ఆ ముగ్గురిది అదృష్టం.. వైసీపీ నుంచి టీడీపీలో చేరి మంత్రులయ్యారు

ఆంధ్రప్రదేశ్‌లో కొత్త ప్రభుత్వం కొలువుదీరింది.. చంద్రబాబు ముఖ్యమంత్రిగా ప్రమాణ స్వీకారం చేయగా.. పవన్ కళ్యాణ్ సహా మొత్తం 24మంది మంత్రులుగా ప్రమాణ స్వీకారం చేశారు. అయితే చంద్రబాబు కేబినెట్‌లో పదవులు దక్కించుకున్వారిలో ముగ్గురిది అదృష్టం అని చెప్పాలి. ఎన్నికలకు ఆరేడు నెలల ముందు వరకు వైఎస్సార్‌సీపీలో ఉన్న ఈ ముగ్గురు నేతలు తెలుగు దేశం పార్టీలో చేరారు. ఎన్నికల్లో టికెట్లు దక్కించుకుని.. ఇప్పుడు ఏకంగా మంత్రులు అయ్యారు. వీరిలో ఇద్దరు గతంలోనే మంత్రులుగా పనిచేయగా.. ఒకరు మాత్రం మొదటిసారి ఎమ్మెల్యే, ఏకంగా మంత్రి అయ్యారు.

ఆనం రాంనారాయణరెడ్డి ఉమ్మడి నెల్లూరు జిల్లాలో సీనియర్ రాజకీయనేతగా ఉన్నారు.. ఈయన వైఎస్సార్‌సీపీ నుంచి ఇటీవలే టీడీపీలో చేరి చంద్రబాబు కేబినెట్‌‌లో మంత్రి అయ్యారు. ఆనం రాంనారాయణరెడ్డి తెలుగు దేశం పార్టీలో చేరి రాజకీయాల్లోకి వచ్చారు. 1985లో నెల్లూరు జిల్లా రాపూరు నుంచి గెలిచి.. ఎన్టీఆర్ కేబినెట్‌లో మంత్రిగా కూడా పనిచేశారు. ఆనం 1991లో కాంగ్రెస్‌పార్టీలో చేరారు.. 1994లో నెల్లూరు జిల్లా రాపూరు నుంచి పోటీచేసి టీడీపీ అభ్యర్థి చేతిలో ఓడిపోయారు. 1999లో రాపూరు నుంచి పోటీచేసి విజయం సాధించారు. ఆ తర్వాత 2004లో కూడా అక్కడి నుంచే పోటీచేసి ఓడిపోయారు.

ఆనం రాంనారాయణరెడ్డి 2009లో ఆత్మకూరు నియోజకవర్గానికి మారారు.. అక్కడి నుంచి కాంగ్రెస్ పార్టీ తరఫున పోటీచేసి విజయం సాధించారు. 2007 నుంచి 2009 మధ్య వైఎస్ రాజశేఖరరెడ్డి ప్రభుత్వంలో మంత్రిగా పనిచేశారు. 2012లో అప్పటి ముఖ్యమంత్రి నల్లారి కిరణ్‌కుమార్‌రెడ్డి ప్రభుత్వంలో ఆర్థికశాఖమంత్రిగా పనిచేశారు. 2014 ఎన్నికల తర్వాత తెలుగు దేశం పార్టీలో చేరగా.. మళ్లీ 2018లో వైఎస్సార్‌సీపీలో చేరారు. 2019 ఎన్నికల్లో ఆనం రాంనారాయణరెడ్డి వెంకటగిరి నియోజకవర్గం నుంచి పోటీచేసి విజయం సాధించారు.. ఆ తర్వాత పరిణామాలతో ఆయన వైఎస్సార్‌సీపీకి దూరమయ్యారు. ఆయన 2023 మార్చిలో జరిగిన ఎమ్మెల్సీ ఎన్నికల్లో టీడీపీ ఓటు వేశారనే ఆరోపణలతో పార్టీ నుంచి సస్పెండ్ చేశారు.. ఆ తర్వాత స్పీకర్ ఆయనపై 2024 ఫిబ్రవరిలో అనర్హత వేటు వేశారు. దీంతో ఆయన టీడీపీలో చేరి.. 2024 ఎన్నికల్లో ఆత్మకూరు నియోజకవర్గం నుంచి పోటీచేసి విజయం సాధించారు.. ఇప్పుడు చంద్రబాబు కేబినెట్‌లో మంత్రి అయ్యారు. మంత్రిగా పనిచేసిన అనుభవం ఉండటం.. జిల్లాలో సీనియర్ నేత కావడంతో చంద్రబాబు అవకాశం కల్పించారు.

