సైనికుడి మృతదేహంపై తలవాల్చి కన్నీరు పెట్టుకున్న కిమ్‌

ఉత్తరకొరియా అధ్యక్షుడు కిమ్ జోంగ్ ఉన్ పేరు చెబితేనే జాలి, దయ ఏమాత్రం లేని వ్యక్తిగా చాలా మందిలో ఒక అభిప్రాయం పాతుకుపోయింది. భయంకరమైన నియంతగా పేరు తెచ్చుకున్నారు. ఆయన చేసే అరాచకాలు, విధించే భయంకరమై శిక్షలు, నియంతృత్వ పోకడల గురించి నిత్యం మీడియాలో రకరకాల కథనాలు ప్రసారం అవుతుంటాయి. ఓవైపు తన దేశంలో ప్రజలు ఆకలితో అలమటిస్తున్నా.. అవేవి పట్టించుకోకుండా క్షిపణి పరీక్షల మీదనే దృష్టి సారించి విమర్శల పాలవుతుంటారు. ఇదిలా ఉంటే ఇప్పటి వరకు కిమ్ కఠినత్వాన్నే చూసిన వారు.. తాజాగా ఆయన కంటతడి పెట్టడం చూసి ఆశ్చర్యపోతున్నారు. మరి ఈ అరుదైన సంఘటన ఎప్పుడు చోటు చేసుకుంది.. కిమ్‌ని అంతలా కదిలించిన సంఘటన ఏదంటే..

ఉత్తర కొరియా నియంత కిమ్ జోంగ్ ఉన్ .. రష్యా తరపున యుద్ధంలో పాల్గొని.. కన్నుమూసిన సైనికుడి మృతదేహాన్ని చూసి భావోద్వేగానికి గురయ్యారు. రష్యా, ఉత్తర కొరియా మధ్య సైనిక ఒప్పందం జరిగి సంవత్సర కాలం పూర్తయిన సందర్భంగా తూర్పు ప్యాంగ్‌యాంగ్‌లో ఒక కార్యక్రమాన్ని నిర్వహించారు. దీనిలో చనిపోయిన సైనికులను శవపేటికలను ప్రదర్శించారు. ఉత్తర కొరియా జాతీయ జెండా కప్పిన ఆరు శవపేటికలను చూసి చూసి కిమ్ చలించిపోయారు. ఆ సైనికుల మృతదేహాలపై చేతులు వేసి నివాళులు అర్పించారు. యుద్ధంలో మరణించిన సైనికులను తలచుకుని ఆయన తీవ్ర భావోద్వేగానికి గురయ్యారు. కంటతడి పెట్టుకున్నారు.

ఇక ఈ కార్యక్రమంలో సైనికులు తమ రక్తంతో రాసిన నోట్‌బుక్ ఫోటోలను కూడా ప్రదర్శించారు. దీన్నిచూసి ఆ హాల్‌లో ఉన్న రష్యా, ఉత్తర కొరియా అధికారులు కన్నీళ్లు పెట్టుకున్నారు. ఇదే సమయంలో కిమ్, ఆయన కుమార్తె కూడా అదే హాల్‌లో ఉన్నారు. ప్రసారం అవుతన్న దృశ్యాలను చూసి కిమ్ కూడా తీవ్ర భావోద్వేగానికి గురైనట్లు వీడియోలో స్పష్టంగా కనిపిస్తుంది. ప్రస్తుతం ఈ వీడియో సోషల్ మీడియాలో వైరల్ అవుతోంది. సైనికులు నోట్ బుక్‌లో తమ రక్తంతో.. నిర్ణయాత్మక సమయం వచ్చేసింది. మనపై నమ్మకం ఉంచిన సుప్రీం కమాండర్ కోసం ధైర్యంగా పోరాడాలి అని రాసుకున్నట్లు ఉంది.

అయితే ఈ కార్యక్రమం ఎప్పుడు జరిగింది అనే దానిపై స్పష్టత లేదు. కానీ వీడియోలో కిమ్ జోంగ్ ఉన్, అతడి సోదరి కిమ్ యో జోంగ్ విదేశాంగ మంత్రి చోయ్ సోన్ హుయ్ సహా ఇతర అధికారులు చలికాలం దుస్తులు ధరించి ఉన్నారు. దీన్ని బట్టి చూస్తే.. సైనికుల మృతదేహాలను చాలా రోజుల క్రితమే ఉత్తర కొరియాకు పంపినట్లు అర్థం అవుతుంది. అయితే గత కొన్ని నెలలుగా ఉత్తర కొరియా తమ సైనికులు రష్యా యుద్ధంలో లేరని చెబుతూ వస్తోంది. కానీ ఇప్పుడు విడుదలైన ఈ వీడియోతో ఉక్రెయిన్ యుద్ధంలో ఉత్తర కొరియా కూడా మాస్కోకు సపోర్ట్ చేస్తున్నట్లు వెల్లడైంది. అంటే, ఉత్తర కొరియా సైనికులు కూడా ఉక్రెయిన్‌లో రష్యా తరపున పోరాడుతున్నారని అర్థం చేసుకోవచ్చు.