హంగేరీ ప్రధానిపై జెలెన్‌స్కీ సంచలన వ్యాఖ్యలు!

రష్యా-ఉక్రెయిన్ యుద్ధం నాలుగో ఏట అడుగు పెడుతున్నా.. శాంతి దిశగా అడుగులు పడటం లేదు సరికదా దేశాధినేతల మధ్య మాటల యుద్ధం శృతిమించుతోంది. రష్యా అధ్యక్షుడు పుతిన్‌కు అత్యంత సన్నిహితుడిగా పేరొందిన హంగేరీ ప్రధాని విక్టర్ ఓర్బన్‌పై ఉక్రెయిన్ అధ్యక్షుడు వోలోడిమిర్ జెలెన్‌స్కీ సంచలన వ్యాఖ్యలు చేశారు. ఓర్బన్ బాధ్యతారాహిత్యంగా వ్యవహరిస్తున్నారని మండిపడుతూ.. ఆయన్ను వ్యక్తిగతంగా దూషించడం ఇప్పుడు అంతర్జాతీయ దౌత్య వర్గాల్లో హాట్ టాపిక్‌గా మారింది. ముఖ్యంగా హంగేరి ప్రధాని సైన్యాన్ని పెంచడానికి బదులుగా పొట్టను మాత్రమే పెంచుతున్నారన్నారు.

సైన్యాన్ని పెంచాల్సింది పోయి..

ఐరోపా దేశాల రక్షణను పణంగా పెట్టి ఓర్బన్ తన దేశీయ రాజకీయాలకే ప్రాధాన్యత ఇస్తున్నారని జెలెన్‌స్కీ ధ్వజమెత్తారు. "ఒకవైపు ఉక్రెయిన్ ప్రాణాలొడ్డి రష్యాను అడ్డుకుంటుంటే.. పొరుగున ఉన్న హంగేరీ మాత్రం సహాయం చేయడానికి నిరాకరిస్తోంది. విక్టర్ ఓర్బన్ తన దేశ సైనిక సామర్థ్యాన్ని పెంచుకోవాల్సింది పోయి.. తన పొట్టను పెంచుకుంటున్నారంటూ ఎద్దేవా చేశారు. రష్యా ట్యాంకులు మళ్లీ బుడాపెస్ట్ వీధుల్లోకి రాకుండా ఉండాలంటే ఐరోపా దేశాలన్నీ ఐక్యంగా ఉండాలని.. కానీ ఓర్బన్ మాత్రం పుతిన్ ప్రయోజనాల కోసం పాకులాడుతున్నారని జెలెన్‌స్కీ ఆగ్రహం వ్యక్తం చేశారు.

యుద్ధం మొదలైనప్పటి నుంచి హంగ్రీ తీరు ఉక్రెయిన్‌కు మింగుడుపడటం లేదు. రష్యాపై యూరోపియన్ యూనియన్ విధించిన ఆంక్షలను ఓర్బన్ పలుమార్లు అడ్డుకున్నారు. కీవ్‌కు ఆయుధాలు, నిధులు అందకుండా అడ్డుతగలడమే కాకుండా పుతిన్‌తో తన స్నేహాన్ని బహిరంగంగానే కొనసాగిస్తున్నారు. దీనివల్ల ఉక్రెయిన్ ఆత్మరక్షణలో ఇబ్బందులు ఎదుర్కొంటోంది.

శాంతి స్థాపన కోసం ఇటీవల అబుదాబి వేదికగా రెండో విడత చర్చలు జరిగాయి. ఈ భేటీలో అమెరికా ప్రతినిధి స్టీవ్ విట్కాఫ్, డొనాల్డ్ ట్రంప్ అల్లుడు జేర్డ్ కుష్నర్ వంటి ప్రముఖులు పాల్గొన్నప్పటికీ ఎటువంటి పురోగతి లభించలేదు. దీనికి ప్రధాన కారణం ఇరుపక్షాల మొండి వైఖరే. ఉక్రెయిన్‌లోని కీలక ప్రాంతమైన డాన్‌బాస్ నుంచి ఉక్రెయిన్ సైన్యం పూర్తిగా వైదొలగాలని రష్యా పట్టుబడుతోంది. తమ సార్వభౌమాధికారాన్ని వదులుకోవడానికి ఉక్రెయిన్ ససేమిరా అంటోంది. రష్యా తన భూభాగం నుండి వెళ్లిపోతేనే యుద్ధ విరమణ సాధ్యమని స్పష్టం చేస్తోంది. ఈ పరిణామాల నేపథ్యంలో.. ఐరోపా దేశాలు తమ రక్షణ ఉత్పత్తులను వేగవంతం చేయాలని, మాస్కోపై మరింత ఒత్తిడి తీసుకురావాలని జెలెన్‌స్కీ విజ్ఞప్తి చేశారు. లేదంటే రష్యా దాడులు మరింత ఉధృతమయ్యే ప్రమాదం ఉందని హెచ్చరించారు.