ఎటువంటి మందులు వాడకుండానే ఫ్యాటీ లివర్ తగ్గించుకోవచ్చు

ప్రస్తుత కాలంలో ఫ్యాటీ లివర్ కేసులు గణనీయంగా పెరుగుతున్నాయి. ఫ్యాటీ లివర్ ముప్పు తగ్గించుకోకపోతే కాలేయం డ్యామేజ్ అవుతుంది. అయితే, జీవనశైలిలో కొన్ని మార్పులు చేసుకోవడం వల్ల ఫ్యాటీ లివర్ సమస్య తగ్గించుకోవచ్చని నిపుణులు చెబుతున్నారు.

నాన్ - ఆల్కహాలిక్ ఫ్యాటీ లివర్ ముప్పు

నాన్-ఆల్కహాలిక్ ఫ్యాటీ లివర్ డిసీజ్ అనేది ప్రపంచవ్యాప్తంగా విస్తృతంగా వ్యాపించే ఆరోగ్య సమస్యగా మారింది. ఈ సమస్య ప్రపంచవ్యాప్తంగా ప్రతి ముగ్గురిలో ఒకరిని ప్రభావితం చేస్తుంది. అందుబాటులో ఉన్న డేటా ప్రకారం, పురుషులే ఈ పరిస్థితికి ఎక్కువగా గురవుతున్నారు. ఫ్యాటీ లివర్ సమస్యను తగ్గించుకోవడానికి స్థిరమైన జీవనశైలి మార్పులు అవసరమని వైద్యులు నొక్కి చెబుతున్నారు. ఆ మార్పులేంటో తెలుసుకుందాం.

చక్కెరను తగ్గించుకోండి

నేషనల్ లైబ్రరీ ఆఫ్ మెడిసిన్ ప్రకారం.. ఫ్యాటీ లివర్‌ను తిప్పికొట్టాలంటే ఆహారంలో చక్కెర తగ్గించుకోవాలి. ప్రాసెస్ చేసిన చక్కెరకి ఎంత దూరంగా ఉంటే అంత మంచిది. ముఖ్యంగా సోడాలు, పండ్ల రసాల, ప్రాసెస్ చేసిన ఆహారాల్లో కనిపించే ఫ్రక్టోజ్ కాలేయాన్ని తీవ్ర ప్రమాదంలో పడేస్తుంది. ఫ్యాటీ లివర్ సమస్యకు కారణమవుతుంది. అందుకే చక్కెర, ప్రాసెస్ చేసిన చక్కెర ఉన్న ఫుడ్స్‌కి దూరంగా ఉండండి. వీటిని బదులు పండ్లను మితంగా తినాలని నిపుణులు సిఫార్స్ చేస్తున్నారు.

అడపాదడపా ఉపవాసం

అడపాదడపా ఉపవాసం కూడా ఫ్యాటీ లివర్ సమస్యను తగ్గిస్తుంది. ఇలా చేయడం వల్ల శరీరం ఆటోఫాగీని ప్రారంభిస్తుంది. దెబ్బతిన్న కణాల్ని తొలగించి కాలేయ పునరుత్పత్తికి మద్దతు ఇస్తుంది. ప్రతి రోజూ 8-10 గంటల విండోకు ఆహారం తీసుకోవడం పరిమితం చేయడం వల్ల ఇలా జరుగుతుంది. అయితే, ఈ విధానం అందరికీ వర్తించదు. డయాబెటిస్, వివిధ ఆరోగ్య సమస్యలతో బాధపడేవారు వైద్యుణ్ని సంప్రదించి ఈ నిర్ణయం తీసుకోండి.

