అమెరికాలో భారతీయులపై ఆగని దాడులు.. దుండగుడు దాడిలో మరొకరి మృతి

అగ్రరాజ్యం అమెరికాలో భారతీయులే లక్ష్యంగా జరుగుతున్న దాడులు కొనసాగుతున్నాయి. ఈ ఏడాదిలో ఇప్పటి వరకు వివిధ కారణాలతో ఆరుగురు మృతి చెందగా.. తాజాగా మరొకరు ప్రాణాలు కోల్పోయారు. అమెరికా రాజధాని వాషింగ్టన్‌లోని ఓ రెస్టారెంట్‌ వద్ద భారతీయ అమెరికన్‌పై గుర్తుతెలియని వ్యక్తి దాడికి పాల్పడ్డాడు. తీవ్రంగా గాయపడిన బాధితుడు ఆస్పత్రిలో చికిత్స పొందుతూ మృతి చెందాడు. మృతుడిని వర్జీనియాకు చెందిన భారత సంతతి యువకుడు వివేక్ తనేజాగా (41) గుర్తించారు. ఫిబ్రవరి 2న జరిగిన ఈ ఘటన ఆలస్యంగా వెలుగులోకి వచ్చింది.

వాషింగ్టన్‌లోని జపాన్ రెస్టారెంట్ నుంచి బయటకు వచ్చి వీధిలో నడుచుకుంటూ వెళ్తోన్న వివేక్‌ను కిందపడేసిన నిందితుడు.. ఆపై పేవ్‌మెంట్‌కేసి తలను బాదాడు. తీవ్రంగా గాయపడిన వివేక్ ఆస్పత్రిలో చికిత్స తీసుకుంటూ మరణించాడు. ఫిబ్రవరి 2న అర్ధరాత్రి 2 గంటలు సమయంలో ఈ దారుణం చోటుచేసుకుంది. ఈ ఘటన వెనక కారణాలు తెలియరాలేదని పోలీసులు వెల్లడించారు. పోలీసులు ఘటనా స్థలానికి చేరుకునే సరికి బాధితుడు స్పృహ కోల్పోయి పడి వున్నాడు. వెంటనే అతడ్ని ఆసుపత్రికి తరలించారు. అక్కడ చికిత్స పొందుతూ తనేజా గురువారం మృతిచెందినట్టు అధికారులు తెలిపారు.

కేసు నమోదుచేసిన పోలీసులు.. ఘటనా స్థలంలోని సీసీటీవీ ఆధారంగా నిందితుడ్ని కనిపెట్టే ప్రయత్నం చేస్తున్నారు. నిందితుడి ఆచూకీ చెప్పిన వారికి 25 వేల డాలర్ల బహుమతి ప్రకటించారు. అమెరికాలో ఇటీవల భారతీయులపై జరుగుతోన్న వరుస దాడులు తీవ్ర ఆందోళనకు గురిచేస్తున్నాయి. గతవారం చికాగోలో హైదరాబాద్‌ యువకుడి సయ్యద్ ముజాహిర్ అలీపై దాడిచేసి దుండగులు దోచుకున్నారు. ఈ ఘటనకు సంబంధించిన వీడియో సోషల్ మీడియాలో వైరల్ అయ్యింది. అలాగే, తెలంగాణకు చెందిన శ్రేయాస్ రెడ్డి బెనిగెర్ (19)తో పాటు నీల్ ఆచార్య, వివేక్ సైనీ (25), అకుల్ ధావన్‌, సమీర్ కమాథ్‌లు కూడా వేర్వేరు కారణాలతో మృతి చెందారు.