జమ్మూ కాశ్మీర్‌కు పాక్‌కు సంబంధం లేదు.. బ్రిటన్ పార్లమెంట్‌లో పీఓకే ప్రొఫెసర్ స్పష్టం

జమ్మూ కాశ్మీర్, పాక్ ఆక్రమిత కాశ్మీర్, పాకిస్థాన్‌లలో పరిస్థితులు.. ఆ ప్రాంతాల్లో పాక్ చేస్తున్న దురాగతాలని బ్రిటన్ పార్లమెంటు సాక్షిగా పాక్ ఆక్రమిత కాశ్మీర్‌లోని ఓ ప్రొఫెసర్ అంతర్జాతీయ సమాజానికి వెల్లడించారు. అసలు జమ్మూ కాశ్మీర్ వివాదంలో పాకిస్థాన్‌కు ఏ మాత్రం సంబంధం లేదని పీఓకేలోని ఓ రాజకీయ వేత్త, ప్రొఫెసర్ సజ్జాద్ రజా పేర్కొన్నారు. జమ్మూ కాశ్మీర్ భారత్‌లో అంతర్భాగమై 76 ఏళ్లు పూర్తయిన సందర్భంగా జమ్మూ కాశ్మీర్ దినోత్సవాన్ని పురస్కరించుకుని బ్రిటన్ పార్లమెంటులో ఈ కార్యక్రమాన్ని నిర్వహించారు. బ్రిటిష్ ఎంపీ బాబ్ బ్లాక్‌మన్ ఈ కార్యక్రమాన్ని ఏర్పాటు చేశారు. ఆర్టికల్ 370 రద్దు తర్వాత జమ్మూ కాశ్మీర్‌లో ఉన్న పరిస్థితులను బ్రిటీష్ ఎంపీ థెరిసా విలియర్స్ ప్రశంసించారు. ఈ సందర్భంగా సీమాంత ఉగ్రవాదాన్ని ప్రొత్సహించవద్దని పాకిస్తాన్‌కు బాబ్ బ్లాక్‌మన్ హితవు పలికారు. జమ్మూ కాశ్మీర్‌లోని కాశ్మీరీ పండిట్ల సమస్యకు రాజకీయ సంకల్పం లేకపోవడమే కారణం అని గౌతమ్ సేన్ మాట్లాడారు. అందుకు ఓటు బ్యాంకు రాజకీయాలే కారణమని తీవ్ర ఆరోపణలు చేశారు.

అయితే ఈ సమయంలోనే జమ్మూ కాశ్మీర్ వివాదం గురించి ప్రొఫెసర్ సజ్జాద్ రజా స్పందించారు. అసలు జమ్మూ కాశ్మీర్ వివాదానికి పాకిస్తాన్‌కు సంబంధమే లేదని పేర్కొన్నారు. ఈ వివాదంలో పాక్ చట్టబద్ధమైన పార్టీనే కాదని సజ్జాద్ రజా తెలిపారు. ఇక పాక్ ఆక్రమిత కాశ్మీర్‌లో ఉన్న ప్రజల్ని పాకిస్తాన్ జంతువుల్లా చూస్తోందని తీవ్ర ఆగ్రహం వ్యక్తం చేశారు. జమ్మూ కాశ్మీర్ ప్రజలకు కూడా సౌకర్యాలను పొందే హక్కు ఉందని సజ్జాద్ రజా అన్నారు. కొంతమంది బ్రిటీష్ ఎంపీలతో సహా పలువురు అతిథులు ఆర్టికల్ 370 తర్వాత కాశ్మీరీ పండిట్ల పోరాటాలు, జమ్మూ కాశ్మీర్ పురోగతిపై చర్చించారు. 1947 అక్టోబర్ 26 వ తేదీన జమ్మూ కాశ్మీర్ భారత్‌లో చేరింది. దీంతో 76 ఏళ్లు పూర్తయిన సందర్భంగా ఈ కార్యక్రమాన్ని జరిపారు. పీఓకేలో నేషన్ ఈక్వాలిటీ పార్టీకి చెందిన సజ్జాద్ రజా.. జమ్మూ కాశ్మీర్ వివాదంలో రెండు పార్టీలు మాత్రమే ఉన్నాయని.. అందులో ఒకటి భారత్ కాగా.. రెండోది జమ్మూ కాశ్మీర్ అని తెలిపారు. ఈ రెండు పార్టీలకు కాకుండా పాకిస్థాన్‌కు ఎలాంటి ప్రమేయం లేదని స్పష్టం చేశారు.

1947 లో బ్రిటీష్ ప్రభుత్వం చేసిన తప్పులకు పాకిస్తాన్ ఆక్రమిత కాశ్మీర్‌లోని ప్రజలు ఇప్పటికీ ఇబ్బందులు పడుతున్నారని తెలిపారు. ఎలాంటి హక్కులు లేకుండా బతకాల్సి వస్తోందని సజ్జాద్ రజా తీవ్ర ఆవేదన వ్యక్తం చేశారు. చేతిలో తుపాకీ పట్టుకుని ఈ గదిలో తాను ప్రవేశిస్తే తనను తరిమేయాలని భావిస్తారా లేక చట్టబద్ద పార్టీగా గుర్తిస్తారా..? అంటూ పాకిస్తాన్‌ను ఉద్దేశించి పరోక్షంగా ప్రశ్నలు గుప్పించారు. పాక్ ఆక్రమిత కాశ్మీర్‌లోని ప్రజలు ప్రాథమిక హక్కుల కోసం పాకిస్తాన్‌ను ఎదురించాలని పిలుపునిచ్చారు. తమను జంతువులుగా చూడకూడదని.. తాము కూడా మనుషులమే కదా అని పేర్కొన్నారు. శాంతియుతంగా జీవించడానికి.. ఆధునిక సౌకర్యాలను ఆస్వాదించడానికి తమకు కూడా అన్ని హక్కులు ఉంటాయని తెలిపారు. భారత్-పాక్ విభజన సమయంలో హిందువులు, సిక్కులపై జరిగిన దురాగతాలను కూడా ఆయన ప్రస్తావించారు.