పీరియడ్స్ సమయంలో రక్తం గడ్డకట్టడాన్ని ఆపే ఓ చిన్న చిట్కా

పీరియడ్స్ మహిళల్లో సాధారణంగా జరిగే ప్రక్రియ. ప్రతి నెలా నాలుగు నుంచి ఐదు రోజులు మహిళలు ఈ సమస్యను ఎదుర్కొంటారు. పీరియడ్స్ సమయంలో మహిళలు చాలా మార్పులు, సమస్యలను ఎదుర్కోవలసి ఉంటుంది. ఒళ్లంతా నొప్పులు, కడుపులో నొప్పి, కాళ్ల లాగేయడం ఇలా ఎన్నో సమస్యలు ఎదుర్కొంటారు. వీటిలో ఒకటి రక్తం గడ్డకట్టడం. సాధారణంగా రక్తం చిన్న చిన్న గడ్డలు కడితే అంతగా ఆందోళన చెందాల్సిన పనిలేదు. అదే గడ్డల సైజు పెరిగితే ఆందోళన చెందాలని నిపుణులు అంటున్నారు. పీరియడ్స్ సమయంలో రక్తం గడ్డకట్టడాన్ని తగ్గించడానికి న్యూట్రిషనిస్ట్ శ్వేతా షా ఓ చిట్కా చెప్పారు. ఆ పూర్తి వివరాలు ఇప్పుడు తెలుసుకుందాం.

శ్వేతా షా ఏమంటున్నారు?

లేటెస్ట్‌గా ప్రముఖ సెలబ్రిటీ, ఆయుర్వేద పోషకాహార నిపుణురాలు శ్వేతా షా తన ఇన్‌స్టాగ్రామ్ హ్యాండిల్‌లో ఒక పోస్ట్ పంచుకున్నారు. ఈ వీడియోలో పీరియడ్స్ సమయంలో రక్తం గడ్డకట్టడాన్ని నిరోధించే చిట్కా గురించి చెప్పారు. పీరియడ్స్ సమయంలో బఠానీ అంత సైజులోని గడ్డలు వస్తే, అది పూర్తిగా సాధారణం. శరీరం గర్భాశయం యొక్క లైనింగ్‌ను బయటకు పంపినప్పుడు ఇది తరచుగా జరుగుతుంది. కానీ గడ్డలు పెద్దవిగా ఉండి పదే పదే వస్తుంటే, అది శరీరానికి అదనపు జాగ్రత్త అవసరమని సూచిస్తుంది. ఈ సమస్యను తగ్గించడానికి ఆమె ఓ డ్రింక్ చెప్పారు.

డ్రింక్ కోసం కావాల్సిన పదార్థాలు

అర్జున బెరడు - రెండు అంగుళాలు

అతిమధురం - ఒక అంగుళం ముక్క

నీళ్లు - 200 మి.లీ

న్యూట్రిషనిస్ట్ శ్వేతా షా షేర్ చేసిన వీడియో

డ్రింక్ తయారీ విధానం

పీరియడ్స్ సమయంలో అధిక రక్తస్రావం, గడ్డకట్టడాన్ని తగ్గించడంలో సాయపడే సులభమైన ఇంటి చిట్కాను న్యూట్రిషనిస్ట్ శ్వేతా షా పంచుకున్నారు. ఇందుకోసం ముందుగా నీళ్లు తీసుకుని ఒక పాత్రలో వేసి మరిగించాలి. నీరు మరిగేటప్పుడు అర్జున బెరడు, అతిమధురం వేసి బాగా మరిగించాలి. నీరు పాత్రలో సగం వచ్చే వరకు మరిగించాలి. ఆ తర్వాత స్టౌ ఆఫ్ చేసి.. నీటిని ఫిల్టర్ చేసి గోరువెచ్చగా తాగాలి. ఈ నీటిని ఉదయం ఖాళీ కడుపుతో తాగితే మంచి ఫలితాలుంటాయని శ్వేతా షా చెబుతున్నారు.

ఈ డ్రింక్ వల్ల ప్రయోజనాలు

* ఈ డ్రింక్ తాగడం వల్ల హార్మోన్లను సమతుల్యం చేయవచ్చని శ్వేతా షా అంటున్నారు.

* రక్తస్రావాన్ని నియంత్రించడంలో సాయపడుతుందని నిపుణులు అంటున్నారు.

* ఇది బుతుక్రమ నొప్పి నుంచి ఉపశమనం కూడా అందిస్తుందని న్యూట్రిషనిస్ట్ చెబుతున్నారు.

* అర్జున బెరడు శరీరంలోని ఫ్రీ రాడికల్స్‌ను తొలగించడానికి సాయపడతాయి.

* అంతేకాకుండా పీరియడ్స్‌లో వచ్చే మూడ్ స్వింగ్స్‌ను అర్జున బెరడు నియంత్రిస్తుంది. రక్త ప్రసరణ సాఫీగా జరిగేలా చూస్తుంది.

ముఖ్య విషయాలు

* రక్తం గడ్డలు కట్టడం ఎక్కువగా ఉంటే జాగ్రత్త ముఖ్యం. దీంతో పాటు మీకు తలతిరుగుతున్నట్టు లేదా తీవ్ర బలహీనతను ఎదుర్కొంటున్నట్లయితే.. వైద్యుణ్ని సంప్రదించండి.

* ఈ సమస్య ఐరన్ లోపం, గర్భాశయంలోని ఫైబ్రాయిడ్లు లేదా థైరాయిడ్ సమస్య వల్ల సంభవించవచ్చు. అందుకే వైద్యుణ్ని సంప్రదించడం చాలా ముఖ్యం.