ఒక్క ఓటు తేడాతో అమెరికా సెనేట్లో వన్ బిగ్ బ్యూటీఫుల్ బిల్లు ఆమోదం

అమెరికా అధ్యక్షుడు డొనాల్డ్ ట్రంప్ తీసుకొచ్చిన ‘వన్ బిగ్ బ్యూటీఫుల్ బిల్’ సెనెట్లో అతికష్టం మీద ఆమోదం పొందింది. ఈ బిల్లుకు అనుకూలంగా 50 ఓట్లు, ప్రతికూలంగా 50 ఓట్లు రావడంతో టై అయ్యింది. ఈ పరిస్థితిలో అమెరికా ఉపాధ్యక్షుడు జేడీ వాన్స్ ఈ బిల్లుకు అనుకూలంగా ఓటేయడంతో 51-50 ఓట్ల తేడాతో ఆమోదం పొందింది. ఈ బిల్లును అధికార రిపబ్లికన్ పార్టీకి చెందిన ముగ్గురు సభ్యులు వ్యతిరేకించడం గమనార్హం. సెనెట్లో ఆమోదం పొందడంతో తుది ఓటింగ్ కోసం ప్రతినిధుల సభకు చేరింది. ఈ బిల్లును జూలై 4 గడువులోగా చట్టంగా మార్చడానికి ట్రంప్ ప్రయత్నిస్తున్నారు.

2017 నాటి పన్ను తగ్గింపులను పొడిగించడంతోపాటు కార్మికులు, వ్యాపారాలకు కొత్త ప్రయోజనాలను కల్పించడం, క్లీన్ ఎనర్జీ ప్రోత్సాహకాలను తగ్గించడం, మెడికేయిడ్, ఫుడ్ అసిస్టెన్స్‌తోపాటు సేఫ్టీ నెట్ పథకాలకు అందిస్తోన్న నిధుల్లో కోత విధించడం మొదలైనవి ఈ బిల్లులో ఉన్నాయి.

సైనిక వ్యయాన్ని 150 బిలియన్ డాలర్లు పెంచడంతోపాటు.. అమెరికా అధ్యక్షుడు ట్రంప్ చేపట్టిన అక్రమ వలసదారులను వెనక్కి పంపే కార్యక్రమానికి ఈ బిల్లు అవకాశం కల్పిస్తుంది. ట్రంప్ మొదటి టర్మ్ నాటి పన్ను తగ్గింపులను (4.5 ట్రిలియన్ డాలర్లు) ఈ బిల్లు పొడిగిస్తుంది.

మెడికేయిడ్ ఆరోగ్య బీమా కార్యక్రమంపై పదేళ్ల కాలంలో సుమారు 1 ట్రిలియన్ డాలర్ల మేర కోతలను ఈ బిల్లులో ప్రతిపాదించారు. దీని వల్ల అల్పాదాయ వర్గాలు, వికలాంగ అమెరికన్లు సుమారు 11 మిలియన్ల మంది ఆరోగ్య బీమాను కోల్పోయే ప్రమాదం ఉంది. మెడికేయిడ్ కోతల వల్ల గ్రామీణ ప్రాంత ప్రజలు ఇబ్బంది పడే అవకాశం ఉండటంతో రూరల్ హాస్పిటళ్ల ఏర్పాటు కోసం 50 బిలియన్ డాలర్ల నిధిని ఏర్పాటు చేయాలని ఇందులో ప్రతిపాదించారు.

ఇప్పటి వరకూ అమెరికా సర్కారు పర్యావరణహితమైన ఎలక్ట్రిక్ వాహనాలు, గ్రీన్ ఎనర్జీకి (సౌర విద్యుత్, పవన్ విద్యుత్‌కు) రాయితీలు ఇస్తోంది. 7500 డాలర్ల విలువైన ఈవీ ట్యాక్స్ క్రెడిట్‌ను సెప్టెంబర్ 30 నాటికి ముగించేలా ఈ బిల్లులో ప్రతిపాదనలు ఉన్నాయి. ఈ అంశం టెస్లా అధినేత ఎలాన్ మస్క్‌కు ఆగ్రహం తెప్పిస్తోంది. ఈ బిల్లును ఆమోదిస్తే కొత్త రాజకీయ పార్టీ పెడతానని మస్క్ హెచ్చరిస్తున్నారు.

సరిహద్దుల్లో మౌలిక సదుపాయాల కల్పన, అక్రమ వలసదారులను తిరిగి పంపించడం కోసం 92 బిలియన్ డాలర్లు కేటాయించాలని వన్ బిగ్ బ్యూటిఫుల్ బిల్‌లో ప్రతిపాదించారు. అలాగే విదేశాలకు పంపించే నగదుపై 1 శాతం రెమిటెన్స్ ట్యాక్స్ విధించాలని ప్రతిపాదించారు. ఇంతకు ముందు ఈ రెమిటెన్స్ ట్యాక్స్‌ను 3.5 శాతంగా ప్రతిపాదించినప్పటికీ.. తర్వాత 1 శాతానికి తగ్గించారు.

ధనిక యూనివర్సిటీలపై గరిష్టంగా 8 శాతం వరకూ పన్ను విధించాలని ఈ బిల్లులో ప్రతిపాదించారు. సెమీకండర్ల సెక్టార్‌కు ఊతం ఇచ్చేలా.. చిప్‌ల తయారీ పరిశ్రమలకు పన్ను రాయితీలను 25 శాతం నుంచి 35 శాతానికి పెంచాలని వన్ బ్యూటిఫుల్ బిగ్ బిల్లులో ప్రతిపాదించారు.