నార్మల్ డెలివరీలను ప్రోత్సహించేందుకు ప్రత్యేక పథకం

ఆంధ్రప్రదేశ్ ప్రభుత్వం మరో కీలక నిర్ణయం తీసుకుంది. గవర్నమెంట్ ఆస్పత్రులలో సిజేరియన్లను తగ్గించి.. సహజ ప్రసవాలు (నార్మల్ డెలివరీ) పెంచాలనే ఉద్దేశంతో కీలక నిర్ణయం తీసుకుంది. ప్రభుత్వ ఆస్పత్రులలో నార్మల్ డెలివరీలను ప్రోత్సహించేందుకు ఓ ప్రత్యేకమైన పథకం ఏపీ ప్రభుత్వం అమలు చేయనుంది. ఇందులో భాగంగా ప్రభుత్వ ఆస్పత్రులలో ప్రసూతి సేవల కోసం ప్రసూతి సహాయకులను నియమించాలని ఏపీ ప్రభుత్వం నిర్ణయించింది. రాష్ట్రవ్యాప్తంగా ప్రసవాల సంఖ్య అధికంగా ఉండే 86 గవర్నమెంట్ ఆస్పత్రులతో ఈ ప్రసూతి సహాయకులను నియమించనున్నారు.

మరోవైపు ప్రస్తుతం ప్రభుత్వ ఆస్పత్రులలో ప్రసూతి సేవలను స్టాఫ్ నర్సులు అందిస్తున్నారు. అయితే స్టాఫ్ నర్సులకు ప్రసవాలకు సంబంధించిన పూర్తి పరిజ్ఞానం, ట్రైనింగ్ లేదనే ఉద్దేశంతో ఈ ప్రసూతి సహాయకుల ఆలోచనను ఏపీ ప్రభుత్వం చేస్తోంది. ఇందులో భాగంగా కొంతమంది స్టాఫ్ నర్సులను ఎంపిక చేసి.. వారికి 18 నెలల పాటు ట్రైనింగ్ ఇస్తారు. అనంతరం వారిని ప్రసూతి సహాయకులుగా నియమిస్తారు. ప్రసూతి సహాయకుల నియామకంతో సిజేరియన్ (సీ- సెక్షన్) ప్రసవాలు తగ్గుతాయని.. మహిళలు సహజ ప్రసవాల పట్ల మొగ్గు చూపుతారని ప్రభుత్వం భావిస్తోంది.

మరోవైపు ఏపీలో సిజేరియన్ ప్రసవాల రేటు గత కొన్నేళ్లుగా గణనీయంగా పెరిగింది. ప్రపంచ ఆరోగ్య సంస్థ (WHO) సిఫారసుల కంటే ఏపీలో సిజేరియన్ రేటు ఎక్కువగా ఉంది. 2023 NHSR లెక్కల ప్రకారం ఏపీలో సిజేరియన్ డెలివరీల రేటు 65 శాతానికి పైగా ఉంది. మహిళలు సిజేరియన్ వైపు మొగ్గుచూపడానికి కూడా అనేక కారణాలు ఉన్నాయని నిపుణులు చెప్తున్నారు. ప్రైవేట్ ఆస్పత్రుల ఆర్థిక ప్రయోజనాలకు తోడు,, మంచి ముహూర్తంలో బిడ్డకు జన్మనివ్వాలనే కోరికలు, మహిళల భయం, గర్భధారణ సమస్యలు, లేటుగా గర్భం ధరించడం వంటి కారణాలతో సహజ ప్రసవాల కంటే సిజేరియన్ ప్రసవాలే ఎక్కువగా జరుగుతున్నాయి. దీనికి తోడు గ్రామీణ ప్రాంతాల్లో సహజ ప్రసవాల ప్రయోజనాలపై తగినంత అవగాహన లేకపోవటం కూడా కారణం.

మరోవైపు సహజ ప్రసవాలే తల్లి, శిశువు ఆరోగ్య పరంగా అత్యంత శ్రేయస్కరమని ఆరోగ్య రంగ నిపుణులు చెప్తున్నారు. ఈ నేపథ్యంలో ఆంధ్రప్రదేశ్ ప్రభుత్వం ఈ సమస్యను పరిష్కరించేందుకు కృషి చేస్తోంది. అందులో బాగంగా ప్రభుత్వ హాస్పిటల్స్‌లో సాధ్యమైనన్ని సహజ ప్రసవాలు జరిగేలా ప్రోత్సహిస్తోంది.అందులో భాగంగానే ఈ ప్రసూతి సహాయకుల ఆలోచన చేసింది.