ముచ్చటగా మూడోసారి ట్రంప్ కుమారుడి నిశ్చితార్థం

అగ్రరాజ్యం అమెరికా అధ్యక్షుడు డొనాల్డ్ ట్రంప్ కుమారుడు డొనాల్డ్ ట్రంప్ జూనియర్ తన వ్యక్తిగత జీవితంలో కొత్త అధ్యాయాన్ని ప్రారంభించారు. తన ప్రియురాలు, మోడల్, సామాజికవేత్త అయిన బెట్టినా ఆండర్సన్‌తో నిశ్చితార్థం చేసుకున్నట్లు ఆయన అధికారికంగా ప్రకటించారు. ఇప్పటికే రెండు సార్లు నిశ్చితార్థం చేసుకున్న ఈయనకు ఇది మూడో నిశ్చితార్థం కావడం గమనార్హం. అయితే ఈ శుభవార్తను ట్రంప్ జూనియర్ వైట్‌హౌస్‌లో నిర్వహించిన ప్రీ-క్రిస్మస్ వేడుకల సందర్భంగా తెలియజేశారు. ఈ వేడుకలో అమెరికా అధ్యక్షుడు ట్రంప్‌తో పాటు అనేక మంది ప్రభుత్వ అధికారులు, ప్రముఖ రాజకీయ నాయకులు పాల్గొన్నారు. ట్రంప్ కుటుంబానికి క్రిస్మస్ పండుగ సందర్భంగా ఈ నిశ్చితార్థం ఒక తీపి కబురుగా మారింది.

ట్రంప్ జూనియర్ గతంలో కూడా వివాహ జీవితాన్ని అనుభవించారు. 2005లో తొలిసారి ట్రంప్ జూనియర్ పెళ్లి చేసుకున్నారు. వెనెసా అనే అమ్మాయితో ఈయన వివాహం జరగ్గా.. 13 ఏళ్ల పాటు సంతోషంగా గడిపారు. వీరి అన్యోన్య దాంపత్యానికి ప్రతీకలుగా మొత్తంగా ఐదుగురు పిల్లలు జన్మించారు. కానీ భార్యాభర్తల ఇద్దరి మధ్యా గొడవలు రావడంతో.. 2018లో విడాకులు తీసుకున్నారు. అప్పటి నుంచి ఎవరి జీవితంలో వారు ముందుకు సాగుతున్నారు. భార్యతో విడిపోయిన రెండేళ్లకే ట్రంప్ జూనియర్ మరో అమ్మాయితో ప్రేమలో పడ్డారు. ముఖ్యంగా ఫాక్స్‌న్యూస్ మాజీ హోస్ట్ కింబర్లీతో కొన్నాళ్లు డేటింగ్ చేసి ఆపై పెళ్లి చేసుకోవాలని నిర్ణయించుకున్నారు.

ఈక్రమంలోనే 2020లో ఆమెతో నిశ్చితార్థం చేసుకున్నారు. కానీ ఆ తర్వాత వీరిద్దరి మధ్య మనస్పర్థలు వచ్చాయి. దీంతో ఇద్దరూ ఒకరికొకరు బ్రేకప్ చెప్పేసుకుని.. నిశ్చితార్థాన్ని రద్దు చేసుకున్నారు. ఆ తర్వాత కొంత కాలానికే ట్రంప్ జూనియర్.. మరో అమ్మాయితో ప్రేమలో పడిపోయారు. ముఖ్యంగా మోడల్, సామాజికవేత్త అయిన బెట్టినా ఆండర్సన్‌తో ఈయన డేటింగ్ చేశారు. ఇందుకు సంబంధించి అనేక వార్తలు వచ్చాయి. వీరిద్దరూ కలిసి ఉన్న ఫొటోలు కూడా సోషల్ మీడియాలో వైరల్ అయ్యాయి. ఈక్రమంలోనే వీరిద్దరూ పెళ్లి చేసుకుంటారనే ఊహాగానాలు వ్యక్తం అయ్యాయి.

బెట్టినా, ట్రంప్ జూనియర్ ఇటీవలే భారత దేశంలోనూ కలిసి కనిపించారు. ఉదయ్‌పూర్‌లో జరిగిన ఎన్ఆర్ఐ బిలియనీర్ రామలింగరాజు మంతెన కుమార్తె నేత్ర వివాహ వేడుకకు వీరు ఇద్దరూ కలిసి హాజరై సందడి చేశారు. తాజాగా వైట్‌హౌస్ వేదికగా వీరిద్దరి నిశ్చితార్థం అధికారికంగా ప్రకటించడంతో.. ట్రంప్ కుటుంబంలో పెళ్లి సందడి మొదలైనట్లు తెలుస్తోంది. ఈ కొత్త బంధం అమెరికన్ రాజకీయ వర్గాలలో మరియు ట్రంప్ అభిమానులలో చర్చనీయాంశంగా మారింది.