రూ.3 లక్షల జీతంతో ప్రభుత్వ ఉద్యోగం,,,,నితీష్ కుమార్‌ హిజాబ్ లాగిన మహిళకు జార్ఖండ్ సర్కార్ బంపరాఫర్

ఇటీవల జరిగిన ఒక కార్యక్రమంలో.. బిహార్ సీఎం నితీష్ కుమార్ ఒక మహిళ హిజాబ్‌ను తొలగించిన వీడియో వైరల్ కావడం.. దేశవ్యాప్తంగా పెను దుమారం రేపిన సంగతి తెలిసిందే. ఈ వివాదం కొనసాగుతుండగానే.. ఆమెకు జార్ఖండ్ ప్రభుత్వం నుంచి అనూహ్యమైన ఆఫర్ లభించింది. బిహార్‌లో కేవలం రూ.32 వేల నెల జీతం పొందుతున్న ఆమెకు.. జార్ఖండ్ ప్రభుత్వం ఏకంగా రూ.3 లక్షల జీతం, కోరుకున్న చోట పోస్టింగ్, ప్రభుత్వ వసతి కల్పిస్తామని బంపర్ ఆఫర్ ఇచ్చింది. మరోవైపు.. ఆమెకు ఇచ్చిన గడువు పూర్తి కావాల్సి ఉండటంతో సర్వత్రా ఉత్కంఠ నెలకొంది.

పాట్నా సదర్ పరిధిలోని సబల్‌పూర్ ప్రాథమిక ఆరోగ్య కేంద్రంలో డాక్టర్ నుస్రత్ పర్వీన్ శనివారం (డిసెంబర్ 20) సాయంత్రం 6 గంటల లోపు విధుల్లో చేరాల్సి ఉంది. అంతకంటే ముందు ఆమె మొదట సివిల్ సర్జన్ కార్యాలయంలో మెడికల్ పరీక్షలు చేయించుకుని.. ఆపై డాక్యుమెంట్ వెరిఫికేషన్ పూర్తి చేసుకోవాల్సి ఉంటుంది. శనివారం మధ్యాహ్నం 2 గంటల వరకు ఆమె ఇంకా తనకు రిపోర్ట్ చేయలేదని సివిల్ సర్జన్ అవినాష్ కుమార్ సింగ్ తెలిపారు. 6 గంటల గడువు దాటితే ఆమెకు విధుల్లో చేరే అవకాశం ఉంటుందో లేదో జార్ఖండ్ ప్రభుత్వం నిర్ణయిస్తుంది.

డాక్టర్ నుస్రత్ పర్వీన్‌కు జరిగిన అవమానాన్ని నిరసిస్తూ జార్ఖండ్ ఆరోగ్య శాఖ మంత్రి డాక్టర్ ఇర్ఫాన్ అన్సారీ ఆమెకు భారీ ఆఫర్ ప్రకటించారు. నెలకు రూ.32 వేలు జీతం తీసుకుంటున్న ఆమెకు.. రూ.3 లక్షలు ఇస్తామని జార్ఖండ్ ప్రభుత్వం తెలిపింది. అంతేకాకుండా రాష్ట్రంలో ఎక్కడ కావాలంటే ఆమెకు పోస్టింగ్ ఇస్తామని వెల్లడించింది. అదనంగా ప్రభుత్వ గృహ వసతి, భద్రత కల్పిస్తామని తేల్చి చెప్పింది.

మరోవైపు.. ఈ ఘటన రాజకీయ రంగు పులుముకుంది. ఆర్జేడీ ఎమ్మెల్యే ఒకరు.. డాక్టర్ నుస్రత్‌ పర్వీన్‌ను తమ పార్టీలో చేరాలని ఆహ్వానం పలికారు. నితీష్ కుమార్ చేసిన పని.. ముస్లిం మహిళల గౌరవానికి భంగం కలిగించేలా ఉందని ఆయన తీవ్ర విమర్శలు గుప్పించారు. ఈ ఘటనపై స్పందించిన బీఎస్పీ అధినేత్రి మాయావతి.. ఈ ఘటనపై నితీష్ కుమార్ విచారం వ్యక్తం చేయాలని డిమాండ్ చేశారు. ఇటీవల ఈనెల 15వ తేదీన నియామక పత్రాల పంపిణీ కార్యక్రమంలో.. డాక్టర్ నుస్రత్ పర్వీన్ తల మీద ఉన్న హిజాబ్ గురించి ప్రశ్నించి.. స్వయంగా దాన్ని తొలగించారని సోషల్ మీడియాలో వీడియోలు వైరల్ అయ్యాయి.