మెట్రో ప్రయాణికులకు గుడ్‌న్యూస్.. రూ.10కే బైక్ టాక్సీలు

ప్రస్తుతం దేశంలోని ప్రధాన నగరాల్లో మెట్రో రైళ్లు.. నగరవాసులకు సురక్షితమైన, వేగవంతమైన, సౌకర్యవంతమైన ప్రయాణాన్ని అందిస్తున్నాయి. మెట్రోలో ప్రయాణించే ప్రయాణికులకు ఇది శుభవార్త. ఒక చోటు నుంచి మరో చోటుకు మెట్రోకు వెళ్లిన తర్వాత.. అక్కడి నుంచి గమ్యస్థానాలకు వెళ్లడానికి ఆటో, బస్సు, సొంత వాహనాలు లేదా ఇతర టాక్సీలను ఆశ్రయిస్తూ ఉంటాం. అయితే ఇక నుంచి అలాంటి ఇబ్బంది అవసరం లేదు. ఎందుకంటే మెట్రో రైల్ కార్పొరేషన్ అధికారులే ప్రత్యేకంగా బైక్ టాక్సీలు ఏర్పాటు చేశారు. నగరంలోని 12 మెట్రో స్టేషన్లలో ఈ బైక్ టాక్సీలను అమల్లోకి తీసుకువచ్చినట్లు తెలిపారు. ఇక మహిళల కోసం ప్రత్యేకంగా మహిళలే నడిపే బైక్ టాక్సీలు అందుబాటులోకి తెచ్చినట్లు వివరించారు. అయితే ఈ బైక్ టాక్సీలు ఢిల్లీ మెట్రో రైల్ కార్పొరేషన్ అందుబాటులోకి తీసుకువచ్చింది.

ఢిల్లీ మెట్రో పరిధిలో ప్రస్తుతం 12 మెట్రో స్టేషన్లలో ఈ బైక్ టాక్సీ సౌకర్యాన్ని ప్రారంభించినట్లు ఢిల్లీ మెట్రో రైల్ కార్పొరేషన్ అధికారులు వెల్లడించారు. ఇక మరికొన్ని రోజుల్లోనే మరిన్ని మెట్రో స్టేషన్లకు ఈ బైక్ టాక్సీ సేవలను విస్తరించనున్నట్లు తెలిపారు. ఈ క్రమంలోనే ఢిల్లీ మెట్రోలో ప్రయాణించేవారు డీఎంఆర్‌సీకి చెందిన ఢిల్లీ సార్థీ 2.0 మొబైల్ యాప్ ద్వారా ఈ బైక్ టాక్సీలను బుక్ చేసుకోవచ్చని వివరించారు. ఈ బైక్ టాక్సీ సేవలను ఫస్ట్ అండ్ లాస్ట్ మైల్ కనెక్టివిటీ ఇండియా ప్రైవేట్ లిమిటెడ్ అనే సంస్థ భాగస్వామ్యంతో అందుబాటులోకి తీసుకువచ్చినట్లు డీఆర్‌ఎంసీ ఒక ప్రకటనలో తెలిపింది. వచ్చే 3 నెలల్లో మిగిలిన స్టేషన్లలో కూడా ఈ బైక్ టాక్సీలు అందుబాటులోకి రానున్నాయని డీఎంఆర్‌సీ పేర్కొంది.

ఇక మహిళా ప్రయాణికుల కోసం ఢిల్లీ మెట్రో ప్రత్యేక బైక్ టాక్సీ సర్వీసును కూడా అందుబాటులోకి తీసుకువచ్చింది. మొత్తం రెండు రకాల బైక్ ట్యాక్సీలను ప్రవేశపెట్టింది. ఇందులో మొదటిది షీరైడ్స్‌ కాగా.. ఇది ప్రత్యేకంగా మహిళా ప్రయాణికుల కోసమే తీసుకువచ్చారు. ఇందులో మహిళలే బైక్ టాక్సీని నడుపుతారు. షీరైడ్స్‌లో ప్రయాణానికి కనీస ధర రూ.10 మాత్రమే నిర్ణయించారు. ఇక రెండోది ‘రైడర్‌ టాక్సీ’. ఈ బైక్‌ టాక్సీ పురుషులు, మహిళలకు అందరికీ ఉపయోగపడుతుంది. ఈ బైక్ టాక్సీలన్నీ ఎలక్ట్రిక్ బైక్‌లు అని.. వీటి వల్ల కాలుష్యం ఏర్పడదని స్పష్టం చేశారు.

మొదటగా మొత్తం 200 బైక్ టాక్సీలను ఢిల్లీ మెట్రో రైల్ కార్పొరేషన్ అధికారులు ప్రవేశపెట్టారు. ఇందులో 150 రైడర్ బైక్‌ టాక్సీలు, మరో 50 షీరైడ్స్ బైక్ టాక్సీలను అందుబాటులోకి తీసుకువచ్చారు. ఈ బైక్ టాక్సీలు ఢిల్లీలోని 12 మెట్రో స్టేషన్ల పరిధిలో సేవలు అందించనున్నాయి. ప్రతీ మెట్రో స్టేషన్‌కు 3 నుంచి 5 కిలోమీటర్ల రేంజ్‌లో ఉదయం 8 గంటల నుంచి రాత్రి 9 గంటల వరకు అందుబాటులోకి ఉన్నట్లు మెట్రో రైలు అధికారులు తెలిపారు.