అబార్షన్ మాత్రల వాడకంపై ద్వంద్వ తీర్పు

గర్బవిచ్ఛిత్తి ఔషధాల విషయంలో టెక్సాస్, వాషింగ్టన్‌ ఫెడరల్ న్యాయమూర్తులు శుక్రవారం ద్వంద్వ తీర్పులను వెలువరించారు. దీంతో, గర్భస్రావం, గర్భస్రావానికి వినియోగించే ఔషధంపై అమెరికాలో జరుగుతోన్న న్యాయ పోరాటం మరో మలుపు తిరిగింది. గతేడాది అబార్షన్ హక్కును రద్దుచేసిన అమెరికా సుప్రీంకోర్టు.. గర్భవిచ్ఛిత్తిని నిషేధించే విషయంలో రాష్ట్రాలు స్వయంగా నిర్ణయం తీసుకోవచ్చని స్పష్టం చేసిన విషయం తెలిసిందే. ఈ నేపథ్యంలో అప్పటి నుంచి ఈ అంశంపై న్యాయ పోరాటం జరుగుతోంది. తాజాగా, రెండు ఫెడరల్ కోర్టుల విరుద్దమైన తీర్పులకు అబార్షన్ పిల్‌ కేంద్ర బిందువుగా మారింది.

శుక్రవారం ఉదయం టెక్సాస్‌లోని ఫెడరల్ న్యాయమూర్తి అబార్షన్ పిల్‌కు ఫుడ్ అండ్ డ్రగ్ అడ్మినిస్ట్రేషన్ ఆమోదాన్ని నిలిపివేస్తూ ఆదేశాలు వెలువరించారు. దీనిపై న్యాయ శాఖకు అప్పీల్ చేయడానికి ఏడు రోజుల గడువు ఇచ్చారు. ఈ తీర్పు వెలువడిన కొద్ది గంటలకే వాషింగ్టన్ ఫెడరల్ న్యాయమూర్తి నాటకీయంగా ఎఫ్‌డీఏ తప్పనిసరిగా అబార్షన్ పిల్‌ను కనీసం 12 రాష్ట్రాల్లో అందుబాటులో ఉంచాలని పేర్కొవడం గమనార్హం.

గట్‌మాచర్ ఇన్‌స్టిట్యూట్ ప్రకారం.. 2020లో యునైటెడ్ స్టేట్స్‌లోని పునరుత్పత్తి ఆరోగ్య పరిశోధన, విధాన సంస్థ ద్వారా నమోదు చేసిన 930,160 అబార్షన్‌లలో 53 శాతం అంటే సగానికి పైగా పిల్‌ను వినియోగించారు. ఈ ఉపయోగం 2008లో 17 శాతం ఉండగా.. 2017 నాటికి 39 శాతానికి చేరింది. ఇటీవలి సంవత్సరాలలో అమెరికాలో ఔషధ గర్భవిచ్ఛిత్తిగా పేర్కొనే కేసుల సంఖ్య నాటకీయంగా పెరిగినప్పటికీ అనేక ఐరోపా దేశాల మాదిరిగా ప్రబలంగా లేదు. ఉదాహరణకు ఫ్రాన్స్‌లో 2020 ఏడాదిలో జరిగిన మొత్తం గర్భస్రావాలలో ఔషధ గర్భస్రావాలు 70 శాతంగా ఉన్నాయి.

లైంగిక చర్యల్లో పాల్గొన్న తర్వాత గర్బాన్ని నిరోధించేందుకు వేసుకునే ‘మార్నింగ్ ఆఫ్టర్’ మాత్రకు భిన్నంగా ఈ అబార్షన్ పిల్ ఉంటుంది. ఒక మహిళ తాను గర్భవతి అని నిర్ధారించిన తర్వాత అబార్షన్‌ను ప్రేరేపించడానికి వీటిని తీసుకుంటారు. వాస్తవానికి ఒకటి కంటే ఎక్కువ మాత్రలు ఉంటాయి. మొదటిది ఆర్ యూ 486గా పిలిచే మిఫెప్రిస్టోన్.. మహిళల్లో ప్రొజెస్టెరాన్ హార్మోన్ ఉత్పత్తిని నిరోధించడం ద్వారా గర్భం రాకుండా చేస్తుంది. మరొకటి మిసోప్రోస్టోల్.. 48 గంటల తర్వాత తీసుకుంటారు. వైద్యుడి పర్యవేక్షణ లేకుండానే ఈ అబార్షన్ మాత్రలు ఇంట్లో ఉపయోగించవచ్చు.

అమెరికా ఫుడ్ అండ్ డ్రగ్ అడ్మినిస్ట్రేషన్ 2000లో మిఫెప్రిస్టోన్, మిసోప్రోస్టోల్‌లకు ఆమోదం తెలిపింది. గర్భం దాల్చిన 10 వారాల వరకు వీటి వినియోగానికి అనుమతించింది. ఆ తర్వాత వాక్యూమ్ ఆస్పిరేషన్ వంటి మరొక పద్ధతిలో అబార్షన్ చేయించుకోవలసి ఉంటుంది. ఈ ఔషధం సగటు ధర 580 డాలర్లు. అయితే, 800 డాలర్ల వరకు ఉంటుంది.

నిర్ధిష్ట వ్యవధిలో అబార్షన్ మాత్రను ఉపయోగించడం సురక్షితమైంది, ప్రభావవంతమైనదిగా పరిగణించబడింది. అధ్యయనాల ప్రకారం.. ఈ మాత్రలను ఉపయోగించిన 95 శాతం కంటే ఎక్కువ కేసులలో గర్భవిచ్చిత్తి విజయవంతంగా జరిగింది. అధిక రక్తస్రావం, జ్వరం, ఇన్ఫెక్షన్ లేదా అలెర్జీ వంటి దుష్ర్పభావాలు చాలా అరుదు.