'షర్టులు విప్పి నిరసన చేయడం దేశానికే అవమానం': యూత్ కాంగ్రెస్‌ తీరుపై అఖిలేష్ యాదవ్ ఫైర్

దేశ రాజధానిలోని భారత్ మండపంలో జరిగిన 'ఏఐ ఇంపాక్ట్ సమ్మిట్' వేదికగా యూత్ కాంగ్రెస్ కార్యకర్తలు చేపట్టిన వినూత్న నిరసన ఇప్పుడు రాజకీయంగా పెను దుమారం రేపుతోంది. విదేశీ ప్రతినిధులు, అంతర్జాతీయ దిగ్గజాలు ఉన్న వేదికపై కాంగ్రెస్ కార్యకర్తలు చొక్కాలు విప్పి నిరసన తెలపడంపై మిత్రపక్షమైన సమాజ్‌వాదీ పార్టీ కూడా అసహనం వ్యక్తం చేసింది. ఈ చర్య దేశానికి అవమానకరం అని ఎస్పీ అధినేత అఖిలేష్ యాదవ్ వ్యాఖ్యానించడం చర్చనీయాంశంగా మారింది.

విదేశీ ప్రతినిధుల ముందు ఇది తగదు: అఖిలేష్

ఝాన్సీలో పర్యటిస్తున్న అఖిలేష్ యాదవ్ మీడియాతో మాట్లాడుతూ కాంగ్రెస్ తీరును తప్పుబట్టారు. "మనకు అంతర్గతంగా ఎన్ని విభేదాలు ఉన్నా, బీజేపీ అబద్ధాలు చెబుతుందని దేశం మొత్తానికి తెలిసినా.. విదేశీ ప్రతినిధులు ఉన్న వేదికపై ఇలాంటి చర్యలకు పాల్పడకూడదు. ఇది మన దేశ గౌరవాన్ని అంతర్జాతీయ స్థాయిలో దిగజార్చేలా ఉంది" అని ఆయన హితవు పలికారు. ప్రధాని మోదీని టార్గెట్ చేస్తూ యూత్ కాంగ్రెస్ చేసిన ఈ పని వల్ల దేశానికే తలవంపులు వచ్చాయని ఆయన అభిప్రాయపడ్డారు.

ఈ నిరసనపై బీజేపీ ఎంపీ అనురాగ్ ఠాకూర్ తీవ్రంగా స్పందించారు. రాహుల్ గాంధీ, యూత్ కాంగ్రెస్ "భారత వ్యతిరేక" శక్తులుగా మారాయని ఆయన ఆరోపించారు. మోదీని వ్యతిరేకించే క్రమంలో వీరు దేశాన్ని అంతర్జాతీయ వేదికలపై కించపరుస్తున్నారని ధ్వజమెత్తారు. బీజేపీ విమర్శలను కర్ణాటక మంత్రులు ప్రియాంక్ ఖర్గే, ఈశ్వర ఖండ్రే తిప్పికొట్టారు. నిరసన తెలపడం ప్రజల ప్రాథమిక హక్కు అని, సదస్సులో చైనా ఉత్పత్తుల ప్రదర్శన గురించి బీజేపీ సమాధానం చెప్పాలని వారు డిమాండ్ చేశారు.

ఈ ఘటనకు సంబంధించి అరెస్టయిన నలుగురు యూత్ కాంగ్రెస్ కార్యకర్తలకు ఢిల్లీలోని పాటియాలా హౌస్ కోర్టు గట్టి షాక్ ఇచ్చింది. వారి బెయిల్ దరఖాస్తులను తిరస్కరించిన కోర్టు.. ఐదు రోజుల పాటు పోలీస్ కస్టడీకి పంపింది. ఒక అంతర్జాతీయ సదస్సులో ప్రజాస్వామ్య నిబంధనలను ఉల్లంఘించడంపై కోర్టు సీరియస్ అయినట్లు సమాచారం. ప్రస్తుతం ఈ అంశంపై దేశవ్యాప్తంగా నిరసనలు మిన్నంటుతున్నాయి. ఇండోర్, పుదుచ్చేరి వంటి నగరాల్లో బీజేపీ-కాంగ్రెస్ కార్యకర్తల మధ్య ఘర్షణలు చోటుచేసుకోవడంతో ఉద్రిక్తత నెలకొంది.