ట్రంప్ ఆరోపణలను ఖండించిన ఒబామా
Andhra Pradesh Telugu | Suryaa Desk | Published : Tue, Mar 07, 2017, 07:56 AM
అమెరికా అధ్యక్ష ఎన్నికల సమయంలో అప్పటి అధ్యక్షుడు బరాక్ ఒబామా తన ఫోన్లను ట్యాప్ చేసినట్లు డొనాల్డ్ ట్రంప్ ఆరోపించడం ప్రకంపనలు సృష్టిస్తోంది. అయితే ప్రస్తుత అధ్యక్షుడు డొనాల్డ్ ట్రంప్ ఫోన్ ట్యాప్ ఆరోపణలను ఫెడరల్ బ్యూరో ఇన్వేస్టిగేషన్-ఎఫ్బీఐ డైరెక్టర్ జేమ్స్ కోమి ఖండించారు. ఈ ఆరోపణలను తిరస్కరించాలని ఆయన అమెరికా జస్టిస్ డిపార్ట్మెంట్ను కోరారు. ఇది ఎఫ్బీఐ చట్టాన్ని అతిక్రమించిందనే తప్పుడు సంకేతాలను ఇస్తుందని కోమి చెప్పారు. అయితే జేమ్స్ కోమి అభ్యర్థనపై అమెరికా జస్టిస్ డిపార్ట్మెంట్ ఎటువంటి ప్రకటన విడుదల చేయలేదు.బరాక్ ఒబామా ఆదేశాలతో గత ఏడాది ట్రంప్ టవర్స్ సమీపంలోని అన్ని ఫోన్లను ఎఫ్బీఐ ట్యాప్ చేసిందని ఆరోపించిన ట్రంప్.. వాటి ఆధారాలపై మాత్రం నోరుమెదపటంలేదు. దీనికి సంబంధించి ట్రంప్.. ఇప్పటి వరకు ఎటువంటి ఆధారాలను సమర్పించలేదు. కానీ ఒబామా సర్కారు అధికార దుర్వినియోగానికి పాల్పడిందేమోనన్న విషయాన్ని తేల్చాలని అమెరికా కాంగ్రెస్ను కోరారు. ట్రంప్ ఫోన్ల ట్యాపింగ్ ఉద్దేశపూర్వకంగా జరిగినవేనని శ్వేతసౌధ ప్రతినిధి సియాన్ స్పైసర్ అన్నారు. 2016 ఎన్నికల్లో రాజకీయ ప్రభావిత దర్యాప్తులపై పరిశీలన చేస్తున్నామన్నారు. మరోపక్క 2016 ఎన్నికల్లో ఉద్దేశపూర్వకంగా రాజకీయ పార్టీలపై, వ్యక్తులపై నిఘాపెట్టిందేమో అన్న అంశంపై దర్యాప్తు చేస్తామని హౌస్ ఇంటెలిజెన్స్ కమిటీ ఛైర్మన్ డెవిన్ తెలిపారు.
|
|