పెట్రోల్ ధరలను 500 శాతం పెంచిన ప్రభుత్వం.. లీటర్ రూ.450 కి పైనే.. ఎక్కడో తెలుసా

మన దేశంలో పెట్రోల్ ధర యావరేజ్‌గా లీటర్‌కు రూ. 110 గా ఉంది. అయితే గతంలో అంతర్జాతీయంగా చమురు ధరలు కరోనా తర్వాత అమాంతం పెరగడంతో పెట్రోల్ మంట పుట్టిస్తోంది. దీంతో ధరలు భారీగా పెరిగాయి. అయితే ఆర్థిక సంక్షోభంతో కొట్టు మిట్టాడుతున్న మన పొరుగు దేశాలైన పాకిస్థాన్, శ్రీలంకలలో పెట్రోల్ ధర మన దగ్గరికంటే రెట్టింపు.. అంతకు మించే ఉంటోంది. కానీ కరేబియన్ ద్వీప దేశమైన క్యూబాలో మాత్రం పెట్రోల్ రేట్ వింటే షాక్ అవ్వాల్సిందే ఎందుకంటే అక్కడ లీటర్ పెట్రోల్ ధర రూ.450 దాటి పోయింది.

కరోనా వైరస్‌, ఆ తర్వాతి పరిణామాలు, అమెరికా విధించిన ఆంక్షలు కలిసి క్యూబా దేశాన్ని తీవ్రమైన ఆర్థిక సంక్షోభంలోకి నెట్టేశాయి. ఈ క్రమంలోనే ద్రవ్యోల్బణం పెరిగిపోయింది. ఈ క్రమంలోనే ద్రవ్యలోటును తగ్గించుకునేందుకు క్యూబా ప్రభుత్వానికి కఠిన నిర్ణయాలు తీసుకోక తప్పడం లేదు. ఈ క్రమంలోనే పెట్రోల్ ధరలను 500 శాతానికి పైగా పెంచుతున్నట్లు తాజాగా ప్రకటించింది. పెట్రోల్ ధరలను ఒకేసారి భారీగా పెంచడంతో క్యూబా ప్రజలు తీవ్ర ఆందోళనలో పడ్డారు. విదేశీ మారక నిల్వలు అడుగంటిపోవడంతో వాటిని సమకూర్చుకునేందుకు అక్కడి ప్రభుత్వం ఒక్కసారిగా పెట్రోల్ ధరలను 5 రెట్లు పెంచేసింది.

అయితే ఈ పెట్రోల్ ధరల పెంపు ఫిబ్రవరి 1 వ తేదీ నుంచి అమల్లోకి రానున్నట్లు క్యూబా సర్కారు వెల్లడించింది. ప్రస్తుతం క్యూబాలో లీటర్‌ పెట్రోల్‌ ధర 25 క్యూబన్‌ పెసోలు అంటే భారత కరెన్సీలో సుమారు రూ.90 గా ఉంది. అయితే 25 క్యూబన్ పెసోలుగా ఉన్న పెట్రోల్ ధరను వచ్చే నెల 1 వ తేదీ నుంచి 132 క్యూబన్ పెసోలు భారత కరెన్సీలో దాదాపు రూ.450 కు పెంచనున్నట్లు ప్రకటించింది. ఇక ప్రీమియం పెట్రోల్‌ ధరలనైతే ప్రస్తుతం ఉన్న 30 పెసోల నుంచి 156 పెసోలకు పెంచనున్నట్లు క్యూబా ప్రభుత్వం తెలిపింది. మరోవైపు.. ఈ గండం నుంచి గట్టెక్కేందుకు భవిష్యత్‌లో డీజిల్‌, ఇతర ఇంధన ధరలు కూడా పెంచనున్నట్లు క్యూబా ఆర్థిక మంత్రి రెగ్యురో వెల్లడించారు. మరోవైపు.. గృహ వినియోగదారులు వినియోగించే కరెంట్‌కు విద్యుత్‌ ఛార్జీలను కూడా 25 శాతం పెంచుతున్నట్లు ప్రకటించారు. అంతర్జాతీయ మార్కెట్ల నుంచి చమురు కొనుగోలు చేసేందుకు విదేశీ కరెన్సీని పెంచుకోవాలని యోచిస్తున్నామని.. అందులో భాగంగానే కొన్ని పెట్రోల్‌ బంకుల్లో పెట్రోల్, డీజిల్, ఇతర ఇంధనాన్ని అమెరికా డాలర్లలో మాత్రమే కొనుగోలు చేసేలా ఆదేశాలు జారీ చేసినట్లు రెగ్యురో చెప్పారు.

గతంలో క్యూబాలో సబ్సిడీ ధరలకు పెట్రోల్, డీజిల్‌ను అమ్మేవారు. కరోనా వైరస్ సృష్టించిన బీభత్సంతో క్యూబా ఆర్థిక వ్యవస్థ పూర్తిగా కుదేలైంది. మరోవైపు ఇటీవలి కాలంలో క్యూబాపై అమెరికా ఆంక్షలను కఠినతరం చేయడంతో ఆ దేశంలో తీవ్ర సంక్షోభ పరిస్థితులు నెలకొన్నాయి. ఈ రెండు కారణాలతో క్యూబాలో నిత్యావసరాల ధరలు భారీగా పెరిగి ప్రజలు తీవ్ర అవస్థలు పడుతున్నారు. గతేడాది క్యూబా ఆర్థిక వ్యవస్థ 2 శాతం పడిపోగా.. ద్రవ్యోల్బణం 30 శాతం పెరిగినట్లు స్థానిక మీడియా తెలిపింది. అయితే ఇవి ఇంకా ఎక్కువగా ఉండే అవకాశాలున్నాయని చెబుతున్నారు. రెండేళ్లుగా క్యూబా కరెన్సీ విలువ కూడా భారీగా పడిపోతూ రావడం ఆ దేశాన్ని మరింత కష్టాల్లోకి నెడుతోంది.