శ్రీవారి పాదాల సమీపంలో,,,తిరుమల కొండల్లో అగ్ని ప్రమాదం

కలియుగ ప్రత్యక్ష దైవం శ్రీనివాసుడు నెలవైన తిరుమల కొండల్లో అగ్నిప్రమాదం చోటుచేసుకుంది. తిరుమల కొండల్లో మంగళవారం మంటలు చెలరేగాయి. శిలాతోరణం, శ్రీవారిపాదాల దగ్గర మంటలు చెలరేగాయి. శ్రీవారి పాదాలకు వెళ్లే దారిలో ఉన్న అటవీ ప్రాంతంలో మంటలు చెలరేగాయి. దీంతో సమాచారం అందుకున్న అగ్నిమాపక సిబ్బంది.. వెంటనే ఫైరింజన్ల సాయంతో అక్కడకు చేరుకున్నారు. రెండు ఫైరింజన్లతో మంటలను నియంత్రించారు. అయితే మంటలు చెలరేగడానికి గల కారణాలు ఏంటనేదీ తెలియాల్సి ఉంది. దీనిపై అధికారులు ఆరా తీస్తున్నారు.

మరోవైపు తిరుమలలోని లడ్డూ కౌంటర్‌లోనూ ఇటీవల అగ్నిప్రమాదం జరిగింది. ఈ ఏడాది జనవరి నెలలో ఈ ఘటన జరిగింది. తిరుమలలోని 47వ లడ్డూ కౌంటర్‌లో షార్ట్ సర్క్యూట్ కారణంగా మంటలు ఎగసిపడ్డాయి. దీంతో భక్తులు భయాందోళనకు గురయ్యారు. లడ్డూ కౌంటర్‌లో ఉన్న కంప్యూటర్ సిస్టమ్‌ యూపీఎస్‌లో కరెంట్ షార్ట్ సర్క్యూట్ జరిగి మంటలు చెలరేగాయి. దీంతో లడ్డూ కౌంటర్ పొగతో నిండుకుంది. టీటీడీ సిబ్బంది వెంటనే అప్రమత్తమై మంటలను ఆర్పివేశారు. దెబ్బతిన్న కంప్యూటర్ సిస్టమ్‌ను పునరుద్ధరించారు.

తిరుమలలో శిలాతోరణానికి వెళ్లే దారిలో శ్రీవారి పాదాలు ప్రాంతం ఉంది. పురాణాల ప్రకారం.. నారాయణుడు మొదట కాలుమోపిన ప్రాంతం ఇదేనని చెప్తారు. ఇక్కడ శ్రీవారి పాదముద్రలు కూడా ఉన్నాయి. అందుకే ఈ ప్రాంతానికి శ్రీవారి పాదాలు అనే పేరు వచ్చింది. శ్రీవారి పాదాలను తాకితే మంచి జరుగుతుందనే ఉద్దేశంతో నారాయణగిరిపైన ఉన్న శ్రీవారి పాదాలను భక్తులు దర్శించుకుంటూ ఉంటారు. తిరుమలను సందర్శించే చాలా మంది భక్తులు, ప్రకృతి సహజ అందాలను వీక్షించేందుకు అలాగే శ్రీవారి పాదాలను స్పశించేందుకు ఇక్కడికి వస్తుంటారు. చుట్టూ పచ్చదనంతో శ్రీవారి పాదాలు ప్రాంతం అందంగా కనిపిస్తుంది.

తిరుమల కొండలపై ఉన్న గోగర్భం, పాపవినాశనం, వేణుగోపాల ఆలయం వంటి కొన్ని ప్రదేశాలు ఆకాశగంగ తీర్థం వెళ్ళే మార్గంలో ఉన్నాయి. యాత్రికులు టీటీడీ ఏర్పాటు చేసిన ఉచిత బస్సు లేదా ప్రైవేట్ టాక్సీల ద్వారా ఇక్కడకు చేరుకోవచ్చు. తిరుమల సీఆర్వో కార్యాలయం సమీపం నుంచి శ్రీవారి పాదాలకు ఆర్టీసీ బస్సులు అందుబాటులో ఉంటాయి. ఉదయం 5 గంటల నుంచి ప్రతి పదీ, 20 నిమిషాలకో బస్సు అందుబాటులో ఉంటుంది. ప్రైవేట్ టాక్సీలు కూడా శ్రీ వారి పాదాలు నడుస్తుంటాయి.