నిమ్మకాయ అల్లం ఉంటే చాలు లివర్‌ క్లీన్

ఆరోగ్యంగా ఉన్నారా, ఉన్నామని అనుకుంటున్నారు. నిజానికి ఈ ప్రశ్న చాలా కీలకం. ఎందుకంటే చాలా మంది తాము హెల్తీగానే ఉన్నామని అనుకుంటారు. కానీ..ఒక్కసారి లక్షణాలు బయట పడితే కానీ సమస్య ఉందని అర్థం కాదు. లివర్ విషయంలో ఈ సింప్టమ్స్ కాస్త తీవ్రంగా కనిపిస్తాయి. కాలేయం సరిగ్గా పని చేస్తేనే మిగతా అవయవాలు సరైన విధంగా ఉంటాయి. లేదంటే ప్రతి ఆర్గాన్ పైనా ఆ ఎఫెక్ట్ కనబడుతుంది.

శరీరంలో ఉండే మురికిని వదిలించడంలో లివర్ దే కీలక పాత్ర. అందుకే..కాలేయం ఆరోగ్యంగా ఉండేలా చూసుకోవాలి. అయితే..లివర్ హెల్తీగా ఉండాలంటే కేవలం మెడిసిన్ ఒక్కటే ఆప్షన్ కాదు. డిటాక్స్ డ్రింక్స్ లాంటివి కూడా ట్రై చేయవచ్చు. న్యూట్రిషనిస్ట్ చెప్పిన ఓ డ్రింక్ తో ఫ్యాటీ లివర్ సమస్య తగ్గడంతో పాటు లివర్ ఫైబ్రాసిస్ ఇబ్బంది కూడా తగ్గిపోతుంది.

ఫ్యాటీ లివర్ 

ఈ సమస్య ఈ మధ్య కాలంలో చాలా మందిని వేధిస్తోంది. విపరీతంగా కొవ్వు పదార్థాలు తిన్నప్పుడు ఆ అదనపు కొవ్వు శరీరంలో పేరుకుపోతుంది. అయితే..కొవ్వుని ఫిల్టర్ చేసి బయటకు పంపించే లివర్ పని తీరుపై ప్రభావం పడుతుంది. ఎంత వరకూ అయితే ఫిల్టర్ చేయగలదో అంత వరకే లివర్ సరైన విధంగా పని చేస్తుంది. అదనపు కొవ్వుని ఫిల్టర్ చేయలేకపోవడం వల్ల అది లివర్ లో పేరుకుపోతుంది. దీన్నే ఫ్యాటీ లివర్ అంటారు. ఒక్కసారి ఈ సమస్య మొదలైందంటే.. చాలా ఇబ్బందులు వస్తాయి. దశల వారీగా ఇది పెరుగుతుంది. మొదట్లో గుర్తిస్తే కొంత వరకూ ముప్పు నుంచి తప్పించుకోవచ్చు. లేదంటే మాత్రం ఎన్నో సమస్యలు ఎదుర్కోవాల్సి వస్తుంది. కొన్ని సార్లు ఇది పచ్చ కామెర్ల వరకూ దారి తీస్తుంది. సరైన సమయంలో అప్రమత్తం కాకపోతే ప్రాణాలకే ప్రమాదం. అందుకే ఫ్యాటీ లివర్ సమస్యను వీలైనంత త్వరగా తగ్గించుకోవాలి.

సింపుల్ చిట్కా

ఫ్యాటీ లివర్ ని తగ్గించుకోడానికి ఎన్నో మందులు అందుబాటులో ఉంటాయి. అయితే..వ్యాధి తీవ్రతను బట్టి మెడిసన్ వాడడం మంచిదే. వైద్యుల సలహా మేరకు వాటిని తీసుకోవాలి. వీటితో పాటు కొన్ని చిట్కాలు పాటిస్తే ఇంకాస్త త్వరగా ఈ సమస్య నుంచి బయటపడేందుకు అవకాశం ఉంటుంది. అలాంటి ఓ చిట్కా గురించి వివరించారు న్యూట్రిషనిస్ట్. కేవలం రెండు పదార్థాలతోనే లివర్ లో పేరుకున్న మలినాలను బయటకు పంపడంతో పాటు ఫ్యాటీ లివర్ సమస్యను కూడా తగ్గించుకోవచ్చు. ఆ రెండు పదార్థాలు ఏంటంటే..ఒకటి నిమ్మకాయ, మరోటి అల్లం. ఈ రెండింటిలోనూ ఎన్ని ఔషధ గుణాలున్నాయో ప్రత్యేకంగా చెప్పనక్కర్లేదు. అయితే..ఈ రెండింటినీ కలిపి తీసుకున్నప్పుడు ఈ ప్రయోజనాలు ఇంకాస్త ఎక్కువవుతాయి. మరి ఎలా వాడితే ఫ్యాటీ లివర్ తగ్గుతుందో చూద్దాం.