సరైన కొవ్వులు, ఫైబర్ తీసుకోండి

సంతృప్త కొవ్వులను అంటే ఒమేగా-3 కొవ్వు ఆమ్లాలు, మోనోశాచురేటెడ్ కొవ్వులు వంటి ఆరోగ్యకరమైన ఎంపికలతో భర్తీ చేయడం వల్ల ఇన్సులిన్ సున్నితత్వం మెరుగుపడుతుంది. దీని వల్ల ఫ్యాటీ లివర్ సమస్య తగ్గుతుంది. కొవ్వు చేపలు, ఆలివ్ నూనె, అవకాడోలు, వాల్‌నట్స్, అవిసె గింజలు ఆహారంలో భాగం చేసుకోండి. కూరగాయలు, ఓట్స్, చియా సీడ్స్, చిక్కుళ్లు వంటి ఫైబర్ రిచ్ ఫుడ్స్ తీసుకోవడం వల్ల పేగు ఆరోగ్యం మెరుగుపడుతుంది. కొవ్వు శోషణను తగ్గిస్తుంది.

శారీరక శ్రమకు ప్రాధాన్యత

ఫ్యాటీ లివర్ సమస్య తగ్గించడానికి వ్యాయామం కూడా కీలక పాత్ర పోషిస్తుంది. వాకింగ్,సైక్లింగ్ వంటి ఏరోబిక్ వ్యాయామాలు, వెయిట్ లిఫింగ్ వంటి బరువు వ్యాయామాలు రెండూ కాలేయంలో పేరుకుపోయిన కొవ్వును తగ్గిస్తాయి. వారానికి కనీసం 150 నిమిషాలు అయినా వ్యాయామం చేయాలని నిపుణులు అంటున్నారు. బరువు తగ్గకపోయినా, శారీరక శ్రమ ఇన్సులిన్ పనితీరును మెరుగుపరుస్తుంది. కాలేయంలో కొవ్వు జీవక్రియను ప్రోత్సహిస్తుంది.

బరువు తగ్గడం

ఫ్యాటీ లివర్ సమస్యను తగ్గించుకోవడానికి బరువు తగ్గడం కూడా మంచి వ్యూహం. శరీర బరువులో కేవలం 5–10% తగ్గితే.. ఫ్యాటీ లివర్ సమస్య కూడా తగ్గుతుంది. ఆరోగ్యకరమైన ఆహారం, వ్యాయామాన్ని లైఫ్‌స్టైల్‌లో భాగం చేసుకుని స్థిరంగా బరువు తగ్గడంపై ఫోకస్ పెట్టాలని నిపుణులు సూచిస్తున్నారు.

యాంటీ ఆక్సిడెంట్లు, విటమిన్లు

బాదం, పొద్దుతిరుగుడు విత్తనాల్లో లభించే విటమిన్ E వంటి యాంటీఆక్సిడెంట్లు సెల్యులార్ రక్షణను అందిస్తాయి. మిల్క్ తిస్టిల్, బెర్బెరిన్, రెస్వెరాట్రాల్ వంటి కొన్ని సమ్మేళనాలు అధ్యయనంలో ఉన్నాయి. కానీ ఆధారాలు అసంపూర్ణంగా ఉన్నాయి. అందుకే వీటిని తీసుకోవడం పట్ల అప్రమత్తంగా ఉండాలి.

ఆల్కహాల్ తగ్గించుకోండి

ఆల్కహాల్ సంబంధిత ఫ్యాటీ లివర్ కేసులలో ఆల్కహాల్ వినియోగాన్ని పూర్తిగా నివారించాలి. క్రమం తప్పకుండా తాగడం వల్ల కాలేయం దెబ్బతింటుంది. అందుకే ఆల్కహాల్ తగ్గించడంలో మానుకోవాలని వైద్యులు సిఫార్స్ చేస్తున్నారు. ఫ్యాటీ లివర్ తగ్గించడానికి మందులు ఉన్నప్పటికీ.. స్థిరమైన జీవనశైలి మార్పులు పాటించడం ద్వారా ఫ్యాటీ లివర్ సమస్య తగ్గించుకోవచ్చు.