ఒక్కసారి దువ్వెన మార్చి చూడండి, హెయిర్ ఫాల్ ఇట్టే ఆగిపోతుంది

జుట్టు రాలకుండా ఉండేందుకు చాలా మంది చాలా రకాలుగా ప్రయత్నాలు చేస్తుంటారు. ఎన్నో ఆయిల్స్, కండీషనర్స్, షాంపూలు వాడుతుంటారు. ఇవన్నీ కొంత వరకూ పని చేస్తుండొచ్చు. కానీ..వాటిలో ఉండే కెమికల్స్ కారణంగా ఎప్పుడో అప్పుడు సైడ్ ఎఫెక్ట్స్ తప్పవు. అయితే..తప్పనిసరి పరిస్థితుల్లో వీటిని వాడాల్సి వచ్చినప్పటికీ కొన్ని రకాల అలవాట్లతో హెయిర్ ఫాల్ సమస్య నుంచి బయటపడవచ్చు అని చెబుతున్నారు బ్యూటీ ఎక్స్ పర్ట్స్. అందులో మొట్టమొదట చెప్పిన చిట్కా ఏంటంటే దువ్వెన మార్చేయడం. అంటే మీరు రెగ్యులర్ గా వాడే ప్లాస్టిక్ దువ్వెనకు బదులుగా చెక్క దువ్వెన వాడాలని సూచిస్తున్నారు. మరి ప్లాస్టిక్ దువ్వెనకి, చెక్క దువ్వెనకి తేడా ఏంటి. హెయిర్ ఫాల్ కి దీనికి అసలు లింక్ ఏంటో చూద్దాం.

దువ్వెన మార్చడం

​హెయిర్ ఫాల్ ఆపడానికి ఏం చేయాలో అర్థం కాక ఆలోచిస్తున్నారా. అయితే..ఇప్పుడు చెప్పే ఒకటే మార్పు చేసుకోండి. జుట్టు రాలిపోవడం ఆగుతుందని చెబుతున్నారు ఎక్స్ పర్ట్స్. అదేంటంటే..ప్లాస్టిక్ దువ్వెనను పక్కన పెట్టడం. అందుకు బదులుగా చెక్కతో తయారు చేసిన దువ్వెన వాడాలని చెబుతున్నారు. ఈ చిన్న మార్పుతోనే ఊహించని ఫలితాలు చూడవచ్చని అంటున్నారు.

నిజానికి ఇది చిన్న మార్పులాగానే కనిపిస్తుంది. కానీ క్రమంగా ఈ అలవాటుతో జుట్టు రాలడం తగ్గిపోతుంది. ప్లాస్టిక్ దువ్వెనతో పోల్చి చూసినప్పుడు చెక్క దువ్వెనలు స్కాల్ప్ ని చాలా సాఫ్ట్ గా ఉంచుతాయి. ముఖ్యంగా జుట్టు రాలడం, చిట్లడం లాంటివి తగ్గుతాయి. అంత కన్నా ముఖ్యమైన విషయం ఏంటంటే..వెంట్రుకలలో ఉండే నేచురల్ ఆయిల్స్ జుట్టు అంతటా వ్యాపింతే విధంగా చేస్తాయి. జుట్టుకి మెరుపుని ఇవ్వడంతో పాటు బలాన్నీ ఇస్తుంది.

మరి కొన్ని ప్రయోజనాలు

జుట్టు పెరిగినప్పుడు ప్లాస్టిక్ దువ్వెనతో దువ్వే సమయంలో వెంట్రుకలు చిక్కుపడతాయి. ఈ కారణంగా కొన్ని రాలిపోతాయి. మరి కొన్ని వెంట్రుకలు మెలికపడి చిట్లిపోతాయి. అదే చెక్క దువ్వెన వాడితే ఈ సమస్యలు తలెత్తవు. చాలా స్మూత్ గా కోంబింగ్ చేసుకోవచ్చు. వెంట్రుకలపై ఎక్కువగా ప్రెజర్ పెట్టకుండానో దువ్వుకునేందుకు వెసులుబాటు ఉంటుంది. వెంట్రుకల చివర్లు చిట్లిపోవడం అనేదే ఉండదు. అంతే కాదు. వెంట్రుకలు రింగులు తిరగడమూ తగ్గుతుంది. ​

చలికాలంలో వెంట్రుకలు కాస్తంత తేమ కారణంగా అతుక్కుపోయినట్టుగా ఉంటాయి. అలాంటప్పుడు చెక్క దువ్వెన వాడితే సులువుగా చిక్కులు వదిలిపోవడంతో పాటు వెంట్రుకలు స్మూత్ గా అవుతాయి. అదే సమయంలో స్కాల్ప్ లో ఉండే నేచురల్ ఆయిల్స్ సరైన విధంగా అన్ని వైపులకూ చేరుకుంటాయి. అదే ప్లాస్టిక్ దువ్వెనతో ఈ వెసులుబాటు ఉండకపోవచ్చు.