ఒకే డ్రింక్‌తో 

నిమ్మకాయ, అల్లం. ఈ రెండూ లివర్ ని క్లీన్ చేయడంలో చాలా బాగా ఉపయోగపడతాయి. ఈ రెండింటిలోనూ యాంటీ ఆక్సిడెంట్ గుణాలు పుష్కలంగా ఉంటాయి. ఫలితంగా లివర్ లో పేరుకుపోయిన టాక్సిన్స్ బయటకు వచ్చేలా చేస్తాయి. అయితే..ఈ రెండింటినీ ఇప్పుడు చెప్పిన పద్ధతిలో వాడితేనే లివర్ క్లీన్ అవుతుంది. ఫ్యాటీ లివర్ తగ్గుతుంది. ముందుగా రెండు అల్లం ముక్కలు తీసుకోవాలి. ఆ తరవాత మూడు లేదా నాలుగు నిమ్మకాయ ముక్కలు తీసుకోవాలి. ఓ లీటర్ నీళ్లు తీసుకుని బాగా మరిగించాలి. అవి మరుగుతుండగానే అల్లం, నిమ్మకాయ ముక్కలు వేయాలి. ఈ రెండింటిలోనూ ఔషధ గుణాలు నీళ్లలోకి చేరుకునేలా మరిగించాలి. ఇలా కాసేపట్లోనే లివర్ డిటాక్స్ డ్రింక్ తయారవుతుంది.

ఎలా తాగాలి

ఇప్పుడు తయారు చేసుకున్న ఈ డ్రింక్ ని ఒకేసారి తాగవచ్చు. కానీ..కాస్తంత ఎక్కువ ప్రయోజనాలు ఉండాలంటే మాత్రం నీళ్లు వేడిగా ఉండే కంటెయినర్ లేదా బాటిల్ లో పోసుకుని ఉంచాలి. ఈ లీటర్ నీటిని రోజంతా వీలైనప్పుడల్లా కొంచెం కొంచెంగా సిప్ చేస్తూ ఉండాలి. టీ తాగినట్టుగా తీసుకుంటే సరిపోతుంది. రోజంతా ఇలా తీసుకోవడం వల్ల అందులో ఉన్న పోషకాలు సరైన విధంగా శరీరానికి అందుతాయి. అయితే..ఈ డ్రింక్ ని కనీసం 15 రోజుల పాటు ఉదయమే పరగడుపున తీసుకుంటే కాస్తంత పాజిటివ్ ఇంపాక్ట్ ఉంటుంది. అంతకు మించి తీసుకుంటే లివర్ సమస్యలు మళ్లీ మళ్లీ రాకుండా ఉంటాయి. అందుకే నెల రోజుల పాటు తీసుకోవాలి. వారానికి నాలుగైదుసార్లు చొప్పున తాగితే ఇబ్బంది ఉండదు.

కొన్ని జాగ్రత్తలు

ఈ డ్రింక్ తో ఎలాంటి ఇబ్బంది ఉండదు. అయితే..ఇప్పటికే గ్యాస్, అసిడిటీతో ఇబ్బంది పడే వారు మాత్రం దీన్ని అవాయిడ్ చేయడమే మంచిది. ఎందుకంటే నిమ్మకాయలో నేచురల్ అసిడిటీ ఉంటుంది. ఇప్పటికే అసిడిటీతో ఉన్న వారు దీన్ని తీసుకోవడం వల్ల సమస్య ఇంకాస్త ఎక్కువవుతుంది. ఇక అల్లం అంటే పడని వారు కూడా ఈ డ్రింక్ ని తాగకూడదు. ఈ చిట్కాతో పాటు రోజూ వంటల్లో కనీసం పావు చెంచా పసుపు తప్పనిసరిగా వాడితే లివర్ కి చాలా మంచిది. తిన్న తరవాత కనీసం పది నిముషాల పాటు వాకింగ్ చేయడం వల్ల కూడా ఫ్యాటీ లివర్ తగ్గే అవకాశం ఉంటుంది.