Gen Z ఉద్యోగ ధోరణి: ఉదయాన చేరి, మధ్యాహ్నాన రిజైన్!

ఢిల్లీ: ఉద్యోగంలో చేరిన మొదటి రోజే... లంచ్ టైమ్‌కే రిజైన్! "ఇలా బతుకుతా కానీ, మీ కంపెనీలో మాత్రం కాదు"ఢిల్లీకి చెందిన ఓ యువకుడు ఒక కార్పొరేట్ స్టార్టప్‌లో ఉద్యోగంలో చేరిన మొదటి రోజే సంచలన నిర్ణయం తీసుకున్నాడు.అతను "నేను బతుకుంటే బలుసాకైనా అమ్ముకుని బతుకుతా... కానీ మీ కంపెనీలో మాత్రం పని చేయను బాబోయ్!" అంటూ లంచ్ టైమ్‌కే ఉద్యోగానికి రాజీనామా చేసి బయటకు వెళ్లిపోయాడు.ఈ ఘటన ప్రస్తుత కార్పొరేట్ రంగంలోని టాక్సిక్ వర్క్ కల్చర్‌కి అద్దంపడుతున్న ఉదాహరణగా మారింది.సంబంధిత ఘటనపై ఓ ట్వీట్ ప్రస్తుతం సోషల్ మీడియాలో వైరల్ అవుతోంది. ఆ ట్వీట్‌ సారాంశం ఇలా ఉంది:"నా స్నేహితుడు ఢిల్లీలోని ఓ స్టార్టప్‌లో చేరాడు. తొలి రోజు లంచ్ టైం వరకు మాత్రమే పని చేశాడు. ఆ తరువాత తన ల్యాప్‌టాప్‌ను డెస్క్ మీదే వదిలేసి, నిశ్శబ్దంగా ఆఫీసు నుండి బయటకి వెళ్లిపోయాడు. కంపెనీ నుంచి చాలాసార్లు ఫోన్లు వచ్చాయి కానీ స్పందించలేదు. చివరికి HR నుంచి కాల్ వచ్చినప్పుడు మాత్రం, 'బతుకుతే బలుసాకైనా అమ్ముకుంటా కానీ మీ కంపెనీలో మాత్రం పని చేయను' అని తేల్చి చెప్పాడు."ఈ ట్వీట్‌కి నెటిజన్ల నుంచి పెద్ద ఎత్తున స్పందన వస్తోంది. చాలామంది ఆ యువకుడి ధైర్యాన్ని ప్రశంసిస్తున్నారు."స్టార్టప్‌ల్లో ఒత్తిడి ఎక్కువగా ఉంటుంది. మానసిక ప్రశాంతత కోల్పోయే స్థాయిలో వాతావరణం ఉంటే, అలాంటి నిర్ణయాలు తీసుకోవడంలో తప్పు లేదు" అంటూ కొంతమంది అభిప్రాయపడ్డారు.మరికొంతమంది "ఇలాంటివి చాలానే చూస్తున్నాం... చాలా మంది ఉద్యోగులు ఇదే ఫీలింగ్‌కు లోనవుతారు కానీ చాలామందికి ఇలా వెంటనే వెళ్లిపోయే ధైర్యం ఉండదు" అని అంటున్నారు.మానసిక నిపుణుల అభిప్రాయం ప్రకారం, ఇది Gen Z వర్క్ కల్చర్‌కు సజీవ ఉదాహరణ.Gen Z తరానికి ఉద్యోగం అంటే కేవలం జీతం కాదు — వర్క్ ప్లేస్ అనుభవం, మానసిక ప్రశాంతత, స్వేచ్ఛ అన్నీ ముఖ్యమే.వాతావరణం నచ్చకపోతే, తట్టుకోకుండా వెంటనే వెళ్లిపోవడమే వాళ్ల ధోరణి. దీన్ని తప్పుగా కాకుండా, వాళ్ల మానసిక ఆరోగ్యాన్ని ప్రాధాన్యతగా చూసే కోణంలో అర్థం చేసుకోవాల్సిన అవసరం ఉందని నిపుణులు చెబుతున్నారు.