తేమను పట్టి ఉంచేందుకు

సాధారణంగా స్కాల్ప్ లో ఉండే నేచురల్ ఆయిల్స్ తగ్గిపోతే జుట్టు పొడిబారుతుంది. ఫలితంగా కుదుళ్లు బలహీనంగా మారిపోయి రాలుతుంటాయి. తేమ తగ్గిపోతే ఇలా జరుగుతుంది. ప్లాస్టిక్ దువ్వెన వాడడం వల్ల ఈ తేమ అంతా తొలగిపోతుంది. అదే చెక్క దువ్వెన అయితే ఈ మాయిశ్చర్ ని అలాగే పట్టి ఉంచుతుంది. ఫలితంగా వెంట్రుకలు దృఢంగా ఉండడంతో పాటు సాఫ్ట్ గా మారిపోతాయి. అంతే కాదు. కురులు చూడడానికి ఆరోగ్యకరంగా కనిపిస్తాయి. ఇక చెక్క దువ్వెన వాడడం వల్ల స్కాల్ప్ కి మసాజ్ చేసినట్టుగా అవుతుంది. అంటే..రక్త ప్రసరణ మెరుగవుతుంది. ఎప్పుడైతే రక్త సరఫరా మెరుగవుతుందో అప్పుడు జుట్టు రాలే సమస్య దాదాపు తగ్గుతుంది. అంతే కాదు. సరైన విధంగా రక్తం ద్వారా జుట్టుకి పోషకాలు అందుతాయి.

వీళ్లు వాడడం మంచిది

రింగుల జుట్టు లేదా ఎక్కువ జుట్టు ఉన్నప్పుడు ప్లాస్టిక్ దువ్వెన కన్నా చెక్క దువ్వెన వాడడం చాలా మంచిది. స్కాల్ప్ చాలా సెన్సిటివ్ గా ఉన్న వారితో పాటు డాండ్రఫ్ తో పాటు ఇతరత్రా సమస్యలు ఉన్న వారు చెక్క దువ్వెనలు వాడాలి. వీటి వల్ల ఇరిటేషన్ చాలా వరకూ తగ్గిపోతుంది. పైగా చెక్క దువ్వెనలో యాంటీ బ్యాక్టీరియల్ గుణాలు ఎక్కువగా ఉంటాయి. ముఖ్యంగా వేప లేదా శాండిల్ వుడ్ తో తయారు చేసిన చెక్కలు యాంటీ ఫంగల్, యాంటీ బ్యాక్టీరియల్ గా పని చేస్తాయి. ఫలితంగా రకరకాల అలెర్జీలు, ఫంగస్ రాకుండా ఇవి కాపాడతాయి. రెగ్యులర్ గా చెక్క దువ్వెన వాడితే డాండ్రఫ్ తో పాటు దురద తగ్గుతుంది. ఇన్ని ప్రయోజాలున్నాయి కాబట్టే ఎక్స్ పర్ట్స్ చెక్క దువ్వెన వాడాలని సూచిస్తున్నారు.

ఇవి గమనించండి

చెక్క దువ్వెనను ఎంపిక చేసుకునేటప్పుడు అది వేప కలపతో తయారు చేసిందా లేదా అన్నది గుర్తించాలి. ఇందులో అయితే యాంటీ బ్యాక్టీరియల్ గుణాలుంటాయి. ఇక వెదురుతో తయారు చేసిందైతే వెంట్రుకలో తేమను పట్టి ఉంచడంలో తోడ్పడుతుంది. మరో ముఖ్యమైన విషయం ఏంటంటే..చెక్క దువ్వెనను రెగ్యులర్ గా శుభ్రం చేసుకోవాలి. వీటిని నీటితో కడగాల్సిన అవసరం లేకపోయినా శుభ్రం చేసుకోవడం మాత్రం తప్పనిసరి. సాఫ్ట్ బ్రష్ లేదా క్లాథ్ తో క్లీన్ చేయాలి. ఎక్కువ సమయం పాటు నీళ్లలో నానబెట్టడం, తరచూ తడపడం లాంటివి మాత్రం చేయకూడదు.