వీడియో సోషల్ మీడియాలో పెట్టిన యువతి.. వ్యక్తి ఆత్మహత్య

కేరళలో సోషల్ మీడియా వేదికగా జరిగిన ఓ వ్యక్తిత్వ హననం ఒక నిండు ప్రాణాన్ని బలితీసుకుంది. బస్సులో వేధింపులకు పాల్పడ్డాడంటూ ఒక యువతి చేసిన వీడియో తీసి.. దాన్ని సోషల్ మీడియాలో పోస్ట్ చేసి.. ఆరోపించడంతో ఆ వీడియో విపరీతంగా వైరల్ అయింది. అది కాస్తా ఆ వ్యక్తిని తీవ్ర మనస్తాపానికి గురయ్యేలా చేసింది. దీంతో 40 ఏళ్ల వ్యక్తి ఆత్మహత్య చేసుకోవడం ఇప్పుడు తీవ్ర కలకలం రేపింది. అయితే అతడు చేసిన తప్పేమీ లేదని.. ఆ యువతి సోషల్ మీడియాలో వైరల్ కావాలనే.. ఇలాంటి తప్పుడు ఆరోపణలు చేస్తోందని.. అతడి కుటుంబ సభ్యులు పేర్కొంటున్నారు.

కేరళలోని కోజికోడ్ జిల్లా గోవిందపురం ప్రాంతానికి చెందిన 40 ఏళ్ల వ్యక్తి ఆదివారం తెల్లవారుజామున తన నివాసంలో ఉరివేసుకుని ఆత్మహత్య చేసుకున్నాడు. పయ్యన్నూర్ రైల్వే స్టేషన్ నుంచి బస్టాండ్‌కు.. బస్సులో ప్రయాణిస్తుండగా.. ఆ వ్యక్తి తనను ఉద్దేశపూర్వకంగా తాకుతూ లైంగికంగా వేధించాడని ఒక మహిళ సోషల్ మీడియాలో వీడియో పోస్ట్ చేసింది.

ఆ మహిళ సోషల్ మీడియాలో వీడియోను పోస్ట్ చేసిన కొద్దిసేపట్లోనే తెగ వైరల్ అయింది. ఆ వీడియోకు సుమారు 20 లక్షల వ్యూస్ సాధించింది. దీంతో నెటిజన్లు ఆ వ్యక్తిని టార్గెట్ చేస్తూ.. సోషల్ మీడియాలో తీవ్ర స్థాయిలో ట్రోలింగ్ చేయడం ప్రారంభించారు. శుక్రవారం కన్నూర్‌కు పని మీద వెళ్లిన సమయంలో ఈ ఘటన జరిగినట్లు తెలుస్తోంది. ఇక ఆ వీడియో వైరల్ కావడంతో సమాజంలో తన పరువు పోయిందని.. సోషల్ మీడియాలో తన క్యారెక్టర్‌ను దారుణంగా దిగజార్చుతున్నారని ఆ వ్యక్తి తీవ్ర మనస్తాపానికి గురైనట్లు బంధువులు తెలిపారు.

కేవలం ఆన్‌లైన్ పబ్లిసిటీ కోసమే ఆ మహిళ ఈ వీడియో సృష్టించిందని ఆ వ్యక్తి కుటుంబ సభ్యులు ఆరోపిస్తున్నారు. అతను ఎలాంటి వివాదాల్లోకి వెళ్లే వ్యక్తి కాదని.. అసత్య ఆరోపణల వల్ల వచ్చిన తీవ్రమైన సైబర్ దాడులను భరించలేకే ఈ నిర్ణయం తీసుకున్నాడని వారు పోలీసులకు ఫిర్యాదు చేశారు. మరోవైపు.. ఆ వీడియో పోస్ట్ చేసిన యువతిపై కూడా ప్రస్తుతం ఆన్‌లైన్ దాడులు జరుగుతున్నట్లు సమాచారం.

పోలీసుల దర్యాప్తు

ఈ ఘటనపై అనుమానాస్పద మృతిగా కేసు నమోదు చేసిన కోజికోడ్ మెడికల్ కాలేజీ పోలీసులు.. సోషల్ మీడియా కంటెంట్, అది వైరల్ అయిన తీరు, మృతికి దారితీసిన పరిస్థితులను అన్ని కోణాల్లోనూ దర్యాప్తు చేస్తున్నట్లు తెలిపారు. ఒక చిన్న వీడియో ఒక వ్యక్తి జీవితాన్ని ఎలా చిన్నాభిన్నం చేస్తుందనే దానికి ఈ ఘటన నిదర్శనంగా నిలిచింది.