సీపీఎస్ రద్దుపై రోడ్ మ్యాప్ ప్రకటించాలి: యూటీఎఫ్
Andhra Pradesh Telugu | Suryaa Desk | Published : Thu, Mar 03, 2022, 12:27 PM
సీపీఎస్ రద్దుకు రోడ్ మ్యాపన్ను ప్రకటించి పాత పెన్షన్ విధానాన్ని పునరుద్ధరించాలని యూటీఎఫ్ రాష్ట్ర కమిటీ అధ్యక్ష, ప్రధాన కార్యదర్శులు ఎన్. వెంకటేశ్వర్లు, కేఎస్ఎస్ ప్రసాద్ ఒక ప్రకటనలో పేర్కొన్నారు. రిటైర్డ్ ఉద్యోగి జీవితానికి కనీస భద్రత కల్పించలేకపోతున్న కంట్రిబ్యూటరీ పెన్షన్ విధానాన్ని (సీపీఎస్) తాను అధికారంలోకి వచ్చిన వారం రోజుల్లోనే రద్దు చేస్తానన్న ముఖ్యమంత్రి జగన్ తన హామీని నిలబెట్టుకోవాలని కోరారు. సీపీఎస్ రద్దు చేసి పాత పెన్షన్ విధానాన్ని పునరుద్ధరిస్తున్నట్లు అసెంబ్లీ బడ్జెట్ సమావేశాల్లోనే తీర్మానం చేసి తన చిత్తశుద్ధిని చాటుకోవాలని డిమాండ్ చేశారు. అనేక వేదికలు, సభల్లో వారం రోజుల్లో సీపీఎస్ ను రద్దు చేస్తామని చెప్పిన ముఖ్యమంత్రి అధికారంలోకి వచ్చి 150 వారాలు గడిచినా స్పష్టమైన వైఖరి ప్రకటించకపోవడంతో రాష్ట్రంలో 2 లక్షల మంది ఉద్యోగులు ఆందోళన చెందుతున్నారని పేర్కొన్నారు. పీఆర్సీ చర్చల సందర్భంగా సీపీఎస్పై మార్చి 31లోగా రోడ్ మ్యాప్ ప్రకటిస్తామని చెప్పారు తప్ప రద్దు చేస్తామని ప్రకటించలేదని వారు గుర్తు చేశారు.
|
|