హెచ్ 1బీ వీసాలకు ట్రంప్ మద్దతు ఉంటుంది.. వైట్‌హౌస్ క్లారిటీ

అమెరికా అధ్యక్షుడిగా బాధ్యతలు చేపట్టినప్పటి నుంచి డొనాల్డ్ ట్రంప్ .. అమెరికా మేక్ గ్రేట్ అగైన్ అనే నినాదాన్ని బాగా వినిపిస్తున్నారు. అమెరికాలోని ఉద్యోగాలు.. అమెరికన్లకే దక్కాలని పేర్కొంటూ.. అలాంటి విధానాలనే తీసుకువస్తున్నారు. ఇందులో భాగంగానే హెచ్ 1బీ వీసా విధానాలపై సంచలన నిర్ణయం తీసుకుంటున్నారు. ఈ క్రమంలోనే హెచ్-1బీ వీసా విధానంపై స్పష్టమైన, మధ్యే మార్గ వైఖరిని డొనాల్డ్ ట్రంప్ ప్రదర్శించారు. అమెరికన్ల ఉద్యోగాలకు భద్రత కల్పిస్తూనే.. తయారీ రంగంలో భారీ పెట్టుబడులు పెట్టే విదేశీ సంస్థలకు కొంత కాలం పాటు హెచ్-1బీ వీసాల ద్వారా విదేశీ నైపుణ్యం కలిగిన కార్మికులను ఉపయోగించుకోవడానికి డొనాల్డ్ ట్రంప్ మద్దతు ఇస్తున్నట్లు వైట్‌హౌస్ సోమవారం ప్రకటించింది.

ఈ విషయంపై తాజాగా మీడియాతో మాట్లాడిన వైట్‌హౌస్ ప్రెస్ సెక్రటరీ కరోలిన్ లీవిట్.. హెచ్-1బీ వీసాల విషయంలో అధ్యక్షుడు ట్రంప్ వైఖరి.. కామన్ సెన్స్‌తో కూడుకుందని వివరించారు. అమెరికన్ కార్మికులను తొలగించి.. వారి స్థానంలో ఇతరులను నియమించడాన్ని ట్రంప్ ఎట్టి పరిస్థితుల్లోనూ సమర్థించరని పేర్కొన్నారు. అమెరికన్ తయారీ రంగాన్ని గతంలో కంటే మెరుగ్గా చేయాలని ట్రంప్ కోరుకుంటున్నారని కరోలిన్ లీవిట్ తెలిపారు.

అమెరికాలో ట్రిలియన్ల డాలర్ల పెట్టుబడి పెట్టే విదేశీ కంపెనీలు.. బ్యాటరీల వంటి అధునాతన ఉత్పత్తులను తయారుచేయడానికి ప్లాంట్లను ఏర్పాటు చేసేటప్పుడు.. మొదట్లో వాటిని పూర్తి స్థాయిలో సిద్ధం చేయడానికి తాత్కాలికంగా విదేశీ కార్మికులను తీసుకురావడాన్ని ట్రంప్ సమర్థిస్తారని లీవిట్ స్పష్టం చేశారు. అయితే ఒకసారి ఆ కంపెనీలో ఉత్పత్తి ప్రారంభం అయిన తర్వాత.. ఆయా కంపెనీలు తప్పనిసరిగా అమెరికన్ శ్రామికశక్తిని ఉపయోగించుకోవాలని ట్రంప్ భావిస్తున్నారని పేర్కొన్నారు. అమెరికాలో వ్యాపారం చేయాలనుకుంటే.. అమెరికన్ ప్రజలను నియమించుకోవాలని విదేశీ కంపెనీలకు ట్రంప్ చెప్పినట్లు ఆమె తేల్చి చెప్పారు.

నిజానికి.. ట్రంప్ తన అమెరికా ఫస్ట్ విధానంలో భాగంగా హెచ్-1బీ వీసా వ్యవస్థపై తరచూ విమర్శలు గుప్పించారు. అయితే.. ఇటీవల ఇచ్చిన ఒక ఇంటర్వ్యూలో ఆయన వైఖరిలో కొంత మార్పు కనిపించింది. తమ కంపెనీల్లో విదేశీ నైపుణ్యం కూడా అవసరమని అంగీకరించారు. అమెరికన్ల వద్ద కొన్ని నైపుణ్యాలు లేవని.. వాటిని వారు నేర్చుకోవాలని సూచించారు. నిరుద్యోగ జాబితాలో ఉన్న వారిని తీసుకెళ్లి.. మిసైల్స్ తయారుచేసే కంపెనీలో పని చేయాలని చెప్పలేమని ట్రంప్ స్పష్టం చేశారు. పోటీతత్వంలో నిలబడాలంటే ప్రపంచ ప్రతిభ అవసరమని ఆ సమయంలో ట్రంప్ తేల్చి చెప్పారు.

అయితే.. ఈ హెచ్ 1బీ వీసా కార్యక్రమం దుర్వినియోగం అవుతోందని.. దాన్ని అరికట్టడానికి కొత్త హెచ్-1బీ దరఖాస్తులపై లక్ష డాలర్లు అంటే మన భారత కరెన్సీలో ఏకంగా రూ.88 లక్షల ఫీజుతో సహా కఠినమైన తనిఖీలు ప్రవేశపెట్టనున్నట్లు వైట్‌హౌస్ మరోసారి స్పష్టం చేసింది.