భార్య వైద్యానికి సర్వస్వం ఖర్చు చేసిన 88 ఏళ్ల రిటైర్డ్ ఆర్మీ ఉద్యోగి

అమెరికాలోని మిచిగాన్‌లో నివసిస్తున్న 88 ఏళ్ల ఆర్మీ వెటరన్ ఎడ్ బాంబస్.. తన భార్య వైద్య ఖర్చుల కోసం పెన్షన్‌తో సహా తన పొదుపు మొత్తం ఖర్చు చేశారు. దీంతో తీవ్ర ఆర్థిక ఇబ్బందుల్లో కూరుకుపోయారు. డబ్బులు లేక ఆ వయసులో గత 5 ఏళ్లుగా ఆయన ఒక సూపర్‌మార్కెట్‌లో రోజుకు 8 గంటల చొప్పున పనిచేస్తున్నారు. ఆస్ట్రేలియన్ ఇన్‌ఫ్లుయెన్సర్ శామ్యూల్ వైడెన్‌హోఫర్‌తో.. ఎడ్ బాంబస్ తన కష్టాలను పంచుకున్న వీడియో వైరల్ కావడంతో.. ప్రపంచవ్యాప్తంగా చాలా మంది స్పందించారు. ఈ క్రమంలోనే శామ్యూల్ ప్రారంభించిన గోఫండ్‌మీ పేజీ ద్వారా 1.7 మిలియన్ డాలర్లు అంటే మన భారత కరెన్సీలో ఏకంగా రూ. 15 కోట్లకు పైగా విరాళాలు వచ్చాయి.

ఎడ్ బాంబస్ కథనం ప్రపంచవ్యాప్తంగా లక్షలాది మంది హృదయాలను కదిలించింది. తన భార్య ఆరోగ్యం కోసం ఆ వృద్ధుడు పడుతున్న కష్టాన్ని చూసి చలించిపోయి.. ఆర్థిక సహాయం చేశారు. శామ్యూల్ వైడెన్‌హోఫర్ ఇటీవల ఎడ్ బాంబస్‌ను కలిసి.. ఆయన కష్టాలకు సంబంధించిన వీడియోను ఫేస్‌బుక్‌లో పోస్ట్ చేయగా.. అతి తక్కువ సమయంలోనే కోటికిపైగా వ్యూస్, 3 లక్షల లైక్‌లు వచ్చాయి. దీంతో ఆ వీడియో నెట్టింట తెగ వైరల్‌గా మారడంతో.. వెంటనే ఎడ్ బాంబస్ కోసం ఒక గోఫండ్‌మీ పేజీని శామ్యూల్ సృష్టించారు.

ఎడ్ బాంబస్ దేశం కోసం పోరాటం చేశారని.. ఆయన జీవితమంతా శ్రమించారని.. ఇప్పుడు అందరూ ఆయనకు అండగా నిలబడే వంతు వచ్చిందని శామ్యూల్ తెలిపారు. సైన్యంలో ఆయన చూపించిన ధైర్యం, పెద్దలు, సైనికాధికారులకు గౌరవం ఇవ్వాలని మీరు భావిస్తే.. దయచేసి సహాయం చేయండి అంటూ పేర్కొన్నారు. ఈ గోఫండ్‌మీ ద్వారా సేకరించే ప్రతి డాలర్.. బాంబస్ జీవన ఖర్చులు, ఆయన భార్య వైద్య సంరక్షణ, జీవితంలో ఆనందాన్ని ఇచ్చే చిన్న చిన్న వాటికి ఉపయోగపడుతుందని శామ్యూల్ ఆ గోఫండ్‌మీ పేజీలో రాసుకొచ్చారు.

ప్రపంచవ్యాప్తంగా వచ్చిన విరాళాల కారణంగా.. కేవలం కొద్ది కాలంలోనే రూ. 15 కోట్లకు పైగా డబ్బులు సేకరించారు. ఈ అసాధారణ మద్దతు ఫలితంగా.. ఆ రిటైర్డ్ ఆర్మీ వృద్ధుడు.. ప్రస్తుతం సూపర్‌మార్కెట్‌లో చేసే పని వదిలేసి.. తన జీవిత చరమాంకంలో దక్కాల్సిన గౌరవప్రదమైన, ప్రశాంతమైన జీవితాన్ని ఆస్వాదించగలుగుతున్నారు.