క్రేజీ ప్రాజెక్ట్ నుంచి నిత్యామీనన్ ఔట్!

కథ, సినిమాలో తన పాత్ర.. ఈ రెండూ నచ్చితేనే తప్ప సినిమాలు అంగీకరించదు హీరోయిన్ నిత్యామీనన్. సినిమాల ఎంపిక విషయంలో ఆచితూచి అడుగులు వేస్తుంటుంది ఈ బ్యూటీ. అందుకే నటిగా మంచి పేరు సంపాదించుకుంది. ఈ మధ్యకాలంలో ఆమె తెలుగులో నటించడం బాగా తగ్గించింది. మంచి అవకాశాలు రాకపోవడం వలనే తెలుగులో నటించడం లేదని గతంలో చెప్పుకొచ్చింది. ఈ క్రమంలో నాని నిర్మిస్తోన్న ‘అ!’ సినిమాలో నటించడానికి అంగీకరించింది. ఈ సినిమా ఫస్ట్‌లుక్ కూడా ఇటీవల విడుదలైంది. దీనికి మంచి స్పందన వస్తోంది.

ఇదిలా ఉంటే శర్వానంద్ హీరోగా సుధీర్ వర్మ దర్శకత్వంలో రాబోతున్న సినిమాకు కూడా నిత్యామీనన్ సైన్ చేసింది. సినిమా ఓపెనింగ్ రోజు చిత్రబృందం ఈ విషయాన్ని అధికారికంగా ప్రకటించింది. కానీ ఇప్పుడు ఉన్నట్టుండి నిత్య ఈ ప్రాజెక్ట్ నుంచి తప్పుకుందనే వార్తలు వినిపిస్తున్నాయి. క్రియేటివ్ డిఫరెన్సెస్ కారణంగా ఆమె ఈ ప్రాజెక్ట్ నుంచి వెళ్లిపోయిందని అంటున్నారు. సినిమాలో తనతో పాటు ఉన్న మరో హీరోయిన్ కాజల్ పాత్రకు ఎక్కువ ప్రాముఖ్యత ఉండడంతో నిత్య ఈ నిర్ణయం తీసుకుందని ఫిల్మ్ నగర్ టాక్. కారణమేదైనా దర్శక నిర్మాతలకు నిత్య గట్టి షాకే ఇచ్చింది. 

సితార ఎంటర్‌టైన్‌మెంట్స్ పతాకంపై నాగ వంశీ ఈ చిత్రాన్ని నిర్మిస్తున్నారు. ప్రశాంత్ పిళ్లై సంగీతం అందిస్తుండగా.. దివాకర్ మణి సినిమాటోగ్రాఫర్‌గా పనిచేస్తున్నారు. ఇటీవల రామానాయుడు స్టూడియోస్‌లో సినిమా షూటింగ్‌ను ప్రారంభించారు. ముహూర్తపు సన్నివేశానికి హీరో నాగ చైతన్య క్లాప్ కొట్టడం విశేషం. డైరెక్టర్ మారుతీ కెమెరా స్విచ్ ఆన్ చేశారు. ఇప్పుడు రెగ్యులర్ షూటింగ్ మొదలయ్యే సమయంలో నిత్య తప్పుకుందనే వార్త ఆసక్తికరంగా మారింది. మరి నిత్య స్థానంలో ఎవరిని ఎంపిక చేస్తారో చూడాలి.