నకిలీ టోల్‌గేట్ ఏర్పాటు చేసి రూ.కోట్లు స్వాహా

మనం సాధారణంగా హైవేలపై వెళ్తున్నపుడు టోల్‌గేట్‌లు కనిపిస్తూనే ఉంటాయి. అయితే ఆ రోడ్లను కొన్ని ప్రైవేటు సంస్థలు వేసి.. ఆ తర్వాత టోల్‌గేట్లు ఏర్పాటు చేసి వాహనదారుల నుంచి డబ్బులు వసూలు చేస్తూ ఉంటాయి. అందుకు ప్రభుత్వం అనుమతులు కూడా ఇస్తుంది. అయితే దీన్ని ఆసరాగా చేసుకుని ఓ ముఠా భారీ స్కెచ్ వేసింది. రోడ్డు మార్గం సరిగా లేని ప్రాంతంలో రోడ్డు వేసి.. ప్రభుత్వాలకు తెలియకుండా అక్కడ ఒక టోల్‌గేట్ ఏర్పాటు చేసుకుని మరీ డబ్బులు వసూలు చేస్తున్నారు. అయితే కొందరికి అనుమానం వచ్చి ఆరా తీయగా అసలు విషయం వెలుగులోకి వచ్చింది. అసలు దానికి ప్రభుత్వ అనుమతులు లేవని అక్రమంగా టోల్ గేట్ ఏర్పాటు చేసి డబ్బులు తీసుకుంటున్నారని గుర్తించారు. ఈ ఘటన సంచలనంగా మారింది.

గుజరాత్ రాష్ట్రంలో ఈ వింత సంఘటన చోటు చేసుకుంది. అయితే ఆ నిందితులు ఈ టోల్ గేట్‌ను ఏడాదిన్నర కాలంగా నడుపుతుండటం గమనార్హం. ఈ 18 నెలల్లో ఆ టోల్‌గేట్ ద్వారా ఆ రోడ్డుపై ప్రయాణించే వాహనదారుల నుంచి ఏకంగా రూ. 80 కోట్లు వసూలు చేసినట్లు అధికారులు గుర్తించారు. గుజరాత్ మోర్బి జిల్లా వంకనేర్ ప్రాంతంలో వెలిసిన ఈ నకిలీ టోల్ బూత్ ప్రస్తుతం సంచలనంగా మారింది. అయితే ఈ టోల్‌గేట్ ఏర్పాటుకు ముందు ఆ ప్రాంతంలో సరైన రోడ్డు వసతి లేదని స్థానికులు చెబుతున్నారు. ఈ క్రమంలోనే కొంతమంది సభ్యులు కలిసి ఒక ముఠాగా ఏర్పడి రోడ్డు వేశారు. తమ వద్ద ఉన్న డబ్బులు వెచ్చించి కొత్త రోడ్డు పోసి అక్కడే ఒక టోల్ బూత్‌ను ఏర్పాటు చేశారు. ఆ రోడ్డుపై ఉన్న ఓ మూతపడిన సిరామిక్ ఫ్యాక్టరీని అడ్డాగా చేసుకుని.. మోర్బి - వాంకనేర్ గ్రామాల మధ్య బమన్ బోర్ కచ్ ప్రాంతంలో ఈ టోల్ బూత్‌ను ఏర్పాటు చేశారు.

ఇక ఆ రోడ్డుపై ప్రయాణించే వాహనదారుల నుంచి రూ. 20 - రూ.200 వరకు వసూలు చేసే వారు. కార్లకు రూ.100, లారీలకు రూ. 200 చొప్పున డబ్బులు వసూలు చేసేవారు. అయితే రోడ్డుపై టోల్ గేట్ ఏర్పాటు చేయడంతో దానికి ప్రభుత్వాల నుంచి అనుమతి ఉందని భావించిన వాహనదారులు డబ్బులు చెల్లించి టోల్ గేట్ దాటేవారు. ఆ టోల్ గేట్‌ వద్ద డిజిటల్ పేమెంట్స్ గానీ ఫాస్టాగ్ వంటి సౌకర్యాలు లేవు. నేరుగా డబ్బులు చెల్లించడం లేదా క్యూఆర్ కోడ్ స్కాన్ చేసి పేమెంట్లు చేయడానికి మాత్రమే అనుమతినిచ్చేవారు. ఫాస్టాగ్ లేదా అని ఎవరైనా ప్రశ్నిస్తే ఆ రోడ్డు స్టేట్ హైవేకు అనుబంధంగా ఉన్న రహదారి అని.. నేషనల్ హైవే కాదని సమాధానం ఇచ్చేవారు.

ఇలా గత 18 నెలలుగా సుమారు రూ. 80 కోట్లు ఈ టోల్‌గేట్ ద్వారా ఆ ముఠా సంపాదించినట్లు అధికారులు గుర్తించారు. అయితే ఆ రోడ్డుపై కొందరు ఉన్నతస్థాయి ప్రభుత్వ ఉద్యోగులు, కాంట్రాక్టర్లు వెళ్లినపుడు వారికి అనుమానం వచ్చింది. దీంతో ఈ విషయాన్ని మోర్బి జిల్లా కలెక్టర్ పాండ్యాకు ఫిర్యాదు చేయడంతో దర్యాప్తు చేశారు. ఈ విచారణలో అసలు విషయం వెలుగులోకి వచ్చింది. అసలు ఆ టోల్ గేట్ అక్రమంగా నిర్మించారని గుర్తించారు. ఈ ఘటన వెనుక ఐదుగురు వ్యక్తుల ప్రమేయం ఉందని గుర్తించి.. వారిని అరెస్ట్ చేశారు. నిందితుల్లో ఒకరు రిటైర్డ్ ఆర్మీ ఉద్యోగి ఉండటం గమనార్హం. మిగతా నలుగురు నిందితులు అమర్షి పటేల్, రవిరాజ్‌సింగ్ ఝాలా, హర్విజయ్‌సిన్హ్ ఝాలా, ధర్మేంద్రసింగ్ ఝాలా, యువరాజ్‌సిన్హ్ ఝాలాగా పోలీసులు గుర్తించారు.