కొలుసు పార్థసారథి

ఉమ్మడి కృష్ణా జిల్లాలో కొలుసు పార్థసారథి సీనియర్ రాజకీయ నేతగా ఉన్నారు. ఆయన కూడా వైఎస్సార్‌సీపీ నుంచి చేరి చంద్రబాబు కేబినెట్‌లో మంత్రి అయ్యారు. కొలుసు పార్థసారథి తండ్రి కొలుసు పెద్ద రెడ్డయ్య యాదవ్ వారసత్వంగా రాజకీయాల్లోకి వచ్చారు. పెద్ద రెడ్డయ్య 1991లో తెలుగు దేశం పార్టీ తరఫున మచిలీపట్నం ఎంపీగా విజయం సాధించారు. 1996లో కాంగ్రెస్ పార్టీలో చేరి మళ్లీ మచిలీపట్నం నుంచి పోటీచేసి ఓడిపోయారు. ఆ తర్వాత రెడ్డయ్య యాదవ్ స్థానంలో కొలుసు పార్థసారథి రాజకీయాల్లోకి వచ్చారు. పార్థసారథి కాంగ్రెస్ పార్టీలో చేరి 2004లో ఉయ్యూరు నుంచి పోటీచేసి గెలిచారు.. 2009లో నియోజకవర్గాలు పునర్విభజన జరగడంతో పెనమలూరు నుంచి పోటీచేసి విజయం సాధించారు. వైఎస్ రాజశేఖర్ రెడ్డి కేబినెట్‌లో పార్థసారథి మంత్రిగా పనిచేశారు.

2014 ఎన్నికలకు ముందు పార్థసారథి కాంగ్రెస్ పార్టీని వీడి వైఎస్సార్‌సీపీలో చేరారు. ఆయన 2014 ఎన్నికల్లో వైఎస్సార్‌సీపీ తరఫున మచిలీపట్నం ఎంపీగా పోటీచేసి ఓడిపోయారు. అయితే 2019 ఎన్నికల్లో పార్థసారథి పెనమలూరు నియోజకవర్గం నుంచి పోటీచేసి గెలిచారు.. మంత్రి పదవి ఆశించినా దక్కలేదు. 2024 ఎన్నికలకు ముందు వైఎస్సార్‌సీపీ నుంచి టికెట్ హామీ దక్కలేదు.. దీంతో చంద్రబాబును కలిసి తెలుగు దేశం పార్టీలో చేరారు. ఆయనకు నూజివీటు సీటు ఇవ్వగా.. అక్కడి నుంచి గెలిచి ఏకంగా మంత్రి అయ్యారు. గతంలో మంత్రిగా పనిచేసిన అనుభవం ఉండటంతో పాటూ ఆయనకు ముందుగానే చంద్రబాబు హామీ ఇచ్చినట్లు తెలుస్తోంది.

వాసంశెట్టి సుభాష్

ఉమ్మడి తూర్పుగోదావరి జిల్లా అమలాపురంనకు చెందిన చెందిన వాసంశెట్టి సుభాష్‌ శెట్టి బలిజ సామాజిక వర్గానికి చెందిన నేతగా ఉన్నారు. సుభాష్‌ తాత సత్తిరాజు.. తండ్రి సత్యం చెరు రెండుసార్లు అమలాపురం మున్సిపల్‌ కౌన్సిలర్లుగా గతంలో పనిచేశారు. తల్లి కృష్ణకుమారి ప్రస్తుతం కౌన్సిలర్‌‌గా ఉన్నారు.. సుభాష్ ఎస్‌ఏఎఫ్‌ స్వచ్ఛంద సంస్థ సేవా కార్యక్రమాలు చేపట్టారు. ఆయన వైఎస్సార్‌సీపీలో చేరగా.. రాష్ట్ర యువజన విభాగం సంయుక్త కార్యదర్శిగా పనిచేశారు. అయితే కోనసీమ జిల్లా పేరు మార్పు సమయంలో అమలాపురం ప్రాంతంలో అల్లర్లు చేలరేగాయి.. ఈ ఘటనల్లో సుభాష్‌పై పోలీసులు కేసులు నమోదు చేశారు. కానీ ఆ తర్వాత పరిణామాలు మారిపోవడంతో.. సుభాష్ వైఎస్సార్‌సీపీకి దూరమయ్యారు. ఆ తర్వాత తెలుగు దేశం పార్టీలో చేరగా.. రామచంద్రాపురం నియోజకవర్గం నుంచి టికెట్ దక్కింది. అక్కడి నుంచి పోటీచేసి విజయం సాధించి.. ఇప్పుడు మంత్రి అయ్యారు. మొదటిసారి ఎమ్మెల్యేగా గెలిచిన సుభాష్‌కు కేబినెట్‌లో స్థానం దక్కడం విశేషం. సామాజికవర్గాలవారీ లెక్కల్లో ఆయనకు మంత్రి పదవి దక్కింది.