బాణసంచాపై శాశ్వత నిషేధం.. సర్కార్ సంచలన నిర్ణయం, సమర్థించిన సుప్రీంకోర్టు

దేశ రాజధాని ఢిల్లీలో రోజురోజుకూ పెరుగుతున్న కాలుష్యం దేశంలోనే అతిపెద్ద సమస్యగా మారింది. ప్రపంచంలోనే అత్యంత కాలుష్య నగరాల జాబితాలో ఢిల్లీ ఉండటం తీవ్ర ఆందోళనకు గురి చేస్తోంది. అయితే గత కొన్నేళ్లుగా.. ప్రతీ సంవత్సరం శీతాకాలం ప్రారంభమైనప్పటి నుంచి ఢిల్లీ మొత్తం కాలుష్యమయంగా మారిపోతోంది. ఢిల్లీతోపాటు చుట్టుపక్కల ఉన్న ప్రాంతాలు కూడా కాలుష్యం కోరల్లో చిక్కుకుని అల్లాడిపోవడం మనం చూస్తూనే ఉన్నాం. దీంతో శీతాకాలం అంటేనే అక్కడి ప్రజలకు, ప్రభుత్వాలకు వణుకుపుడుతోంది. ఈ క్రమంలోనే.. కాలుష్యాన్ని తగ్గించేందుకు అనేక చర్యలు తీసుకున్నా, ఆంక్షలు విధించినా పరిస్థితి మాత్రం మెరుగుపడటం లేదు. ఈ నేపథ్యంలోనే మొట్టమొదట బాణసంచా వాడకంపై తాత్కాలిక నిషేధం విధించారు. అయినా పరిస్థితిలో మార్పు రాకపోవడంతో ఢిల్లీ సర్కార్ పూర్తిగా నిషేధం విధిస్తూ సంచలన నిర్ణయం తీసుకుంది.

దేశ రాజధాని ఢిల్లీలో కాలుష్యం తీవ్ర సమస్యగా మారిన నేపథ్యంలో అతిశీ ప్రభుత్వం.. ఢిల్లీలో ఏడాది పొడవునా టపాసులపై నిషేధం విధించాలని నిర్ణయించింది. ఈ మేరకు సుప్రీంకోర్టుకు గురువారం సమాచారం అందించింది. ఈ క్రమంలోనే బాణసంచాపై శాశ్వత నిషేధం విధిస్తూ ఢిల్లీ ప్రభుత్వం తాజాగా ఉత్తర్వులు కూడా జారీ చేసింది. ఢిల్లీలో ఏడాది మొత్తం అన్ని రకాల బాణాసంచా తయారీ, అమ్మకాలు, నిల్వపై నిషేధం విధిస్తున్నట్లు ఆ ఉత్తర్వుల్లో అతిశీ సర్కార్ స్పష్టం చేసింది. ఈ క్రమంలోనే ఢిల్లీ ప్రభుత్వం తీసుకున్న నిర్ణయాన్ని సుప్రీంకోర్టు కూడా సమర్థించింది.

అయితే కాలుష్యం నియంత్రించడానికి ఢిల్లీ ప్రభుత్వం తీసుకున్న బాణసంచా నిషేధం నిర్ణయాన్ని పొరుగున ఉన్న ఉత్తర్‌ప్రదేశ్, హర్యానా ప్రభుత్వాలు కూడా తీసుకోవాలని సుప్రీంకోర్టు ఆదేశించింది. తదుపరి ఉత్తర్వులు ఇచ్చే వరకు ఇదే విధమైన చర్యలను అమలుచేయాలని సుప్రీంకోర్టు న్యాయమూర్తులు జస్టిస్ అభయ్ ఎస్ ఓకా, జస్టిస్ అగస్టిన్ జార్జ్ మసీహ్‌లతో కూడిన ద్విసభ్య ధర్మాసనం స్పష్టం చేసింది. ఢిల్లీ-ఎన్‌సీఆర్ ప్రాంతంలో వాయు కాలుష్యాన్ని అరికట్టేందుకు ఆంక్షల అమలుకు ఆదేశాలను కోరుతూ దాఖలైన పిటిషన్‌లను విచారణ జరిపిన సుప్రీంకోర్టు.. విచారణ జరుపుతోంది.

ఇక ఢిల్లీ, పరిసర ప్రాంతాల్లో ఇటీవలి కాలంలో ప్రతికూల వాతావరణ పరిస్థితుల కారణంగా గాలి నాణ్యత దారుణంగా పడిపోతూ తీవ్రమైన దశకు చేరుకుంది. ఇక ఈ ఏడాది దీపావళి తర్వాత ఢిల్లీలో విపరీతంగా పెరుగుతున్న కాలుష్యంపై ఇప్పటికే పలుమార్లు సుప్రీంకోర్టు తీవ్ర అసహనం వ్యక్తం చేసిన సంగతి తెలిసిందే. అయితే కాలుష్య కట్టడికి ఆయా రాష్ట్రాలు ఏం చర్యలు తీసుకుంటున్నాయి అని సుప్రీంకోర్టు ప్రశ్నించింది. దీనిపై వివిధ రాష్ట్రాలు తీసుకున్న చర్యలపై అసంతృప్తి వ్యక్తం చేసిన సుప్రీంకోర్టు.. రాజధాని ప్రాంతంలో భాగంగా ఉన్న అన్ని రాష్ట్రాలు ఒకే నిర్ణయం తీసుకున్నప్పుడే.. నిషేధం ప్రభావవంతంగా పనిచేసి.. కాలుష్యం అదుపులో ఉంటుందని అభిప్రాయం వ్యక్తం చేసింది.