పేపర్ వ్యూ రద్దు... ప్రీమియం సబ్ స్క్రిప్షన్ దారిలోనే ఆర్ ఆర్ ఆర్
cinema | Suryaa Desk | Published : Thu, May 19, 2022, 01:43 PM
దర్శకధీరుడు రాజమౌళి తెరకెక్కించిన మాస్టర్ పీస్ ఆర్ ఆర్ ఆర్ విడుదలై నెల దాటుతున్నా ఇప్పటికీ ఘనవిజయంగా థియేటర్లలో రన్ అవుతుంది. ఇటీవలే థియేటర్లలో విజయవంతంగా 50 రోజులను పూర్తి చేసుకుంది. ఈ క్రమంలో ఆర్ ఆర్ ఆర్ ఓటిటిలో కూడా సందడి చెయ్యటానికి రెడీ అవుతుంది. రాజమౌళి డైరెక్షన్లో చెర్రీ, తారక్ నటించిన ఆర్ ఆర్ ఆర్ మార్చి 25న విడుదలయ్యింది. ఆలియాభట్, అజయ్ దేవగణ్, ఒలీవియా మోరిస్, సముద్రఖని, శ్రేయాశరణ్ కీలకపాత్రలు పోషించారు. ముందుగా ఆర్ ఆర్ ఆర్ ఓటిటి రిలీజ్ ను పే పర్ వ్యూ తరహాలో ప్రదర్శిస్తున్నట్టు తెలిపిన జీ 5 సంస్థ తాజాగా ఆ నిర్ణయాన్ని విరమించుకున్నట్టు తెలుస్తోంది. అమెజాన్ ప్రైమ్ వీడియో లో మే 17నుండి స్ట్రీమింగ్ అవుతున్న సూపర్ హిట్ చిత్రం కేజీఎఫ్ 2 కూడా పే పర్ వ్యూ తరహాలోనే అందుబాటులోకి వచ్చింది. ఈ సినిమాను చూసేందుకు రూ. 199 చెల్లించాల్సి ఉంటుంది. అయితే, థియేటర్లలో ఓ మోత మోగించిన కేజీఎఫ్ 2 ఓటిటిలో మాత్రం నిశ్శబ్దం గా ఉంది. దీంతో ఆర్ ఆర్ ఆర్ ను పే పర్ వ్యూ పద్దతిలో కాకుండా ప్రీమియం పద్దతిలోనే స్ట్రీమింగ్ చెయ్యాలని జీ 5 భావిస్తోందట. ఈ మేరకు అధికారిక ప్రకటన కూడా చేసింది. తెలుగు, తమిళ, మలయాళ, కన్నడ భాషలలో ఆర్ ఆర్ ఆర్ సినిమా మే 20నుండి జీ 5 లోకి అందుబాటులోకి రానుంది. ఆర్ ఆర్ ఆర్ హిందీ వెర్షన్ నెట్ ఫ్లిక్స్ లో జూన్ 2 నుండి స్ట్రీమింగ్ కానుంది.
|
|