పదేళ్లనాటి రూ.86 కోట్ల స్కామ్‌లో సతీష్ కృష్ణ అరెస్ట్

బహుళ కోట్ల మనీ లాండరింగ్ దర్యాప్తులో భాగంగా.. అక్రమ ఇనుప ఖనిజం ఎగుమతి కేసులో కర్ణాటకలోని కార్వార్ ఎమ్మెల్యే సతీష్ కృష్ణ సైల్‌ను ఎన్‌ఫోర్స్‌మెంట్ డైరెక్టరేట్ (ఈడీ) అరెస్టు చేసింది. బెంగళూరులోని ఈడీ జోనల్ కార్యాలయం అధికారులు ఆయన్ను సోమవారం రాత్రి అదుపులోకి తీసుకున్నారు. మంగళవారం ఆయన్ను కోర్టులో హాజరు పరిచారు. అయితే ఈ అరెస్టుకు ముందు ఈడీ అధికారులు.. ఆగస్టు 13, 14వ తేదీల్లో కార్వార్ (ఉత్తర కన్నడ), గోవా, ముంబై, న్యూఢిల్లీలోని పలు ప్రాంతాల్లో మనీ లాండరింగ్ నిరోధక చట్టం 2002 కింద సోదాలు నిర్వహించారు.

ప్రత్యేక కోర్టు ద్వారా ఈడీ దర్యాప్తు ప్రారంభం అయంది. ఈ కోర్టును ఎంపీలు, ఎమ్మెల్యేల కోసం బెంగళూరులో ఏర్పాటు చేశారు. 2010 ఏప్రిల్ నుంచి జూన్ మధ్య కాలంలో 1.25 లక్షల మెట్రిక్ టన్నుల ఇనుప ఖనిజం అక్రమ ఎగుమతుల కేసులో ఈడీ తన దర్యాప్తును ప్రారంభించింది. అటవీ శాఖ, అంకోలా అప్పటికే ఇనుప ఖనిజాన్ని స్వాధీనం చేసుకున్నప్పటికీ.. సతీష్ సైల్ వ్యాపార సంస్థలు, పోర్టు అధికారులతో కుమ్మక్కై రూ. 86.78 కోట్ల విలువైన ఖనిజాన్ని అక్రమంగా ఎగుమతి చేసినట్లు దర్యాప్తులో తేలింది.

ఈ సోదాల సందర్భంగా సతీష్ సైల్ నివాసం నుంచి రూ. 1.41 కోట్లు నగదు, శ్రీ లాల్ మహల్ లిమిటెడ్ కార్యాలయం నుంచి రూ. 27 లక్షలు నగదు, సైల్ కుటుంబం బ్యాంక్ లాకర్‌లో 6.75 కిలోల బంగారు ఆభరణాలు, కడ్డీలను ఈడీ అధికారులు స్వాధీనం చేసుకున్నారు. దీంతో పాటు శ్రీ మల్లికార్జున షిప్పింగ్ ప్రైవేట్ లిమిటెడ్, సతీష్ సైల్, ఇతరులకు చెందిన రూ. 14.13 కోట్ల విలువైన బ్యాంకు ఖాతాలను కూడా ఈడీ నిలిపివేసింది. దర్యాప్తుదారులు నేరపూరిత పత్రాలు, ఇమెయిల్స్, మరియు ఇతర ఆధారాలను కూడా స్వాధీనం చేసుకున్నారు.

ఈ అక్రమ ఎగుమతులకు సంబంధించి పలు సంస్థలపై దర్యాప్తు జరుగుతోంది. వాటిలో ఆశపురా మైనేకెమ్ లిమిటెడ్, శ్రీ లాల్ మహల్ లిమిటెడ్, స్వస్తిక్ స్టీల్స్ ప్రైవేట్ లిమిటెడ్, ఐఎల్‌సి ఇండస్ట్రీస్ లిమిటెడ్, శ్రీ లక్ష్మీ వెంకటేశ్వర మినరల్స్ లిమిటెడ్ ఉన్నాయి. ఈ ఘటన కర్ణాటక రాజకీయాల్లో ప్రకంపనలు సృష్టించింది. ఒక సిట్టింగ్ ఎమ్మెల్యేను అక్రమాల కేసులో అరెస్టు చేయడం రాజకీయ వర్గాల్లో సంచలనం కలిగించింది. ఈ అరెస్టుతో రాష్ట్రంలో రాజకీయాలు మరింత వేడెక్కే అవకాశం ఉంది. రాబోయే రోజుల్లో ఈ కేసులో మరిన్ని అరెస్టులు, దర్యాప్తు చర్యలు ఉండవచ్చని ఈడీ వర్గాలు వెల్లడించాయి.