తండ్రి కాబోతున్న ముఖ్యమంత్రి.. రిపబ్లిక్ డే వేడుకల్లో గుడ్‌న్యూస్ చెప్పిన సీఎం

రిపబ్లిక్ వేడుకల్లో భాగంగా పంజాబ్ సీఎం భగవంత్ మాన్ తన వ్యక్తిగత విషయానికి సంబంధించిన గుడ్‌న్యూస్ చెప్పారు. త్వరలో తాను తండ్రి కాబోతున్నట్లు చెప్పారు. తన భార్య గురుప్రీత్ కౌర్ ప్రస్తుతం ఏడు నెలల గర్భిణీ అని వెల్లడించారు. రిపబ్లిక్ డే సందర్భంగా లూథియానాలోని పంజాబ్ వ్యవసాయ విశ్వవిద్యాలయం ప్రాగణంలో మాన్ పతాకావిష్కరణ చేశారు. అనంతరం పోలీసుల నుంచి గౌరవ వందనం స్వీకరించారు. ప్రజలనుద్దేశించి ప్రసంగించన భగవంత్ మాన్.. తన భార్య డాక్టర్ గురుప్రీత్ కౌర్ గర్భవతి అని.. మార్చిలో బిడ్డకు జన్మనివ్వబోతున్నట్లు ప్రకటించారు.

'మార్చిలో ఒక శుభవార్త వస్తుంది. నా భార్య డాక్టర్ గురుప్రీత్ కౌర్ 7 నెలల గర్భవతి. ఒక సామాజిక సమస్యపై అవగాహన కల్పించేందుకే ఈ ప్రకటన చేస్తున్నా.' అని మాన్ ప్రకటించారు. కొందరు లింగనిర్ధరణ పరీక్షలు చేసి ఆడపిల్ల అని తెలిస్తే అబార్షన్లు చేయిస్తున్నారని.. అది చాలా దారుణమైన విషయమన్నారు. ఆడపిల్లల భ్రూణహత్యలు, లింగ నిర్ధరణ పరీక్షలు, ఆడపిల్ల అయితే అబార్షన్ చేయడాన్ని వ్యతిరేకించాలన్నారు. ఆరోగ్యం ప్రకృతి ప్రసాదించిన అతి పెద్ద వరమన్న మాన్.. అబ్బాయి అయినా.. అమ్మాయి అయినా సరి సమానంగా ప్రేమించాలన్నారు. అబ్బాయిలు, అమ్మాయిలు అనే తేడాలు వద్దని ప్రజలకు విజ్ఞప్తి చేశారు.

పుట్టబోయే బిడ్డ లింగాన్ని గుర్తించేందుకు ప్రయత్నించవద్దని ప్రజలకు విజ్ఞప్తి చేశారు. దేవుని ఆశీర్వాదం ఏ రూపంలో వస్తుందో ఎవరికీ తెలియదు. తాము కూడా ఇప్పటి వరకు పుట్టేది ఆడ, మగ అనేది తెలుసుకోలేదని.. తెలుసుకోవాలనుకోవటం లేదని అన్నారు. కాగా, భగవంత్ మాన్ పంజాబ్ సీఎంగా బాధ్యతలు చేపట్టాక.. డాక్టర్ గురుప్రీత్ కౌర్‌ను జూలై 2022లో వివాహం చేసుకున్నారు. ఆమె మాన్‌కి రెండవ భార్య. అంతకు ముందే అతను మరో పెళ్లి చేసుకోని విడాకులు తీసుకున్నారు. వీరి వివాహానికి ఆప్ అధ్యక్షుడు అరవింద్ కేజ్రీవాల్ సహా.. పలువురు సన్నిహితులు హాజరయ్యారు.