ఉద్ధృతంగా ప్రవహిస్తున్న వాగు.. బైక్‌తో పాటు కొట్టుకుపోయిన వ్యక్తి

వరంగల్ జిల్లాలో గత కొన్ని రోజులుగా కురుస్తున్న భారీ వర్షాల కారణంగా వాగులు, వంకలు ఉధృతంగా ప్రవహిస్తున్నాయి. ఈ క్రమంలో వరద ప్రవాహాన్ని తేలికగా తీసుకున్న ఓ యువకుడు బైక్‌తో సహా వాగులో కొట్టుకుపోయాడు. స్థానికులు వద్దని వారిస్తున్నా.. ఏమాత్రం వినకుండా నిర్లక్ష్యంగా వాగు దాటే ప్రయత్నం చేశాడు. ఈ క్రమంలో వాగులోనే కొట్టుకుపోయాడు. అయితే లక్కీగా అతడికి ఈత రావడంతో ప్రాణాపాయం నుంచి సురక్షితంగా బయటపడ్డాడు. ఈ ఘటన వరంగల్‌ జిల్లా మహాముత్తారం మండలం ములుగుపల్లి-అంశాపూర్‌ గ్రామాల మధ్య జరిగింది.

వాగు ఉధృతంగా ప్రవహిస్తున్నప్పటికీ.. బైక్‌పై ప్రయాణిస్తున్న రాజు అనే వ్యక్తి దానిని దాటేందుకు సాహసం చేశాడు. ప్రవాహం తీవ్రత ఎక్కువగా ఉండటంతో క్షణాల్లోనే బైక్‌తో పాటు వరదలో కొట్టుకుపోయాడు. అయితే.. రాజుకు ఈత రావడంతో వెంటనే తేరుకుని చాకచక్యంగా ఈదుకుంటూ ఒడ్డుకు చేరుకోగలిగాడు. అదృష్టవశాత్తు ప్రాణాలతో బయటపడినప్పటికీ.. అతని బైక్ మాత్రం వరదలో కొట్టుకుపోయింది.

ఇక తెలంగాణలో నిరంతరాయంగా కురుస్తున్న భారీ వర్షాలకు అన్ని ప్రాంతాల్లోనూ వాగులు, వంకలు, నదులు, చెరువులు ఉప్పొంగుతున్నాయి. పలుచోట్ల రోడ్లపై నుంచి కూడా వరద ప్రవహిస్తోంది. ఇటువంటి పరిస్థితుల్లో ప్రజలు అత్యంత అప్రమత్తంగా ఉండాలని జిల్లా యంత్రాంగం, పోలీసు శాఖ విజ్ఞప్తి చేస్తున్నాయి. వరద ప్రవాహం ఎక్కువగా ఉన్నప్పుడు ప్రజలు అనవసర సాహసాలు చేయకుండా తమ ప్రాణాలకు రక్షణ కల్పించుకోవాలని సూచిస్తున్నారు. వాగులు, వంకలు, కాలువలు ఉధృతంగా ప్రవహిస్తున్నప్పుడు వాటిని దాటేందుకు ఎట్టి పరిస్థితుల్లోనూ ప్రయత్నించవద్దని.. కొద్దిసేపు వేచి ఉండటం లేదా ప్రత్యామ్నాయ మార్గాలను ఎంచుకోవడం ఉత్తమమని అంటున్నారు.

కాజ్‌వేలు లేదా వంతెనల మీదుగా వరద నీరు ప్రవహిస్తున్నట్లయితే.. వాహనాలు లేదా నడుచుకుంటూ వెళ్లడం అత్యంత ప్రమాదకరమని.. నీటిమట్టం తగ్గే వరకు వేచి ఉండాలని అంటున్నారు. శిథిలావస్థలో ఉన్న గోడలు, పాత ఇళ్ల సమీపంలో నిలబడటం లేదా ఉండటం మానుకోవాలని.. సూచిస్తున్నారు. అధికారులు ఇచ్చే హెచ్చరికలను తప్పనిసరిగా పాటించాలని.. అప్పుడే వరద విపత్తుల నుంచి సురక్షితంగా బయటపడొచ్చని అంటున్నారు.