చరిత్ర సృష్టించిన భారతీయుడు.. బ్రిటిష్ రాయల్ నేవీలో తొలి హిందూ పూజారిగా భాను అత్తి

బ్రిటన్ రాయల్ నేవీ చరిత్రలోనే తొలిసారిగా ఒక హిందూ మత గురువును (చప్లెయిన్‌) నియమించి అందరినీ ఆశ్చర్యంలో ముంచెత్తారు. ఈ చారిత్రక ఘనతను భారత సంతతికి చెందిన భాను అత్తి సాధించారు. ఇండియాలోని హిమాచల్ ప్రదేశ్‌లో జన్మించిన 39 ఏళ్ల భాను అత్తి.. ప్రస్తుతం ఇంగ్లాండ్‌లోని ఎసెక్స్‌లో నివసిస్తున్నారు. ఇటీవల బ్రిటానియా రాయల్ నేవల్ కాలేజ్ నుంచి పట్టా పుచ్చుకున్న ఆయన.. రాయల్ నేవీలో నియమించబడిన తొలి హిందూ చప్లెయిన్‌గా రికార్డు సృష్టించారు. అంతేకాకుండా రాయల్ నేవీలో నియమించబడిన తొలి క్రైస్తవేతర చప్లెయిన్‌ కూడా ఈయనే కావడం విశేషం.

మొత్తంగా 70 మంది సైనికులకు బోధన..

రాయల్ నేవీలో చేరిన 148 మంది కొత్త అధికారుల్లో.. భాను అత్తి ఇద్దరు చప్లెయిన్లలో ఒకరిగా ఉన్నారు. రాయల్ నేవీలోని చప్లెయిన్లు మతంతో సంబంధం లేకుండా సైనికులకు మతపరమైన, ఆధ్యాత్మిక, సంక్షేమ, నైతిక మద్దతును అందిస్తారు. భాను అత్తికి హిందూ పూజారిగా దశాబ్దాల అనుభవం ఉంది. ఆయన ఈ పదవిలో ఉన్న సుమారు 40 మంది హిందూ సైనికులకు, అలాగే మారిటైమ్ రిజర్వ్స్‌లో ఉన్న మరో 30 మంది హిందూ సైనికులకు పూజా కార్యక్రమాలు నిర్వహిస్తారు.

ఈ నియామకానికి ముందు భాను అత్తి 13 వారాల శిక్షణ ఇచ్చారు. అయితే ఇందులో ఆరు వారాలు ఆఫీసర్ బోధన అంటే రాయల్ నేవీ ప్రపంచవ్యాప్త పాత్ర దాని ప్రస్తుత లక్ష్యం, మునిగిపోతున్న ఓడను ఎలా తట్టుకోవాలో నేర్చుకోవడం ఉన్నాయి. ఇక నాలుగు వారాలు సముద్రంలో, మూడు వారాలు సైనిక గురువు పాత్రపై ప్రత్యేక శిక్షను ఇచ్చారు. అయితే 480 ఏళ్ల తర్వాత మొదటి హిందూ చప్లెయిన్‌గా నియమితులైనందుకు తనకు ఎంతో గౌరవంగా, సంతోషంగా ఉందని భాను అత్తి పేర్కొన్నారు. ఈ నియామకం ద్వారా రాయల్ నేవీలో వైవిధ్యం, సమ్మిళితత్వం, ఆధ్యాత్మిక సంరక్షణకు ప్రాధాన్యత లభించిందని చెప్పారు.

బ్రిటన్ రక్షణ మంత్రిత్వ శాఖకు హిందూ సలహాదారు అయిన అనిల్ భానోత్.. భాను అత్తిని ఈ పదవికి ఎంపిక చేయడాన్ని సమర్థించారు. ఈ నియామకం యువతను బ్రిటిష్ సాయుధ దళాలలో చేరడానికి ప్రోత్సహిస్తుందని ఆయన ఆశాభావం వ్యక్తం చేశారు. అలాగే ఇకపై భాను అత్తి హెచ్‌ఎంఎస్ డ్రేక్‌లో విధులు నిర్వహిస్తారన్నారు. డెవన్‌పోర్ట్ నేవల్ బేస్ చుట్టుపక్కల పని చేస్తున్న వేలాది మంది సైనికులకు ఆయన సేవలు అందిస్తారని తెలిపారు.