'నా భార్య మంచిది కాదు'.. అఖిలేశ్ యాదవ్ తమ్ముడు సంచలన పోస్ట్..

సమాజ్ వాదీ పార్టీ వ్యవస్థాపకుడు ములాయం సింగ్ యాదవ్ కుటుంబంలో వివాదం చెలరేగింది. ములాయం కుమారుడు ప్రతీక్ యాదవ్.. ఆయన భార్య అపర్ణ బిస్త్ యాదవ్‌పై సంచలన ఆరోపణలు చేశారు. ఆమె తనను.. తన కుటుంబం నుంచి వేరు చేసిందని చెప్పారు. త్వరలో కోర్టును ఆశ్రయించి.. విడాకులు తీసుకుంటానని తెలిపారు. ఈ మేరకు సోషల్ మీడియాలో సుదీర్ఘ పోస్టు రాసుకొచ్చారు. కాగా, ప్రస్తుతం భారతీయ జనతా పార్టీ (బీజేపీ)లో ఉన్న అపర్ణ.. యూపీ మహిళా కమిషన్ వైస్ చైర్‌పర్సన్‌గా పని చేస్తున్నారు.

ఇన్‌స్టాగ్రామ్‌లో పెట్టిన సుదీర్ఘ పోస్టులో.. తన భార్యను 'కుటుంబాన్ని విచ్ఛిన్నం చేసే వ్యక్తి'గా అభివర్ణించారు ప్రతీక్ యాదవ్. ఆమె చాలా స్వార్థపరురాలు అని అన్నారు. అంతేకాకుండా అపర్ణ యాదవ్ కేవలం ఫేమ్ పొందడం, పలుకుబడిపై దృష్టి పెడుతుందని.. ఇతరులను పట్టించుకోదని ఆరోపణలు గుప్పించారు ప్రతీక్ యాదవ్.

ఆమెతో నా పెళ్లి జరగడం.. దురదృష్టకరం..

"ఈ స్వార్థపరురాలికి (అపర్ణ బిస్త్ యాదవ్‌ను ఉద్దేశిస్తూ).. నేను వీలైనంత త్వరగా విడాకులు ఇవ్వాలనుకుంటున్నాను. ఆమె నాకు.. నా కుటుంబ సభ్యులతో ఉన్న బంధాలను నాశనం చేసింది. ఆమెకు కావలసిందల్లా ఫేమ్, పలుకుబడి సంపాదించడం మాత్రమే. ప్రస్తుతం నేను దారుణమైన మానసిక స్థితిలో ఉన్నాను. కానీ ఆమె నా గురించి పట్టించుకోవడం లేదు. ఎందుకంటే ఆమె తన గురించి మాత్రమే ఆలోచిస్తుంది. ఇంత చెడ్డ మనసున్న వ్యక్తిని నేను ఎప్పుడూ చూడలేదు. అలాంటి మహిళను పెళ్లి చేసుకున్నందుకు నేను దురదృష్టవంతుడిని" అని ప్రతీక్ యాదవ్ ఘాటు వ్యాఖ్యలు చేశారు. కాగా, ప్రతీక్ యాదవ్ చేసిన ఈ పోస్ట్ సోషల్ మీడియాలో వైరల్ అయ్యింది. ఉత్తర్‌ప్రదేశ్ రాజకీయ వర్గాల్లో ఇప్పుడిది హాట్ టాపిక్‌గా మారింది.

కాగా, ప్రతీక్ యాదవ్.. ములాయం సింగ్ యాదవ్ రెండో భార్య సాధనా యాదవ్ కుమారుడు. ఉత్తరప్రదేశ్ మాజీ ముఖ్యమంత్రి అఖిలేష్ యాదవ్‌.. ములాయం సింగ్ యాదవ్ మొదటి భార్య కుమారుడు. ప్రతీక్.. అఖిలేశ్ యాదవ్‌కు తమ్ముడు అవుతాడు. కాగా, ప్రతీక్, అపర్ణ బిస్త్ వివాహాం 2011లో జరిగింది. అపర్ణ యాదవ్ 2017 ఉత్తరప్రదేశ్ అసెంబ్లీ ఎన్నికల్లో లక్నో కంటోన్మెంట్ నియోజకవర్గం నుంచి సమాజ్ వాదీ టికెట్‌పై పోటీ చేసి.. కాంగ్రెస్ అభ్యర్థి రీటా బహుగుణ జోషి చేతిలో ఓడిపోయారు. అనంతరం మార్చి 2022లో బీజేపీలో చేరి పార్టీ తరపున చురుకుగా ప్రచారం చేశారు. సెప్టెంబర్ 2024లో ఆమె రాష్ట్ర మహిళా కమిషన్ ఉపాధ్యక్షురాలిగా నియమితులయ్యారు.