అధికారుల ఆదేశాలు బేఖాతర్.... ఏపీ ఇదీ పరిస్థితి

ఎక్కడైనా సమస్య ఉత్పన్నమైనప్పుడు పరిష్కారం కోసం ఓపిక అవసరం. అదే ఆరోగ్యానికి సంబంధించిన విషయమైతే ప్రభుత్వం , అధికారుల సూచనలు పాటించడం తప్పనిసరి. కరోనా సమయంలో ప్రజలంతా ఈ ఆదేశాలను తు.చా తప్పకుండా పాటించారు. ఎందుకంటే ప్రజారోగ్యానికి సంబంధించిన విషయంలో ప్రభుత్వంతో కలిసి పౌరులు పనిచేస్తేనే మెరుగైన ఫలితాలు లభిస్తాయి. అయితే విజయవాడలోని న్యూరాజరాజేశ్వరిపేటలో మాత్రం విచిత్రమైన పరిస్థితి నెలకొంది. అధికారులు ఆదేశాలు జారీ చేసినా, ముందస్తుగా హెచ్చరించినా జనం మాట వినని పరిస్థితి. ఆదివారం చికెన్ మార్కెట్ల వద్ద పరిస్థితిని గమనిస్తే ఈ విషయం వెల్లడైంది.

న్యూరాజరాజేశ్వరిపేటలో డయేరియా కేసులు వెలుగుచూడటంతో ప్రభుత్వం, అధికారులు అప్రమత్తమయ్యారు. ప్రజలు మాంసం వినియోగం తగ్గించాలని సూచించారు. అలాగే న్యూరాజరాజేశ్వరిపేటలో మాంసం దుకాణాలను మూసివేయాలని విజయవాడ మున్సిపల్ కార్పొరేషన్ అధికారులు ఆదేశించారు. దీంతో ఆదివారం రోజున న్యూరాజరాజేశ్వరిపేటలోని మాంసం దుకాణాలను మూసివేశారు. అయితే స్థానికులు మాత్రం పొరుగున ఉన్న ప్రాంతాలకు వెళ్లి మరీ మాంసం కొనుగోలు చేయడం గమనార్హం. అధికారుల ఆదేశాలను బేఖాతరు చేస్తూ చాలా మంది.. అజిత్ సింగ్ నగర్, నున్న, ఇతర సమీప ప్రాంతాల్లోని చికెన్, చేపల దుకాణాలకు వెళ్లి మాంసం కొనుగోలు చేశారు. ఆదివారం కావటం.. సెలవు రోజున నాన్ వెజ్ వంటకాలు తినడం అలవాటు కావటంతో సమీప ప్రాంతాలకు వెళ్లి మాంసం కొనుగోలు చేశారు.

మరోవైపు విజయవాడ మున్సిపల్ కార్పొరేషన్ ఆదేశాలతో న్యూ రాజరాజేశ్వరిపేటలోని చికెన్ దుకాణాలు, రెస్టారెంట్లు, కర్రీపాయింట్లు, టీ స్టాల్స్, టిఫిన్ సెంటర్లు మూసివేశారు. ఒకటిన్నర కిలోమీటర్ల పరిధి మేరకు దుకాణాలను మూసివేశారు. అయితే స్థానికులు మాత్రం పొరుగున ఉన్న ప్రదేశాలకు వెళ్లి చికెన్, మటన్, చేపలు, బీఫ్ కొనుగోలు చేయడం గమనార్హం. అయితే డయేరియా బారిన పడిన కుటుంబాలు మాత్రం ఈ విషయంలో అధికారుల ఆదేశాలను తప్పకుండా పాటిస్తున్నాయి. డయేరియా బాధితుల ఆరోగ్యం క్రమంగా మెరుగుపరుతూ ఉండటంతో మాంసం వినియోగానికి ఆయా కుటుంబాలు దూరంగా ఉన్నాయి.

మరోవైపు ఆదివారం అజిత్ సింగ్ నగర్‌లో అధికారులు తనిఖీలు నిర్వహించారు. ఈ సందర్భంగా ఓ చికెన్‌ సెంటర్‌లో.. 30 కిలోలు పాడైపోయిన మాంసం నిల్వ ఉండటాన్ని గుర్తించారు. అలాగే ఓ బిరియానీ సెంటర్‌లో పాడైపోయిన ఐదు కేజీల చికెన్, గోంగూర కూర, చట్నీ గుర్తించి ధ్వంసం చేశారు. నిర్వాహకులకు చలానా విధించారు.