ద్వారక రివ్యూ

చిత్రం పేరు: ద్వారక

తారాగణం : విజయ్ దేవరకొండ, పూజా జవేరి, ప్రకాశ్‌రాజ్ మురళీ శర్మ పృథ్వీరాజ్‌ తదితరులు 

సంగీతం : సాయి కార్తీక్

దర్శకత్వం : శ్రీనివాస్ రవీంద్ర

నిర్మాత : సూపర్ గుడ్ ఫిలింస్, లెజెండ్ సినిమా

విడుదల తేదీ: 03-03-2017

స్టోరీ :గురుమూర్తి ( 30 ఇయర్స్ పృథ్వీ) హోమాలు పూజలు చేయించే ఆధ్యాత్మిక గురువు. తన శిష్యుడు నష్టాల్లో ఉండటంతో తనను ఆదుకోవడానికి ఓ మహాపురుషుడు వస్తాడని అతని రాకతో నీ జీవితం మారిపోతుందని చెప్తాడు. ఎర్ర శీను (విజయ్ దేవరకొండ) తన స్నేహితులతో కలిసి చిల్లర దొంగతనాలు చేస్తుంటాడు. అయితే ఈ సారి ఇలాంటి చిన్న దొంగతనం కాదు ఒకే సారి లైఫ్ సెటిల్ అయ్యే పని చేయాలని ఓ గుళ్లో దేవుడి విగ్రహాన్ని దొంగతనం చేయాలని ప్లాన్ చేస్తాడు. ఆ ప్రయత్నంలోనే హీరోయిన్ ను చూసి ఆగిపోతాడు. ఈ లోగా జనాలు వెంటపడటంతో పారి పోయే ప్రయత్నంలో గురుమూర్తి శిష్యుడి అపార్ట్మెంట్ లో దాక్కుంటాడు. ఎర్ర శీనును చూడగానే కోర్టు లో ఉన్న స్థలం సమస్య తీరిపోవటంతో అతనే తనను ఆదుకోవడానికి వచ్చిన దేవుడని ఫిక్స్ అయిపోతాడు గురుమూర్తి శిష్యుడు. ఎర్ర శీనును కృష్ణానంద స్వామి అంటూ అక్కడే ఆశ్రమం కట్టేస్తారు.

కృష్ణానందస్వామి మహిమల గురించి విని జనం తండోపతండాలుగా వచ్చేస్తుంటారు, ఈ విషయం తెలిసిన క్రిమినల్ లాయర్ రవి( కాలకేయ ప్రభాకర్) కృష్ణానంద స్వామిని అడ్డం పెట్టుకొని కోట్లు సంపాదించాలని నిర్ణయించుకుంటాడు. ఎర్ర శీను గతం గురించి అందరికీ చెప్తానంటూ బెదిరించి, కృష్ణానందగా ఎర్ర శీనుకు మరింత పబ్లిసిటీ తీసుకువచ్చి ట్రస్ట్ పేరుతో కోట్ల రూపాయలు కూడబెడతాడు. ఈ గొడవ లను తప్పించుకోవాలని ప్రయత్నించిన ఎర్రశీను తను గుళ్లో చూసిన అమ్మాయి ఆశ్రమంలో కనిపించటంతో అక్కడే ఉండిపోతాడు. అదే సమయంలో దొంగ బాబాల ఆటకట్టించే హేతువాది చైతన్య( మురళీ శర్మ) దృష్టి కృష్ణానంద స్వామి మీద పడుతుంది. ఎలాగైన కృష్ణనంద ముసుగు వెనక ఉన్న రహస్యం కనిపెట్టాలని ఆశ్రమంలో చేరుతాడు. దొంగ శీను.. బాబాగా మారే క్రమం.. బాబాగా చేసే విన్యాసాలు.. మూఢ భక్తి.. మీడియా చేసే హంగామా.. వీటితో కూడిన సన్నివేశాలతో సినిమా హుషారుగా సాగుతుంది. బాబా గుట్టురట్టు చేయడానికి వచ్చిన మురళీశర్మ ఎంట్రీతో కథ మరింతగా రక్తికడుతుంది. కథానాయకుడు దొరికిపోతాడా.. లేదా? అనే ఆసక్తిని ప్రేక్షకులకు కలిగించడంలో దర్శకుడు సఫలం అయ్యారు. కథలో కొత్తదనం లేకపోయినా.. ట్రీట్‌మెంట్‌తో సినిమాని ముందుకు నడిపించారు.

