మిచింగ్ తుఫాను .. సహాయం కోసం సంప్రదించాల్సిన హెల్ప్‌లైన్ నెంబర్లు ఇవే

పశ్చిమ మధ్య బంగాళాఖాతంలో ఏర్పడిన మిచౌంగ్ తుఫాను తీవ్రరూపం దాల్చింది. ప్రస్తుతం కోస్తాంధ్ర తీరానికి ఆనుకొని కదులుతున్న ఈ తుఫాను.. మంగళవారం ఉదయం మచిలీపట్నం-బాపట్ల మధ్య నిజాంపట్నానికి సమీపంలో తీరం దాటనుందని భారత వాతావరణ విభాగం (ఐఎండీ) వెల్లడించింది. ప్రస్తుతం గంటలకు 14 కి.మీ. వేగంతో కదులుతున్న మిచౌంగ్ తీరం దాటే సమయంలో 110 కి.మీ. వేగంతో భారీ ఈదురుగాలులు వీచే అవకాశం ఉందని హెచ్చరించింది. తీరం దాటేంత వరకూ తీరప్రాంతానికి సమాంతరంగా సముద్రంలో కదులుతుందని పేర్కొంది.

ప్రస్తుతం చెన్నైకి 90 కి.మీ., నెల్లూరుకు 120 కి.మీ., మచిలీపట్నం, బాపట్ల తీరాలకు 300 కి.మీ. దూరంలో కేంద్రీకృతమైంది. తీవ్ర తుఫానుగా తీరం దాటిన తర్వాత బలహీనపడి తుఫానుగా మారుతుంది. తీరాన్ని దాటిన అనంతరం తెనాలి, విజయవాడ మీదుగా కదిలి.. మంగళవారం అర్ధరాత్రికి మరింత బలహీనపడి వాయుగుండంగా మారే సూచనలు ఉన్నాయని చెప్పింది. ఇది కోస్తాంధ్ర తీరానికి అత్యంత చేరువగా వస్తుందని, ఇది రాయలసీమ, కోస్తాంధ్ర జిల్లాల్లో భారీ వర్షాలు, గాలులతో విరుచుకుపడే అవకాశం ఉందని తెలిపింది.

తుఫాను నేపథ్యంలో ఏపీ ప్రభుత్వం అప్రమత్తమైంది. తుఫాను సహాయకచర్యలపై వేగంగా స్పందించేందుకు గుంటూరు, బాపట్ల కలెక్టరేట్‌లలో కంట్రోల్ రూమ్‌లను ప్రభుత్వం ఏర్పాటుచేసింది. గుంటూరు 0863 22340414, బాపట్ల 8712655881, ఒంగోలు 08592 280306, కాకినాడ 0884 2374227, తెనాలి 08644 227600, గూడూరు 08624 250795, ఏలూరు 08812 232267, బాపట్ల 08643 22178, భీమవరం 08816 230098, నెల్లూరు 0861 2345863, విజయవాడ 0866 2571244 నెంబర్లు ఫోన్ చేసి సహాయం పొందొచ్చని తెలిపింది. తుఫాను ప్రభావిత జిల్లాలకు ప్రత్యేకాధికారులను నియమించింది.. బాపట్ల – కాటమనేని భాస్కర్‌, అంబేద్కర్‌ కోనసీమ – జయలక్ష్మి, తూర్పుగోదావరి – వివేక్‌ యాదవ్‌, కాకినాడ – యువరాజ్‌,ప్రకాశం – ప్రద్యుమ్న, ఎస్‌పిఎస్‌ నెల్లూరు – హరికిరణ్‌, తిరుపతి – జె.శ్యామలరావు, వెస్ట్‌ గోదావరి – కన్నబాబులకు బాధ్యతలను అప్పగించింది.