టాటా కంపెనీ నుంచి కొత్త పెన్షన్ స్కీమ్.. ఫిబ్రవరి 28 వరకే ఛాన్స్
business | Suryaa Desk | Published : Sun, Feb 23, 2025, 11:12 PM
టాటా గ్రూప్నకు చెందిన టాటా ఏఐఏ ఇన్సూరెన్స్ కంపెనీ నుంచి కొత్త న్యూ ఫండ్ ఆఫర్ అందుబాటులోకి వచ్చింది. టాటా ఏఐఏ లైఫ్ ఇన్సూరెన్స్ మల్టీక్యాప్ మూమెంటమ్ క్వాలిటీ ఇండెక్స్ పెన్షన్ ఫండ్ పేరుతో కొత్త ఫండ్ లాంచ్ చేసింది. వ్యూహాత్మకంగా, మార్కెట్ లింక్డ్ సొల్యూషన్స్తో పెద్ద మొత్తంలో రిటైర్మెంట్ కార్పస్ ఏర్పాటు చేసుకునేలా ఈ సరికొత్త ఫండ్ని రూపొందించినట్లు టాటా ఏఐఏ లైఫ్ తెలిపింది. దీంతో ఆర్థిక భరోసా లభిస్తుందని పేర్కొంది. ఈ న్యూ ఫండ్ ఆఫర్ సబ్స్క్రిప్షన్ ఇప్పటికే మొదలైంది. ఫిబ్రవరి 28, 2025 వరకు సబ్స్క్రైబ్ చేసుకునేందుకు అవకాశం ఉంటుంది.
రిటైర్మెంట్ ప్లానింగ్ అనేది కేవలం పొదుపు ఒక్కటే కాదు రిస్క్ను బేరీజు వేసుకుంటూ సంపదను పెంచుకోవడం కూడా ముఖ్యమే. ఈ క్రమంలో మార్కెట్ వృద్ధిని అవకాశాలను అందిపుచ్చుకుంటూ క్వాంట్ ఆధారిత పెట్టుబడి వ్యూహాలతో పోర్ట్ఫోలియోను స్థిరంగా కొనసాగించేలా టాటా ఏఐఏ ఈ కొత్త ఫండ్ని డిజైన్ చేసినట్లు కంపెనీ తెలిపింది. ఈ ఫండ్లో పెట్టుబడి పెట్టడం ద్వారా పాలసీదారులకు దీర్ఘకాలిక క్యాపిటల్ బెనిఫిట్స్, స్మార్ట్ డైవెర్సిఫికేషన్, రిస్క్ ఆప్టిమైజ్డ్ ఇన్వెస్టింగ్, సౌకర్యవంతమైన పదవీ విరమణ ప్రణాళిక, నిధులను సులభంగా పొందడం వంటవి లభిస్తాయని పేర్కొంది.
మల్టీక్యాప్ మూమెంటమ్ క్వాలిటీ 50 ఇండెక్స్లోని కంపెనీలపై పెట్టుబడులు పెట్టనున్నారు. 80- 100 శాతం ఫండ్స్ని ఈక్విటీలు, ఈక్వీటీ సంబంధిత మార్గాల్లో ఇన్వెస్ట్ చేయనుండగా.. 0-20 శాతం ఫండ్స్ క్యాష్, మనీ మార్కెట్ సెక్యూరిటీల్లో ఇన్వెస్ట్ చేయనున్నట్లు టాటా ఏఐఏ లైఫ్ తెలిపింది. రిస్క్ను అంచనా వేస్తూ అధిక రాబడిని అందించేందుకు ఈ స్కీమ్ రూపొందించినట్లు తెలిపింది. ఫండ్ నిర్వాహణ ఛార్జ్ ఏడాదికి 1.35 శాతంగా ఉంటుందని తెలిపింది.
మరోవైపు.. జనవరి 31, 2025 నాటికి టాటా ఏఐఏ లైఫ్ ఇన్సూరెన్స్ మ్యూచువల్ ఫండ్స్ నిర్వహణ లోని ఆస్తుల విలువ భారీగానే పెరిగింది. ఇయర్ ఆన్ ఇయర్ ప్రాతిపాదికన చూస్తే 27.36 శాతం మేర పెరిగి రూ. 118,721 కోట్లకు చేరినట్లు కంపెనీ తెలిపింది. తమ కంపెనీకి చెందిన ఫండ్స్ ఇస్తున్న రిటర్న్స్తో ఎక్కువ మంది ఇన్వెస్టర్లు ముందుకొస్తున్నట్లు కంపెనీ పేర్కొంటొంది. ఈ క్రమంలోనే మరో కొత్త ఫండ్ని లాంచ్ చేస్తున్నట్లు తెలుస్తోంది. రిటైర్మెంట్ నాటికి హైరిటర్న్స్ అందుకోవాలని భావించే వారి కోసం ఈ కొత్త ఫండ్ రూపొందించినట్లు కంపెనీ వర్గాలు పేర్కొంటున్నాయి.
|
|