విశాఖ కోర్టు సంచలన తీర్పు.. అప్పలరాజుకు ఉరిశిక్ష

విశాఖ న్యాయస్థానం సంచలన తీర్పు వెలువరించింది. ఒకే కుటుంబంలోని ఆరుగురు సభ్యులను హత్య చేసిన కేసులో అప్పలరాజు అనే వ్యక్తికి విశాఖపట్నం కోర్టు ఉరిశిక్ష విధిస్తూ సంచలన నిర్ణయం తీసుకుంది. 2021 ఏప్రిల్ 15న విశాఖపట్నం జిల్లా పెందుర్తి మండలం జుత్తాడ గ్రామంలో జరిగిన ఈ హత్యాకాండ.. ఆనాడు రాష్ట్రవ్యాప్తంగా తీవ్ర సంచలనం రేపింది. నిందితుడు బత్తిన అప్పలరాజు అనే వ్యక్తి.. బమ్మిడి రమణ కుటుంబానికి చెందిన ఆరుగురిని అత్యంత కిరాతకంగా నరికి చంపాడు. అప్పల రాజు ఈ దారుణానికి ఒడిగట్టడానికి బమ్మిడి రమణ కుమారుడు విజయ్‌ కిరణ్ కారణమేనని పోలీసులు నిర్ధారించారు.

2018లో అప్పలరాజు కూతురుపై.. రమణ కుమారుడు విజయ్ కిరణ్.. వేధింపులకు పాల్పడ్డాడని ఆరోపణలు ఉన్నాయి. ఇదే విషయంపై అప్పలరాజు కుటుంబం పోలీసులకు ఫిర్యాదు చేసింది. కేసు నమోదు చేసుకున్న పోలీసులు విజయ్‌ను అరెస్టు చేశారు. ఈ ఘటన తర్వాత విజయ్‌ భార్య ఉషారాణి అప్పలరాజు కుటుంబంపై ఫిర్యాదు చేసింది.

దీంతో మృగాడిలా మారిన అప్పలరాజు 2021 ఏప్రిల్ 15న ఉదయం ఐదున్నర గంటల ప్రాంతంలో రమణ ఇంట్లోకి ప్రవేశించాడు. గాఢనిద్రలో ఉన్న ఆరుగురు.. అంటే బమ్మిడి రమణ కుటుంబ సభ్యుల్ని పావు గంటలో అత్యంత దారుణంగా ప్రాణాలు తీశాడు. మృతుల్లో రమణ, అతని కోడలు ఉషారాణి, ఆమె తల్లి రమాదేవి, పిన్ని అరుణ, చిన్నారులు ఉదయనందన్, ఆరు నెలల చిన్నారి ఉర్విష ఉన్నారు. హత్యలు చేసిన అనంతరం అప్పలరాజు పోలీసులకు లొంగిపోయాడు.

 తాజాగా ఇదే కేసులో విశాఖ కోర్టు తీర్పును వెలువరించింది. అమానుషంగా ఆరుగురి హత్య చేసిన నిందితుడు బత్తిన అప్పలరాజుకు ఉరిశిక్ష విధించింది. పోలీసుల సాక్ష్యాధారాల పరిశీలన అనంతరం.. నిందితుడు అప్పలరాజు, ఒకే కుటుంబానికి చెందిన ఆరుగురిని కిరాతకంగా హత్య చేసినట్లు కోర్టు తేల్చింది. కోర్టులో జరిగిన విచారణలో ప్రాసిక్యూషన్ వారు బలమైన ఆధారాలను సమర్పించడంతో, న్యాయమూర్తి ఈ కేసును అత్యంత దారుణమైన నేరంగా పరిగణించారు. నిందితుడికి ఉరిశిక్షనే సరియైనది అంటూ శిక్ష ఖరారు చేశారు. అటు జిల్లా కోర్టు తీర్పును బాధిత కుంటుంబం స్వాగతించింది.