బంగారం అంతా బ్యాంకుల్లోనే.. తులం బంగారంపై ఎంత లోన్ వస్తుందో లెక్కలివే

మీరు బ్యాంక్‌లో లోన్ కోసం చూస్తున్నారా? పర్సనల్ లోన్ తీసుకుంటున్నారా.. ఇక్కడ ఇటీవల ఆర్బీఐ నిబంధనల్ని కఠినతరం చేస్తున్న సంగతి తెలిసిందే. ఇంకా వడ్డీ రేట్లు కూడా ఎక్కువగా ఉంటున్నాయి. ఇదే సమయంలో.. ఇవి రావడం కూడా కష్టమే. ఇక్కడ మెరుగైన సిబిల్ స్కోరు ఉండాలి. అందుకే.. చాలా మంది దీనికి ప్రత్యామ్నాయంగా బంగారాన్ని చూస్తున్నారు. అంటే ఇక్కడ బంగారు ఆభరణాలు తాకట్టు పెట్టి లోన్ తీసుకునే వారి సంఖ్య పెరుగుతుందన్నమాట. ఇక్కడ ఎలాంటి రిస్క్ ఉండదు. ఇంకా వడ్డీ రేట్లు తక్కువగా ఉంటుంది. బ్యాంకులో బంగారం సురక్షితంగా ఉంటుంది. సిబిల్ స్కోరుతో పనిలేదు. ఇదే సమయంలో బంగారం ధరలు ఇటీవలి కాలంలో భారీగా పెరుగుతున్న నేపథ్యంలో.. బంగారం విలువలో లోన్ కూడా గతంలో కంటే కాస్త ఎక్కువే పొందుతున్నారని చెప్పొచ్చు.

ఇప్పుడు బంగారం తాకట్టుపై తీసుకున్న లోన్ల మొత్తం విలువ ఆగస్ట్ నెలలో ఆల్ టైమ్ గరిష్ట స్థాయిని తాకడం విశేషం. అంటే ఈ గోల్డ్ లోన్ పోర్ట్‌ఫోలియో రూ. 2.94 లక్షల కోట్లకు చేరింది. 2024 ఏప్రిల్ నెలలో చూస్తే ఇది కేవలం రూ. 1.02 లక్షల కోట్లుగానే ఉంది. వరుసగా 15వ నెలా ఈ మొత్తం పెరగడం విశేషం అని చెప్పొచ్చు. ఇక ఈ మార్చి నుంచి చూస్తే.. జువెల్లరీపై గోల్డ్ లోన్.. ఏడాది ప్రాతిపదికన ప్రతి నెలా 100 శాతం చొప్పున వృద్ధి నమోదవుతూ వస్తోంది. అంటే బంగారాన్ని బ్యాంకుల్లో పెట్టే వారి సంఖ్య పెరుగుతూనే ఉందని చెప్పొచ్చు.

  >> బంగారం ధర ఈ ఏడాదిలోనే ఇప్పటివరకు దాదాపు 40 శాతం వరకు పెరిగింది. దీనికి తగ్గట్లుగానే.. తులం బంగారంపై గతంలో కంటే ఇంకాస్త ఎక్కువ లోన్ వస్తుంది. ఇటీవల జూన్ నెలలో బంగారం తాకట్టు పెట్టి తీసుకునే లోన్లపై ఆర్బీఐ కొత్త మార్గదర్శకాల్ని కూడా విడుదల చేసిన సంగతి తెలిసిందే. దీని ప్రకారం.. ఈటీఎఫ్ (ఎక్స్చేంజ్ ట్రేడెడ్ ఫండ్స్), గోల్డ్ మ్యూచువల్ ఫండ్స్ యూనిట్ల ఆధారంగా లోన్లు మంజూరు చేసేందుకు వీల్లేదు.

మరోవైపు గోల్డ్ లోన్స్.. లోన్ టు వాల్యూ రేషియోను కూడా సవరించింది ఆర్బీఐ. దీని ప్రకారం.. రూ. 2.5 లక్షల కంటే తక్కువ లోన్లు తీసుకునే వారికి దీనిని 85 శాతంగా నిర్ణయించింది. అంటే రూ. 1 లక్ష విలువైన బంగారంపై అప్పుడు రూ. 85 వేల వరకు లోన్ వస్తుంది. ఇప్పుడు తులం దాదాపు ఇంతే ఉంది కాబట్టి.. తులం గోల్డ్‌పై రూ. 85 వేల లోన్ మీకు వస్తుంది. అది రూ. 2.50 లక్షల లోపు రుణం తీసుకుంటేనే. ఇది రూ. 2.5- 5 లక్షల మధ్య అయితే 80 శాతం అంటే రూ. 80 వేల లోన్ వస్తుంది. రూ .5 లక్షలు దాటితే.. బంగారం విలువలో 75 శాతం వరకు లోన్ మంజూరు చేయొచ్చు. కొన్ని బ్యాంకులు ఇంత కంటే కాస్త ఎక్కువ ఇచ్చేవి కూడా ఉన్నాయి.