లోక్‌సభ బరి నుంచి తప్పుకున్న కమల్‌ హాసన్.. డీఎంకేకు మద్దతు.. రాజ్యసభ సీటు కేటాయింపు

లోక్‌సభ ఎన్నికలకు ముందు నేతలు పార్టీలు జంప్ కావడం, మరోవైపు.. పార్టీల పొత్తులు.. ఇక కొన్ని పార్టీలకు మరికొన్ని పార్టీల మద్దతు.. ఇలా రకరకాల విన్యాసాలు జరుగుతూనే ఉంటాయి. ఈ నేపథ్యంలోనే తమిళనాడులో కొత్త పొత్తు పొడిచింది. మక్కల్ నీది మయ్యం పార్టీ అధినేత, నటుడు కమల్ హాసన్.. తాజాగా తమిళనాడులో అధికార పార్టీ అయిన ద్రవిడ మున్నేట్ర కజగం-డీఎంకేకు ఈ లోక్‌సభ ఎన్నికల్లో మద్దతు ప్రకటిస్తున్నట్లు తెలిపారు. ఈ క్రమంలోనే శనివారం డీఎంకే ప్రధాన కార్యాలయంలో సీఎం ఎంకే స్టాలిన్‌తో భేటీ అయిన కమల్ హాసన్ ఈ నిర్ణయాన్ని ప్రకటించారు.

లోక్‌సభ ఎన్నికల్లో డీఎంకే, కాంగ్రెస్‌ కూటమికి మద్దతు ఇవ్వనున్నట్లు ఎంఎన్‌ఎం పార్టీ అధినేత కమల్‌ హాసన్‌ స్పష్టం చేశారు. లోక్‌సభ ఎన్నికల్లో తమ పార్టీ పోటీ చేయట్లేదని తేల్చి చెప్పారు. ఈ నేపథ్యంలోనే ఎంఎన్‌ఎంకు రాజ్యసభ సీటు ఇచ్చేందుకు డీఎంకే, కాంగ్రెస్ కూటమి అంగీకరించింది. ఈ నేపథ్యంలోనే లోక్‌సభ ఎన్నికల్లో డీఎంకే పార్టీకి మద్దతు ఇస్తున్నట్లు కమల్ హాసన్ ప్రకటించారు. పార్లమెంట్ ఎన్నికలపై పూర్తి ఫోకస్ పెట్టిన డీఎంకే.. మిగిలిన పార్టీలతో పొత్తులు పెట్టుకుంటోంది. ఇప్పటికే కాంగ్రెస్, డీఎంకే కూటమి ఎండీఎంకే పార్టీతో పొత్తు కుదుర్చుకోగా.. ఆ పార్టీకి ఒక స్థానాన్ని కేటాయించింది. ఇక డీపీఐ పార్టీకి రెండు స్థానాలు ఇచ్చారు.

ఈ నేపథ్యంలో తమకు 10 సీట్లు కేటాయించడానికి కాంగ్రెస్‌ పార్టీ డిమాండ్ చేస్తున్నట్లు డీఎంకే వర్గాలు చెబుతున్నాయి. ఈ నేపథ్యంలోనే కాంగ్రెస్, డీఎంకే పొత్తు ఆదివారం ఖరారు కానున్నట్లు వెల్లడించాయి. ఇక అధికారంలో ఉన్న డీఎంకే తమిళనాడులో ఎక్కువ లోక్‌సభ స్థానాలు గెలుచుకోవాలని పావులు కదుపుతోంది. ఈ నేపథ్యంలో తమిళనాడులో ఉన్న చిన్న చిన్న పార్టీల మద్దతును కూడగడుతోంది.