నటీనటులు :‘పెళ్లిచూపులు’ తర్వాత విజయ్‌ దేవరకొండ నుంచి వచ్చిన సినిమా ఇది. విజయ్ దేవరకొండ మరోసారి మంచి నటన కనబరిచాడు. తన అనుభవానికి మించిన పాత్రే అయినా.. పాత్రకు తగ్గట్టు హుషారుగా నటించారు. హీరోయిన్ పూజా జవేరి పాత్రకు అంతగా స్కోప్‌ లేదు. కానీ  ఉన్నంతలో పరవాలేదనిపించింది. మురళీ శర్మ తన నటనతో మరోసారి ఆకట్టుకున్నారు. గురుమూర్తి పాత్రలో పృథ్వీ నవ్వులు పూయించాడు. అనవసరపు పంచ్ డైలాగ్ లకు పోకుండా హెల్దీ కామెడీతో మెప్పించాడు. ప్రకాశ్‌రాజ్‌ పాత్ర నిడివి తక్కువే అయినా ఆ పాత్రను కథలో కీలకం చేసుకున్నారు దర్శకుడు. పూర్తి స్థాయి విలన్ గా నటించిన కాలకేయ ప్రభాకర్ తన పరిథి మేరకు బాగానే నటించాడు.ముఖ్యంగా ప్రీ క్లైమాక్స్ లో వచ్చే సన్నివేశాల్లో మురళీ శర్మ నటన సినిమా స్థాయిని పెంచింది.

సాంకేతిక నిపుణులు :ప్రజల నమ్మకాలను ఎలా వ్యాపారంగా మారుస్తున్నారో చూపిస్తూ దర్శకుడు శ్రీనివాస్ రవీంద్ర రాసుకున్న కథ చాలా బాగుంది. రెండున్నర గంటలకు సరిపడా కథ వస్తువును తయారు చేసుకోవటంలో ఫెయిల్ అయిన దర్శకుడు తొలి భాగం అంతా అనవసరపు సన్నివేశాలతో బోర్ కొట్టించాడు. అయితే సినిమా స్లో అయినప్పుడు కామెడీతో కవర్ చేసిన దర్శకుడు మంచి మార్కులు సాధించాడు. ప్రతీ నాయక పాత్రను మరింత బలంగా చూపించి ఉంటే బాగుండనిపించింది. ముఖ్యంగా క్లైమాక్స్ సీన్స్ లో క్లారిటీ మిస్ అయ్యింది. సాయి కార్తీక్ అందించిన సంగీతం బాగుంది. పాటలు విజువల్ గా బాగున్నాయి. నేపథ్య సంగీతంతో మరోసారి తన మార్క్ చూపించాడు సాయి కార్తీక్. సినిమాటోగ్రఫి, ఎడిటింగ్, నిర్మాణ విలువలు సినిమా స్థాయికి తగ్గట్టుగా ఉన్నాయి.

ప్లస్ పాయింట్స్ :

విజయ్‌ దేవరకొండ 

దొంగబాబా లీలలు

కామెడీ

మురళీ శర్మ క్యారెక్టర్

ప్రీ క్లైమాక్స్

మైనస్ పాయింట్స్ :

స్లో నారేషన్

క్లైమాక్స్ సీన్స్

 కామెడీ ప్రియులకు ద్వారకా ఓ మంచి వినోదం ఇచ్చే సినిమా