హైవేల నిర్మాణం.. ఇక మరింత క్వాలిటీగా

 భారత జాతీయ రహదారుల ప్రాధికార సంస్థ- ఎన్‌హెచ్ఏఐ.. సరికొత్త నిర్ణయానికి తెరలేపింది. నేషనల్ హైవేల నాణ్యతపై కొన్నిచోట్ల విమర్శలు రావడం, రహదారి నిర్మాణంలో జరుగుతున్న లోపాలను సరిదిద్దేందుకు చర్యలకు సిద్ధమైంది. ఈ క్రమంలోనే రోడ్డు నిర్మాణ నాణ్యతను పెంచడానికి.. రోడ్డు నిర్మాణ ప్రమాణాలను మరింత మెరుగుపరిచేందుకు మల్టీ లెవల్ క్వాలిటీ కంట్రోల్ సిస్టమ్‌ను అందుబాటులోకి తీసుకువచ్చింది. ఎన్‌హెచ్ఏఐ ప్రధాన కార్యాలయం నుంచి వన్ టైమ్ సోర్స్ ఆమోదాన్ని భర్తీ చేస్తూ దేశంలోని 5 జోన్లలో స్వతంత్ర ప్రాంతీయ నాణ్యత కార్యాలయాలను ఏర్పాటు చేయాలని ఎన్‌హెచ్ఏఐ ప్రతిపాదించింది. ఈ నిర్ణయం జాతీయ రహదారుల నాణ్యతను మెరుగుపరచడానికి ఒక కొత్త అడుగు అని నిపుణులు భావిస్తున్నారు.

అయితే ఈ 5 కొత్త కార్యాలయాలు ఎన్‌హెచ్ఏఐ ప్రమాణాలు, పరిశోధన, అభివృద్ధి, నాణ్యత విభాగం కింద పనిచేస్తాయని సంబంధిత వర్గాలు వెల్లడించాయి. ఇందులో ప్రతీ కార్యాలయానికి రీజినల్ క్వాలిటీ ఆఫీసర్లు నేతృత్వం వహించనున్నారు. ఈ రిజినల్ క్వాలిటీ ఆఫీసర్లు.. తమ జోన్‌లో నేషనల్ హైవేల నాణ్యత నియంత్రణ విషయాలను సమన్వయం చేయడం, నిర్వహించడం వంటి బాధ్యతలు చూసుకోనున్నారు. తమ అధికార పరిధిలోని ప్రాజెక్ట్ సైట్లలో సిమెంట్, స్టీల్, ఎమల్షన్ వంటి పదార్థాలను.. బేరింగ్లు.. విస్తరణ జాయింట్లు ఇతర భాగాల వంటి ఉత్పత్తులను సంవత్సరానికి రెండుసార్లు థర్డ్ పార్టీ ల్యాబ్‌ల ద్వారా పరీక్షలు నిర్వహిస్తూ ఉంటాయి.

అయితే ఈ మల్టీ లెవెల్ క్వాలిటీ కంట్రోల్ మెకానిజమ్‌ను మరింత క్రమబద్ధీకరించడానికి ఎన్‌హెచ్ఏఐ.. సిస్టమ్ ఆఫ్ ప్రాసెస్‌ను కూడా జారీ చేసింది. ఇందులో రీజినల్ క్వాలిటీ ఆఫీసర్ల బాధ్యతలు, విధులను కూడా వివరించింది. దేశంలో గత 10 ఏళ్లలో హైవేల అభివృద్ధి గణనీయంగా పెరిగింది. ఈ నేపథ్యంలోనే ఇప్పుడు హైవేల నిర్మాణ నాణ్యత, మరింత మెరుగ్గా నిర్వహించడంపై ఎన్‌హెచ్ఏఐ దృష్టి సారించింది.

ఈ నేపథ్యంలోనే దేశంలో జాతీయ రహదారుల నాణ్యతకు సంబంధించి వెల్లువెత్తుతున్న ఆందోళనలను పరిష్కరించేందుకు కేంద్ర రోడ్డు రవాణా, రహదారుల మంత్రిత్వ శాఖ ఇటీవల వరుస సమావేశాలు నిర్వహించింది. ఇటీవల ఢిల్లీ-జైపూర్ నేషనల్ హైవే, అమృత్‌సర్-జామ్‌నగర్ ఎకనామిక్ కారిడార్ వంటి జాతీయ రహదారుల నాణ్యత సరిగా లేకపోవడంతో కేంద్ర రహదారుల మంత్రిత్వ శాఖ సోషల్ మీడియాలో తీవ్ర విమర్శలు వెల్లువెత్తాయి. ఈ నేపథ్యంలోనే ఆయా నేషనల్ హైవేల నాణ్యత, నిర్మాణ పరిస్థితిపై కేంద్ర రోడ్డు రవాణా రహదారుల శాఖ మంత్రి నితిన్ గడ్కరీ తీవ్ర ఆందోళన వ్యక్తం చేశారు.