దళితజాతిని జగన్ కాళ్లవద్ద తాకట్టుపెట్టారు...ఆదిమూలపు సురేష్ పై జవహర్ ధ్వజం

రాష్ట్ర మున్సిపల్ శాఖ మంత్రి ఆదిమూలపు సురేష్ తండ్రి దళితుల ఆత్మగౌరవం కోసం గుర్రాలపై తిరిగితే.. నేడు కొడుకు దళితుల ఆత్మగౌరవాన్ని ముఖ్యమంత్రి వైఎస్ జగన్మోహన్ రెడ్డికి తాకట్టుపెట్టడానికి బట్టలిప్పి తిరిగారని తెలుగు దేశం పార్టీ సీనియర్ నేత, మాజీ మంత్రి కేఎస్ జవహర్ విమర్శలు గుప్పించారు. నడిరోడ్డుపై బట్టలు విప్పేసిన సురేష్ తన చర్యతో దళితజాతిని జగన్ కాళ్లవద్ద తాకట్టుపెట్టారని ఆరోపించారు. తన తప్పును ఒప్పుకొని సురేష్ తక్షణమే దళితులకు క్షమాపణ చెప్పాలని డిమాండ్ చేశారు.

ఆదాయానికి మించిన ఆస్తుల కేసులో మంత్రి సురేష్ ఏ1 నిందితుడిగా ఉంటే, ఆయన భార్య ఏ2గా ఉన్నారని జవహర్ అన్నారు. ఆ కేసుని చూపి భయపెట్టే సీఎం జగన్ శుక్రవారం ఆదిమూలపు సురేష్‌తో అర్థనగ్న ప్రదర్శనలు చేయించారని వ్యాఖ్యానించారు. బట్టలు లేకుండా నడివీధుల్లో తిరిగిన సురేష్.. తన చర్యతో దళితుల ఆత్మగౌరవాన్ని అపహాస్యం చేశారని పేర్కొన్నారు. సురేష్ చొక్కాలు విప్పడానికి కారణం జగన్ అంటే భయమా.. లేక తన ఆస్తులపైకి సీబీఐ వస్తుందన్న భయమా? అని ఆయన ప్రశ్నించారు.

ఆదిములపు సురేష్‌ సీఎం జగన్‌కు విశ్వాసపాత్రుడు తప్ప మాదిగలకు కాదని జవహర్ అన్నారు. జగన్ ప్రభుత్వంలో విచ్చలవిడిగా సాగుతున్న ఇసుక మాఫియాపై ప్రశ్నించిన వరప్రసాద్‌ అనే యువకుడికి శిరోముండనం జరిగినప్పుడు సురేష్ చొక్కా విప్పితే దళితజాతి హర్షించేదన్నారు. డాక్టర్ సుధాకర్ మొదలు డాక్టర్ అచ్చెన్న వరకు ఎందరో దళితుల్ని జగన్ బలి తీసుకున్నప్పుడు సురేష్ నోరు ఎత్తి ఉంటే దళితులు గర్వంగా ఫీలయ్యేవారని చెప్పుకొచ్చారు.

దళిత మహిళల మానాలు, ప్రాణాలు జగన్ ప్రభుత్వంలో బలైపోతున్నప్పుడు, మంత్రి హోదాలో ఆదిమూలపు సురేష్ ముఖ్యమంత్రి జగన్మోహన్ రెడ్డిని ప్రశ్నించి ఉంటే, దళితజాతి రొమ్మువిరిచేదని జవహర్ పేర్కొన్నారు. ఆదిమూలపు సురేష్ చర్యలు మాదిగ జాతికి తలవంపులు తెస్తున్నాయని జవహర్ అన్నారు. అసలు సురేష్ ఏనాడైనా దళితుల గురించి పోరాడాడా? అని ప్రశ్నించారు. రాష్ట్రంలో దళితులపై దాడులు జరుగుతుంటే కనీసం పట్టించుకోని సురేష్‌కు దళితుల గురించి మాట్లాడే అర్హత లేదన్నారు. అర్ధ నగ్న ప్రదర్శన చేయాల్సంది తాడేపల్లి ప్యాలెస్ ముందు అని జవహర్ పేర్కొన్నారు. బెస్ట్ అవైలబుల్ స్కూల్ పథకం పోయినపుడు చొక్కా విప్పితే బాగుండేదన్నారు. దుర్గి, నెల్లూరు లిడ్ కాప్ భూములు అన్యక్రాంతం అయినప్పుడు సురేష్ ఎక్కడున్నాడని జవహర్ ప్రశ్నించారు. మలుపు, ముందడుగు పథకాలు కనుమరుగైనపుడు ఏమయ్యారని నిలదీశారు.

‘‘వరప్రసాద్‌ను శిరోముండనం చేసినప్పుడు ఆదిమూలపు సురేష్ ఏ కలుగులో దక్కున్నారు? నీ ప్రాంతంలో దళితులకు నీవేం చేశావో చెప్పాలి. దళిత బాంధవుడు చంద్రబాబుని అనే అర్హత నీకు లేదు. డాక్టర్ సుధాకర్ మరణం, సుబ్రహ్మణ్యం మరణం నీకు కనిపించ లేదా? సురేష్ జాతి ద్రోహి దళితులకు చేసిందేమి లేదు. సురేష్ చర్యలను ప్రతి దళితుడు వ్యతిరేకించాలి’’ అని జవహర్ పేర్కొన్నారు.