భార్య ఆత్మహత్యకు పాల్పడితే భర్తను దోషిగా నిర్దారించలేం.. సుప్రీంకోర్టు సంచలన తీర్పు

భార్య ఆత్మహత్య కేసులో సరైన సాక్ష్యాలు లేకపోతే భర్తను దోషిగా పరిగణించలేమని సర్వోన్నత న్యాయస్థానం స్పష్టం చేసింది. మూడు దశాబ్దాల నాటి కేసులో ఓ వ్యక్తిని నిర్దోషిగా పేర్కొంటూ ఈ మేరకు సుప్రీంకోర్టు తీర్పు వెలువరించింది. ఈ కేసులో భర్తకు ఇండియన్ ఎవిడెన్స్ యాక్ట్‌లోని సెక్షన్‌ 113-ఎ వర్తించదని తేల్చిచెప్పింది. వివాహమైన ఏడేళ్లలోపు మహిళ ఆత్మహత్యకు పాల్పడితే అందుకు భర్త, అతడి బంధువులే ప్రేరేపించారన్న ఊహను సెక్షన్‌ 113ఎ నిర్ధారిస్తుంది. ఈ కేసులో కేవలం వేధింపులే ఆత్మహత్యకు ప్రేరణ అయ్యాయని భావించలేమని జస్టిస్‌ జేబీ పార్దీవాలా, జస్టిస్‌ మనోజ్‌ మిశ్రాల ధర్మాసనం వ్యాఖ్యానించింది.

ఆత్మహత్యకు దారి తీసిన పరిస్థితుల్లో నిందితుడు ప్రత్యక్ష చర్య ఉందా లేదా అన్నది కూడా కీలకమని ధర్మాసం పేర్కొంది. ‘పెళ్లై ఏడేళ్లలోపే ఆత్మహత్య జరిగింది కాబట్టి అందుకు నిందితుడే కారణమని చెప్పలేం.. క్రూరత్వం జరిగిందని నిరూపించాలి.. ఇందుకు సరైన సాక్ష్యం లేకుండా సెక్షన్‌ 113ఎ ప్రకారం నిందితుడిని దోషిగా భావించలేం’ అని ధర్మాసనం వ్యాఖ్యానించింది.

వివరాల్లోకి వెళ్తే.. ఈ కేసులో నిందితుడికి 1992లో వివాహం జరగ్గా.. 1993 నవంబరులో భార్య విషం తాగి ఆత్మహత్యకు పాల్పడింది. అయితే, పెళ్లైన మర్నాడు నుంచే రేషన్ షాపు ప్రారంభిస్తానని, పుట్టింటి నుంచి అదనపు కట్నం తేవాలని భర్త వేధించినట్టు ప్రాసిక్యూషన్ ఆరోపించింది. భర్త వేధింపులకు తాళలేకే ఆమె ఆత్మహత్య చేసుకున్నట్టు పేర్కొంది. ఈ కేసులో భర్తను దోషిగా నిర్దారిస్తూ కర్నాల్ అదనపు సెషన్స్ న్యాయమూర్తి 1998లో తీర్పు వెలువరించారు. సదరు వ్యక్తి ఈ తీర్పును పంజాబ్ హరియాణ హైకోర్టులో సవాల్ చేయగా అతడికి చుక్కెదురయ్యింది. దీంతో బాధితుడు సుప్రీంకోర్టును ఆశ్రయించాడు.

ఈ కేసును విచారించిన జస్టిష్ జేబీ పార్దీవాలా, జస్టిస్ మనోజ్ మిశ్రాల ద్విసభ్య ధర్మాసనం.. పెళ్లయిన ఏడేళ్లలోపు మహిళ ఆత్మహత్యకు ప్రేరేపించే అంశాన్ని నియంత్రించే చట్టానికి సంబంధించిన సరైన సూత్రాలను అమలు చేయడంలో న్యాయస్థానాలు చాలా జాగ్రత్తగా, అప్రమత్తంగా ఉండాలని సూచించారు. నేరారోపణ చట్టపరమైంది కాదు, నైతికమైనది అనే అభిప్రాయాన్ని కలిగించవచ్చని అత్యున్నత న్యాయస్థానం పేర్కొంది.

ఏమీ లేకుండా వ్యాపారం కోసం భార్య లేదా ఆమె తల్లిదండ్రుల నుంచి డబ్బు డిమాండ్ చేయడం క్రూరత్వం లేదా వేధింపులకు దారితీయదని పేర్కొంది. పెళ్లయిన ఏడేళ్లలోపు ఆత్మహత్యకు పాల్పడటం వల్ల క్రూరత్వం రుజువైనంత మాత్రాన బెదిరింపులకు పాల్పడకూడదని కూడా అత్యున్నత న్యాయస్థానం పేర్కొంది. భారత సాక్ష్యాధారల చట్టంలోని సెక్షన్ 113 విషయంలో తొందరపాటు తగదని ధర్మాసనం స్పష్టం చేసింది.