ట్రాఫిక్, నీటి సమస్యే కాదు.. బెంగళూరు వాసులకు మరో తలనొప్పి.. ఏడేళ్లలో అత్యధికం

కర్ణాటక రాజధాని బెంగళూరు పేరు చెబితేనే ట్రాఫిక్ సమస్యలు గుర్తుకువస్తాయి. సిలికాన్ వ్యాలీ ఆఫ్ ఇండియాగా పిలుచుకునే బెంగళూరులో వివిధ రాష్ట్రాల నుంచి వచ్చిన ఐటీ ఉద్యోగులు భారీగా నివసిస్తూ ఉంటారు. ఈ నేపథ్యంలోనే బెంగళూరు నగరంలో ట్రాఫిక్ కష్టాలు అంతా ఇంతా ఉండవు. కిలోమీటర్ దూరం ప్రయాణించాలంటే వాహనాల మధ్య గంటల తరబడి ఇరుక్కుపోవాల్సి ఉంటుంది. రోడ్లపైకి వస్తే తిరిగి ఎప్పుడు ఇంటికి వెళ్తామో కూడా తెలియని పరిస్థితులు బెంగళూరు నగరంలో కనిపిస్తూ ఉంటాయి. ఇక వేసవి రాకముందే బెంగళూరులో నీటి సంక్షోభం తలెత్తింది. గత 2 నెలల నుంచి బెంగళూరు వాసులు నీళ్లు దొరక్క తీవ్ర ఇబ్బందులు పడుతున్నారు. ట్రాఫిక్‌తో అవస్థలు పడుతున్న బెంగళూరు వాసులకు నీటి కటకట మూలిగే నక్కపై తాటికాయ పడ్డట్టు అయింది. ఇదే కాకుండా ఇప్పుడు బెంగళూరులో దంచికొడుతున్న ఎండలు వారికి మరో తలనొప్పిగా మారింది.

వర్షాభావ పరిస్థితులు, నీటి కొరతతో సతమవుతున్న బెంగళూరు నగరాన్ని ప్రస్తుతం ఎండలు ఊపిరితీసుకోనీయడం లేదు. నీటి సంక్షోభం మధ్య ప్రస్తుతం నగరంలో వడగాలులు, ఉష్ణోగ్రతలు నగరవాసులను తీవ్ర ఉక్కిరిబిక్కిరి చేస్తున్నాయి. ఈ క్రమంలోనే ఎప్పుడూ లేని విధంగా గత ఏడేళ్లలోనే రికార్డు స్థాయి ఉష్ణోగ్రతలు నమోదవుతున్నాయి. కర్ణాటక రాష్ట్ర సహజ విపత్తు పర్యవేక్షణ కేంద్రం చెప్పిన వివరాల ప్రకారం.. ఈ ఏడాది ఉష్ణోగ్రతల పెరుగుదల అసాధారణంగా ఉందని పేర్కొన్నారు. గత ఏడేళ్లలో ఈ ఏడాది మార్చిలో రికార్డు స్థాయి ఉష్ణోగ్రతలు నమోదయ్యాయని వెల్లడించింది. మార్చి 28 వ తేదీ బెంగళూరులో ఏకంగా 37.9 డిగ్రీ సెల్సియస్‌కి ఉష్ణోగ్రత చేరుకుంది. గతే ఏడాది మార్చి 28 వ రోజు 37.5 డిగ్రీల ఉష్ణోగ్రత నమోదైంది.

ఇక బెంగళూరులో నీటి సమస్య, పెరుగుతున్న ఉష్ణోగ్రతలకు నిపుణులు పలు కారణాలు చెబుతున్నారు. రుతుపవనాలకు ముందు ఈ ఏడాది వర్షాలు పడకపోవడం, రోజురోజుకూ పెరుగుతున్న పట్టణీకరణ, పెరిగిన కాంక్రీట్ నిర్మాణాల కారణంగా ఏర్పడే అర్బన్ హీర్ ఐలాండ్ ప్రభావం ఉందని చెబుతున్నారు. ఉష్ణోగ్రతలు భారీగా నమోదవుతున్నందున.. అధికారులు బెంగళూరు వాసులకు పలు సూచనలు చేస్తున్నారు. ఇంట్లోనే ఉండాలని, తగినంత నీరు తీసుకోవాలని హీట్ వేవ్ హెచ్చరికలు జారీ చేస్తున్నారు.

రాబోయే రోజుల్లో ఉష్ణోగ్రతలు మరింత పెరిగే అవకాశం ఉందని చెబుతున్నారు. ఎండ ఎక్కువగా ఉండే మధ్యాహ్న సమయాల్లో బయటికి వెళ్లకుండా ఉండాలని పేర్కొంటున్నారు. తేలికైన, శ్వాసక్రియకు అనువుగా ఉండే దుస్తులు ధరించాలని.. సూచిస్తున్నారు. ఇక ఇప్పటికే నీరు లేక అల్లాడిపోతున్న బెంగళూరు వాసులు పెరుగుతున్న ఉష్ణోగ్రతల కారణంగా ఈ సమస్య మరింత తీవ్రం అవుతుందని భయపడుతున్నారు. మరోవైపు రుతుపవనాలు రావాలంటే మరో 2 నెలలు ఆగాల్సి ఉండటంతో అప్పటివరకు బెంగళూరు నగరవాసుల నీటి కష్టాలు ఇప్పుడప్పుడే తీరేలా కనిపించడం లేదు.