జంక్ ఫుడ్ తో వచ్చే మానసిక సమస్యలకు వ్యాయామంతో చెక్

జంక్ ఫుడ్ ఎక్కువగా తినడం వల్ల మానసిక ఆరోగ్యం దెబ్బతింటుందనే ఆందోళన చాలామందిలో ఉంది. అయితే, రన్నింగ్ వంటి కార్డియో వ్యాయామాలు చేయడం ద్వారా ఈ దుష్ప్రభావాలను చాలా వరకు తగ్గించుకోవచ్చని ఓ తాజా అధ్యయనం తేల్చిచెప్పింది. జంక్ ఫుడ్ తినే అలవాటు ఉన్నప్పటికీ, క్రమం తప్పని శారీరక శ్రమ మానసిక ఆరోగ్యాన్ని కాపాడటంలో కీలక పాత్ర పోషిస్తుందని ఈ పరిశోధన స్పష్టం చేస్తోంది.ఐర్లాండ్‌లోని యూనివర్సిటీ కాలేజ్ కార్క్ పరిశోధకులు జరిపిన ఈ అధ్యయన వివరాలను మంగళవారం ‘బ్రెయిన్ మెడిసిన్’ అనే జర్నల్‌లో ప్రచురించారు. ఈ పరిశోధన కోసం కొన్ని ఎలుకలను ఎంపిక చేసి, వాటిని రెండు గ్రూపులుగా విభజించారు. ఒక గ్రూపునకు సాధారణ ఆహారం, మరో గ్రూపునకు కొవ్వు, చక్కెర అధికంగా ఉండే జంక్ ఫుడ్ అందించారు. ఏడున్నర వారాల పాటు సాగిన ఈ పరిశోధనలో, రెండు గ్రూపుల్లోని సగం ఎలుకలకు రన్నింగ్ వీల్స్ అందుబాటులో ఉంచారు.జంక్ ఫుడ్ తిన్నప్పటికీ, క్రమం తప్పకుండా రన్నింగ్ చేసిన ఎలుకలలో డిప్రెషన్ వంటి ప్రవర్తనా లక్షణాలు గణనీయంగా తగ్గినట్లు శాస్త్రవేత్తలు గుర్తించారు. వ్యాయామం చేయడం వల్ల శరీరంలోని హార్మోన్లు, పేగుల్లో జరిగే జీవక్రియల ప్రక్రియపై సానుకూల ప్రభావం పడుతుందని వారు కనుగొన్నారు. ముఖ్యంగా, జంక్ ఫుడ్ కారణంగా తగ్గిపోయే అన్సెరిన్, ఇండోల్-3-కార్బాక్సిలేట్, డియోక్సినోసిన్ వంటి మూడు కీలకమైన జీవక్రియలువ్యాయామం వల్ల తిరిగి పాక్షికంగా పునరుద్ధ రించబడినట్లు వెల్లడించారు.ఈ సందర్భంగా వర్సిటీకి చెందిన ప్రొఫెసర్ యవొన్నె నోలన్ మాట్లాడుతూ, "అధికంగా ప్రాసెస్ చేసిన ఆహారం వినియోగం పెరిగిన ఈ రోజుల్లో, జీవనశైలిలో మార్పుల ద్వారా మానసిక ఆరోగ్యాన్ని ఎలా కాపాడుకోవచ్చో అర్థం చేసుకోవడానికి ఈ ఫలితాలు ఎంతగానో ఉపయోగపడతాయి" అని తెలిపారు. ఆహారంతో సంబంధం లేకుండా వ్యాయామం ఆందోళనను తగ్గించడంలో సహాయపడుతుందని కూడా ఈ అధ్యయనంలో తేలింది. అయితే, మెదడు పూర్తిస్థాయిలో ప్రయోజనం పొందాలంటే మంచి పోషకాహారం కూడా ముఖ్యమేనని పరిశోధకులు సూచిస్తున్నారు.