త్రుటిలో ప్రమాదం తప్పించుకున్న స్పైస్జెట్ విమానం
national | Suryaa Desk | Published : Mon, Nov 10, 2025, 04:09 PM
ముంబై నుంచి కోల్కతా వెళ్తున్న స్పైస్జెట్ విమానానికి పెను ప్రమాదం త్రుటిలో తప్పింది. విమానం గాల్లో ఉండగా ఒక ఇంజిన్లో సాంకేతిక సమస్య తలెత్తడంతో కోల్కతా విమానాశ్రయంలో అత్యవసరంగా ల్యాండింగ్ చేశారు. ఈ ఘటనలో ప్రయాణికులు, సిబ్బంది అంతా సురక్షితంగా బయటపడటంతో అధికారులు ఊపిరి పీల్చుకున్నారు.విమానాశ్రయ అధికారుల కథనం ప్రకారం, స్పైస్జెట్కు చెందిన ఎస్జీ 670 విమానం ఆదివారం రాత్రి ముంబై నుంచి కోల్కతాకు బయలుదేరింది. కోల్కతాలోని నేతాజీ సుభాష్ చంద్రబోస్ అంతర్జాతీయ విమానాశ్రయంలో ల్యాండింగ్ కోసం కిందకు దిగుతున్న సమయంలో, విమానంలోని ఒక ఇంజిన్ విఫలమైనట్లు పైలట్లు గుర్తించారు. వెంటనే వారు అప్రమత్తమై ఎయిర్ ట్రాఫిక్ కంట్రోల్ (ఏటీసీ)కు సమాచారం అందించారు.పైలట్ల నుంచి సమాచారం అందగానే విమానాశ్రయ అధికారులు వెంటనే ఫుల్ ఎమర్జెన్సీ ప్రకటించారు. అగ్నిమాపక, సహాయక బృందాలను రన్వే వద్ద సిద్ధంగా ఉంచారు. రాత్రి 11:38 గంటలకు విమానం సురక్షితంగా ల్యాండ్ అయిన తర్వాత ఫుల్ ఎమర్జెన్సీని ఉపసంహరించుకున్నట్లు ఓ అధికారి తెలిపారని ఏఎన్ఐ వార్తా సంస్థ పేర్కొంది. ప్రయాణికులందరినీ సురక్షితంగా విమానం నుంచి కిందకు దించారు.ఈ ఘటనపై స్పైస్జెట్ సంస్థ ఈ ఉదయం ఒక ప్రకటన విడుదల చేసింది. కోల్కతాలో ల్యాండింగ్ సమయంలో తమ విమానంలో సాంకేతిక సమస్య తలెత్తిన మాట వాస్తవమేనని, అయితే విమానం సురక్షితంగా ల్యాండ్ అయిందని తెలిపింది.
|
|