియోలను పంచుకోవడం నైతిక విలువలకు విరుద్ధమని చాలా మంది అభిప్రాయ పడుతున్నారు. డీప్‌ఫేక్ టెక్నాలజీ పెరుగుతున్న కొద్దీ, ప్రజా జీవితంలో దీని ప్రభావం ఎలా ఉంటుందనే చర్చకు ఈ ఘటన మరోసారి తెరలేపింది.